"საუკეთესო ვარიანტია, ადამიანი გამდინარე წყალში, მდინარეში მოინათლოს" - რა შემთხვევაში არ შეიძლება ნათლობა და ჯვრისწერა
ჯვრისწერა და ნათლობა დღესდღეობით ნებისმიერ დროს არის შესაძლებელი, თუმცა ეკლესია გვირჩევს დავიცვათ ის წესები, რასაც ეს საეკლესიო რიტუალები ითვალისწინებს. ამას გარდა, არის შემთხვევა, როცა ჯვრის დაწერა სასურველი არ არის.
ამაზე უფრო ვრცლად AMBEBI.GE-ს დეკანოზი გიორგი თევდორაშვილი ესაუბრა:
- ყველა მართლმადიდებელ ქრისტიანს მოეხსენება, რომ ეკლესიაში დადგენილია შვიდი საიდუმლოება. ამ საიდუმლოებებში პირველია ნათლისღება, რამეთუ ნათლისღებით ადამიანი ეკლესიის წევრი ხდება. სამწუხაროა, მაგრამ ფაქტია, რომ ნათლობაც და ჯვრისწერაც ხშირად სიმბოლურად და ქვეცნობიერად აღესრულება.
სასულიერო პირიც არ უხსნის და არ ასწავლის მონაწილეებს, თუ რა ლოცვები იკითხება ამ დროს, რა დროს შეიძლება ჯვრისწერა და რა დროს არა, ვინ უნდა იყოს მიმრქმელი, ანუ ნათლია და რა უნდა ასწავლოს მან ბავშვს
დღეს ნათლობა ძალიან ბუნდოვან გარემოებაში ტარდება - სუფრა, ოქროს ჯვარი და მერე ნათლიების უმრავლესობა თავიანთ მოვალეობას აღარ ასრულებს, ბავშვი ისე იზრდება, არ იცის მისი ნათლია ვინ არის, რა არის მიმრქმელობა, რატომ მოინათლა და ა.შ.
- როგორ ნათლავდნენ ძველად და როგორ ტარდება ნათლობა ახლა?
- დაახლოებით მეოთხე საუკუნიდან დიდი მარხვა ზუსტად იმიტომ დადგინდა, რომ ადამიანები, ბავშვი იქნებოდა თუ დიდი, დამდგარიყვნენ კათაკმევლებად, კათაკმეველი არის პიროვნება, ვინც უნდა მოინათლოს. ეს ორმოცდღიანი მარხვა ზუსტად მათი მოსამზადებელი პერიოდი იყო. შემდეგ ეპისკოპოსი გამოკითხავდა თუ როგორ შეისწავლეს ქრისტიანული კატეხიზმო, დიდ შაბათს ხდებოდა მათი ნათლობა, კვირას კი ყველა ერთად ეგებებოდა მაცხოვრის ბრწყინვალე აღდგომას.
მოგვიანებით, ეკლესიის ისტორიაში ერთი დღე აღარ იყო საკმარისი და ეკლესიამ ნათლობისთვის სხვა დღეებიც განაჩინა. თანამედროვე რეალობაში ნებისმიერ დროს შეიძლება ნათლისღების ჩატარება. პირველი საუკუნის ძეგლის მიხედვით, სადაც 12 მოციქულის სწავლებააა მოცემული, წერია, რომ ადამიანი მოინათლოს გამდინარე წყალში თუ გამდინარე წყალი არ არის დამდგარ წყალში და თუ დამდგარი წყალიც არ არის შეიძლება თავზე სხურებითაც მოინათლოს.
თანამედროვე რეალობაში თითქოს გავზარმაცდით და მარტო თავზე წყლის დასხმით ვნათლავთ. რა თქმა უნდა, ეს ნათლობად ითვლება, მაგრამ ყველაზე საუკეთესო ვარიანტია, რომ ადამიანი გამდინარე წყალში, მდინარეში მოინათლოს.
- როდის არ შეიძლება ჯვრის დაწერა?
- ჯვრისწერის დროსაც იგივე მდგომარეობაა, ერთხელ მოდიან წყვილები, იწერენ ჯვარს და არ იციან, რა მოვალეობა აკისრიათ ერთმანეთის მიმართ, რომ უნდა მიუტეონ, დაუთმონ. ბუნებრივია მათი ჯვრისწერა არ იქნება ნაყოფიერი და ფაქტი სახეზეა, მაგალითად საპატრიარქოში მეორე სართულზე არის ქორეპისკოპოსის განყოფილება, სადაც უამრავი ადამიანი იყრის თავს, რომელთაც ჯვრის აყრა სურთ.
ჯვრის დაწერა სასურველი არ არის მხოლოდ მარხვის პერიოდში, განსაკუთრებით დიდ მარხვაში
შეიძლება გამონაკლისის დაშვება და ესეც იშვიათად ხდება ხოლმე. მაგალითად, თუ წყვილი მიდის საზღვარგარეთ და იქ ჯვრის დაწერას ვერ მოახერხებენ, მაგრამ ამ დროს ეპისკოპოსის კურთხევაა საჭირო, თუმცა დიდ მარხვაში ეკლესია ჯვარს არ სწერს წყვილებს.
- რატომღაც ბევრი ჯვარს იწერს და ნათლავს ბავშვს შაბათს, რამე მნიშვნელობა აქვს ამ დღეს?
- ესეც კომუნისტების პერიოდს უკავშირდება იმიტომ, რომ ორშაბათს სამსახური იწყებოდა, შაბათს ქორწილი და მეორე დღეს დასვენება და ა.შ. ეკლესიურად სასურველია ჯვრისწერა წირვის შემდეგ აღესრულოს. შაბათს ლოცვის მერე ჯვრისწერა აღარ ხდება იმიტომ, რომ მწუხრი დგება. ჯვრისწერის საიდუმლო იმდენად დიდი სიწმინდე იყო, რომ პირველ ღამეს ცოლ-ქმარს თუ ეკლესიურები იყვნენ, ურთიერთობაც არ ჰქონდათ. კარგია თუ ორივე იტყვის აღსარებას, ლოცვას დაესწრებიან, კვირას ეზიარებიან და წირვის მერე დაიწერენ ჯვარს. არანაირი წინააღმდეგობა არ არის, რომელ დღეს დაიწერენ ჯვარს, მაგრამ თუ ეკლესიურად უნდათ, სასურველია ასე.