მნიშვნელოვანი ინფორმაცია
26
მარტიდღის ზოგადი ასტროლოგიური პროგნოზი
ოთხშაბათი, მთვარის ოცდამეშვიდე დღე დაიწყება 06:43-ზე, მთვარე თევზებში გადავა 23:28-ზე
კარგი დღეა ახალი საქმეების დასაწყებად. შანსი მოგეცემათ მოაგვაროთ ძველი პრობლემები. კარგი დღეა ბიზნესისა და სავაჭრო საქმეებისთვის; უფროს თაობასთან ურთიერთობისთვის, მათგან რჩევის მიღება. ურთიერთობის, საქმეების გარჩევას არ გირჩევთ. კარგი დღეა საქმიანობის, სამუშაო ადგილის შესაცვლელად. კარგია მოგზაურობის დაწყება. მცირე ფიზიკური დატვირთვა არ გაწყენთ, კარგი დღეა საოჯახო საქმეების შესასრულებლად. მოერიდეთ დიდი რაოდენობით სითხის, განსაკუთრებით ალკოჰოლის მიღებას. გაუფრთხილდით ფეხებს.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
11 საინტერესო ფაქტი საქართველოს ფეხბურთელთა ნაკრებზე
01:11 / 25-11-2016
საქართველოს ფეხბურთელთა ეროვნული ნაკრები ყველას ტკივილია განურჩევლად იმისა, ფეხბურთი უყვართ თუ არა. ბოლო გასვლითი მატჩების შემდეგ (ირლანდია-უელსში), ყველა გულშემატკივარს იმედი ჩაგვესახა, თუმცა მოლდოვასთან მატჩმა, რომელიც ფრედ 1-1 დასრულდა, დაგვარწმუნა, რომ ჩანასახს გაჩენა ჯერ კიდევ არ მოუწევს.
AMBEBI.GE და SPORTALL.GE წარმოგიდგენთ, რამდენიმე საინტერესო ფაქტს ქართული ფეხბურთის ისტორიიდან:
მოგება ყველაზე დიდი ანგარიშით
1997 წლის 30 მარტს, თბილისში ბორის პაიჭაძის სახელობის ეროვნულ სტადიონზე საქართველოს მეტოქე, მეზობელი სომხეთის ნაკრები იყო. ის მატჩი ქართველთა უდავო უპირატესობით წარიმართა და დამაჯერებელი გამარჯვებით დასრულდა - 7:0. ამ შეხვედრაში, კარიერაში პირველი ჰეთ თრიქი შეასრულა შოთა არველაძემ (ანალოგიური შედეგი აჩვენა მან 2006 წლის 16 აგვისტოს, ფარერებთან გასვლითი მატჩისას). მისმა ტყუპისცალმა არჩილმა, მინდორზე თემურ ქეცბაიას ადგილი დაიკავა და რუსი არბიტრის, ვალენტინ ივანოვის საფინალო სასტვენამდე ორჯერ მოასწრო თავის გამოჩენა. ხორენ ოგანესიანის გაწვრთნილთა კიდევ ორჯერ დამწუხრება გიორგი ქინქლაძემ (პენალტით) და მიხეილ ყაველაშვილმა შეძლეს.
თითქმის 19 წლის წინანდელი მატჩის შედეგი, დღემდე სანაკრებო დონეზე ნაჩვენებ შედეგთა შორის ორივე ქვეყნისთვის მისათითებელია. ქართველებს არც მანამდე და არც მას შემდეგ, ასეთი დიდი ანგარიშით მატჩი არ მოგვიგია. რაც შეეხებათ სომხებს, მათ, იმავე 1997 წლის იანვარში, ჩილეში, იქაურ ნაკრებთან განცდილი "რეკორდული" მარცხის (0:7) სიმწარე გაიხსენეს. ამ მატჩის კომენტირებისას, ნუგზარ ჯუღელმა ერთი საინტერესო ფრაზა თქვა - მოედანზე ორი არველაძეა: აჩიკო და არჩილი.
წაგება ყველაზე დიდი ანგარიშით
ბუნებრივია სადაც მოგებაა, იქვე ახლოსაა წაგებაც. ჩვენმა ნაკრებმა ყველაზე დიდი ანგარიშით დანიის ეროვნულ გუნდთან წააგო. მატჩი 2005 წლის სექტემბერში, დანიის დედაქალაქში გაიმართა და ჩვენი დამარცხებით 1:6 დასრულდა. ამ თამაშში ქართველთა აქტივობის გახსენება რთულია, თუმცა მსაჯის სასტვენის მერე, ერთბაშად რამდენიმე ქართველი ფეხბურთელი გააქტიურდა, მათი მიზანი დანიელთა ვარსკვლავის (იმ დროს "მილანში" მოთამაშე) იონ დალ ტომასონის მაისური იყო - ყველა ცდილობდა პირველი მისულიყო მასთან, რომ სხვებისთვის დაესწრო გაცვლა.
სამი ძმა ერთად მოედანზე
ეს მართლა უნიკალური შემთხვევაა არა მარტო ქართული, არამედ მსოფლიო ფეხბურთის ისტორიაში. მოედანზე ერთდროულად სამი ძმა თამაშობდა - შოთა, რეზი და აჩი არველაძეები. ეს 1994 წლის 19 ივლისს, მალტასთან გამართულ ამხანაგურ შეხვედრაზე მოხდა. ამის მერე სხვადასხვა დროს კიდევ განმეორდა, როცა სამივე ძმამ ერთად ითამაშა.
ყველაზე წარმატებული მწვრთნელი
არსებობის მანძილზე საქართველოს ნაკრებს 19 მწვრთნელი ჰყავდა (ზოგი მათგანი, თანამდებობიდან გათავისუფლების მერე, რამდენიმე წლის შემდეგ ისევ დაუბრუნდა პოსტს). ყველაზე დიდხანს პოსტი თემურ ქეცბაიას ეკავა, ის 40 მატჩში გაუძღვა ჩვენს ნაკრებს და 
შესაბამისად, მასვე აქვს ყველაზე მეტი - 13 მოგებაც, თუმცა ნაკრების არსებობის ისტორიაში ერთადერთხელ მოგებული ტურნირის დროს (მალტის ტურნირი - 1998 წლის თებერვალში), გუნდს სათავეში ვლადიმერ გუცაევი ედგა. სწორედ მაშინ იყო ჩვენი ნაკრები ფიფას რეიტინგში ყველაზე მაღლა - 52-ე ადგილზე.
ყველაზე წარუმატებელი მწვრთნელი
ამ ნომინაციაში უდაო ლიდერი, ცნობილი არგენტინელი სპეციალისტი ექტორ რაულ კუპერია. ნაკრებში ის 2008 წლის ზაფხულში მოვიდა. მისი დებიუტი უელსთან ამხანაგურ მატჩში შედგა, რომელიც ქართველებმა 2:1 მოიგეს. თავიდან გიორგი ლორია შეცდა და შორიდან დარტყმული ბურთი ხელიდან გაუვარდა. ვაგებდით, მაგრამ მეორე ტაიმში ლევან ყენიამ და ბექა გოცირიძემ გაიტანეს. ამ თამაშის მერე, ქართველებმა მისი ხელმძღვანელობით კიდევ 15 თამაში გამართეს, საიდანაც 4 ფრედ დაასრულეს, ხოლო 11 - წააგეს.
ყველაზე მაღალანაზღაურებადი მწვრთნელი
ზოგადად, მწვრთნელების ხელფასი მაქსიმალურად გასაიდუმლოებულია ხოლმე, თუმცა არაოფიციალური ინფორმაციით, ყველაზე მაღალი ხელფასი გერმანელ სპეციალისტს კლაუს ტოპმიოლერს ჰქონდა. მისი გასამრჯელო წელიწადში 5 485 000 ლარი იყო.
ყველაზე კურიოზული მატჩი
რამდენად შეიძლება კურიოზული ეწოდოს ამ მატჩს, საკითხავია, 2002 წლის 12 ოქტომბერს საქართველოს რუსეთის ნაკრები ესტუმრა. პირველი ტაიმის ბოლოს, 41-ე წუთზე, "ლოკომოტივის" სტადიონის ელექტროსისტემაში მომხდარი ავარიის გამო შუქი გამოირთო. ორ წუთში პრობლემა მოგვარდა და ნორვეგიელმა არბიტრმა ტომ ჰენინგ ოვრებომ მატჩი განაახლა, მაგრამ გავიდა კიდევ სამი წუთი და შუქი ისევ გამოირთო. ელექტროენერგიის ალტერნატიული მიწოდების წყარომ ვერ იმუშავა, ენერგეტიკოსებს პრობლემის მოგვარების იმედი გადაეწურათ და მატჩი შეწყდა. ეს იყო უდიდესი სირცხვილი, რის გამოც საქართველოს ბნელი და ჩამქრალი ქვეყნის იარლიყი მიაწებეს. სხვათა შორის, ერთ თვეში საერთაშორისო საკალათბურთო შეხვედრის დროსაც დაახლოებით იგივე მოხდა - თბილისის "დინამომ" ვერის პარკში ფიბა-ევროპის რეგიონული თასის გათამაშებაში უკრაინულ იუჟნის "ხიმიკს" უმასპინძლა. დარბაზში დენი ორჯერ გამოირთო და თამაში 20 წუთის დაგვიანებით დაიწყო, თუმცა ამ მორიგ ელექტროინციდენტს დიდი ხმაური არ მოჰყოლია.
ყველაზე მეტი მაყურებელი სტადიონზე
1995 წელს, საქართველოს გერმანიის სუპერ გუნდი ესტურმა, რომლის შემადგენლობაში მსოფლიო ვარსკვლავები (კლინსმანი, მათეუსი, კიოპკე და სხვა) თამაშობდნენ. ქვეყანაში, სადაც შუქის მოსვლაც კი სენსაციად აღიქმებოდა, ამ დონის გუნდის სტუმრობა ბევრს ნიშნავდა, 
ამიტომ თამაშზე დასასწრებად მთელი საქართველოდან ჩამოვიდნენ. "დინამოს" სტადიონი მაშინ 56 000 ადამიანს იტევდა, ბუნებრივია, ბილეთები თამაშამდე დიდი ხნით ადრე გაიყიდა, თუმცა ქვეყანაში გამეფებული კორუფცია სტადიონზე ყვაოდა და გარკვეული თანხის სანაცვლოდ არავის ეუბნებოდნენ შესვლაზე უარს. არაოფიციალური მონაცემებით, თამაშს 110 000 ადამიანი დაესწრო.
ყველაზე დიდი სენსაცია
2016 წლის 8 ივნისს საქართველოს ნაკრებმა საოცრება მოახდინა, სტუმრად მსოფლიოს და ევროპის მოქმედი ჩემპიონი - ესპანეთის ნაკრები დაამარცხა. მთელი თამაშის მანძილზე, მიუხედავად საგრძნობი უპირატესობისა, ესპანელებს რეალური საგოლე მომენტი არ შეუქმნიათ, ჩვენებმა კი კარგად ისარგებლეს კონტრშეტევით და მატჩის ერთადერთი გოლიც გაიტანეს. დამოუკიდებელი ქართული ფეხბურთის ისტორიაში ასეთი დიდი გამარჯვება ჯერ არ ყოფილა.
ყველაზე მეტი თამაში ეროვნულ ნაკრებში
ეროვნულ გუნდში ყველაზე მეტი, 100 თამაში სფფ-ს მოქმედ პრეზიდენტს და პარლამენტის წევრ ლევან კობიაშვილს აქვს ჩატარებული. მისი დებიუტი ნორვეგიელებთან ამხანაგურ მატჩში შედგა, როდესაც ნაკრების მწვრთნელმა ალექსანდრე ჩივაძემ სასტარტო შემადგენლობაში 
დააყენა. ლევან კობიაშვილს ნაკრებში 12 გოლი აქვს გატანილი, მათ შორის, უკანასკნელი გოლი კობიაშვილმა 2011 წლის 26 მარტს ხორვატიის ნაკრების წინააღმდეგ ევრო 2012-ის შესარჩევ მატჩში გაიტანა, რომელიც საქართველოს ნაკრებმა სწორედ მისი გოლის წყალობით 1-0 მოიგო. ნაკრებში უკანასკნელი, მე-100 მატჩი კობიაშვილმა იმავე ტურნირზე 2011 წლის 11 ოქტომბერს ჩაატარა საბერძნეთის ნაკრების წინააღმდეგ.
დუბლი საკუთარ კარში
აწ უკვე პოლიტიკოსი კალაძის ბიოგრაფიაში, ავტოგოლი დღემდე ცუდად მოსაგონარია. საქართველო-იტალიის ნაკრების შეხვედრისას, რომელიც 0-2 დასრულდა, ორივე გოლი, ეროვნული ნაკრების კაპიტანმა გაიტანა საკუთარ კარში. სამწუხაროდ, როცა კახა კალაძეზეა საუბარი, ბევრი მხოლოდ ამ ფაქტს იხსენებს, თუმცა ავიწყდებათ კალაძის გმირული საქციელი, როცა მისი ძმა გაიტაცეს - მან ეროვნული ნაკრების მაისურით ბრწყინვალე მატჩი ჩაატარა. ამ ფაქტის მიუხედავად, კახა კალაძე დღემდე რჩება ყველაზე წარმატებულ ქართველ ფეხბურთელად.
ლადო გოგოლაძე
AMBEBI.GE
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
სალომე ზურაბიშვილი საზოგადოებას 31 მარტს დაანონსებულ აქციაზე მისვლისკენ მოუწოდებს - რა პასუხი აქვს "ქართულ ოცნებას"
კვირის კითხვადი სტატიები
მნიშვნელოვანი ინფორმაცია
მკითხველის რჩევით
