ბათუმის ბულვარში თოვლმა შვიდი ხე წააქცია

ბათუმში მოსულმა უხვმა ნალექმა ბულვარის ტერიტორიაზე შვიდი ხე წააქცია. დაზიანებულია ასევე, ევკალიპტების ხეივანი და მწვანე ნარგავები.

როგორც "ინტერპრესნიუსს" ბულვარის დირექტორმა, არჩილ კახიძემ განუცხადა, ბულვარის ტერიტორიაზე ხეებს ტოტებიც აქვს მოტეხილი. არჩილ კახიძე მოხალისეებს მოუწოდებს, დღეს დილიდან ბულვარში მივიდნენ და ადმინისტრაციას დახმარება გაუწიონ.

"დილიდან, ვისაც შეუძლია მუშაობა, მოხალისეებს მოვუწოდებთ მოვიდნენ ბულვარში და დაგვეხმარონ. შვიდი ხე წაიქცა, დიდთოვლობის გამო ხეებს ტოტები აქვს ჩამოტეხილი. 80-მდე თანამშრომელი მუშაობს ბულვარის ტერიტორიაზე, დღეიდან კი მოხალისეებს ველოდებით", - აღნიშნა არჩილ კახიძემ.

ბათუმში 30 დეკემბრის ღამეს გათოვდა და სამი დღის განმავლობაში თოვდა. თოვლის საფარი ქალაქში ნახევარ მეტრს აღწევს.

"ინტერპრესნიუსი"