ბებია, რომელმაც შვილიშვილს "სკანდალი წაართვა"
2013 წლის ყველაზე სკანდალური ქართველი მომღერალი ნინი ბადურაშვილი იყო. მისი და მისი ოჯახის გარშემო განვითარებული მოვლენების გამო, თითქმის მთელი საქართველოს ყურადღება ნინისკენ იყო მიმართული. შესაბამისად, გასული წლის ყველაზე სკანდალურ პერსონად ნინი ბადურაშვილი ითვლებოდა. 2014 წელს ნინი სკანდალებში აღარ გახვეულა, ის აღარ საუბრობს პირად ცხოვრებაზე და შესაბამისად, მის მიმართ საზოგადოების ინტერესიც ჩაქრა. სამაგიეროდ, შვილიშვილს 2014 წელს სკანდალურობით გაუსწრო ბებიამ, მსახიობმა ლალი ბადურაშვილმა.
ლალი ბადურაშვილი, რომელსაც საზოგადოება "დიდოსტატის მარჯვენაში" შესრულებული შორენას როლით იცნობს, წელს საკმაოდ ხმამაღლა გამოხატავდა საკუთარ პოლიტიკურ მოსაზრებებს. ბოლო დროს სააკაშვილის გაკრიტიკება აქტიურად დაიწყო. ჯერ ნინი ბადურაშვილის "დაბლოკვაში" დაადანაშაულა სააკაშვილის ხელისუფლება, ეს კი იმით ახსნა, რომ სააკაშვილის ფავორიტი მომღერალი სოფო ნიჟარაძე იყო. ნოემბერში, ერთ-ერთ საგაზეთო ინტერვიუში კი ის სააკაშვილის ბებიას, მზია წერეთელს დაუპირისპირდა. "რა ვქნა, მზია, მიშა ჩემი შვილიშვილი რომ იყოს, ჩემი ხელით ჩავქოლავდი იმდენი უბედურება დაატრიალა. ერთხელ მაინც წაგეკითხა "გამზრდელი", გეცოდინებოდა, როგორ უნდა მოქცეულიყავი. სააკაშვილის ბებია ისეთი არაჩვეულებრივი, კომუნიკაბელური და უბრალოა, მერიდება, მაგრამ უნდა ვუთხრა, სააკაშვილი მარტო მის შვილიშვილად რომ დარჩენილიყო, მისი პრობლემა იქნებოდა, მაგრამ ახლა მთელი საქართველოს პრობლემაა", - განაცხადა ბადურაშვილმა ინტერვიუში. ლალი ბადურაშვილმა "გამზრდელის" წაკითხვა სააკაშვილს 2012 წლის სექტემბერშიც ურჩია, როცა ციხის კადრები გავრცელდა და მას გესტაპო უწოდა.
ინტერვიუს, რომელშიც ლალი ბადურაშვილი სააკაშვილის ბებიას დაუპირისპირდა დიდი გამოხმაურება მოჰყვა. საზოგადოებამ მას ის პერიოდი შეახსენა, როცა მისი შვილიშვილი, ნინი ბადურაშვილი წინა ხელისუფლების საყვარელ მომღერლად მიიჩნეოდა, თუმცა ამაზე ბებია ბადურაშვილს კომენტარი არ გაუკეთებია. ლალი ბადურაშვილის ინტერვიუმ განსაკუთრებით დოდონა კიზირია აღაშფოთა. აღმოჩნდა, რომ ისინი ერთად დადიოდნენ საბავშვო ბაღში. მსახიობს კიზირიამ შეახსენა, რომ ბაღში ზეიმზე ლექსის დამახსოვრება ვერ შეძლო და სამსახიობო ოსტატობაც დაუწუნა. "ალბათ გეგონა, ყოველთვის კუდრაჭა, ლამაზი ლალი იქნებოდი, არა? შენ კი იმდენად უტვინო ხარ, რომ არც კი გესმის შენი სიტყვების მნიშვნელობა - ბოლოს და ბოლოს მიახვრიტეთ ეს ნაციონალები (რასაკვირველია, სააკაშვილი პირველი უნდა იყოს) და დავისვენებთო. ასეთი "სიბრძნე" თავგადაკლული მეოცნებეებისგანაც არ გამიგონია. რამ გაგაცოფა ასე, იმან რომ შენი ქალიშვილი პრიმა მომღერალი არ გახადეს? ამის გამო, შესაძლებლობა რომ გქონდეს, ათასობით ადამიანს (ბევრნი ვართ ნაციონალები) სასიკვდილოდ გაიმეტებდი? მართლა ასეთი რეგვენი ხარ? თუ არ იცოდი, რომ რეგვენი ხარ? აი, გეუბნები, რეგვენი კი არა, ხარ ერთუჯრედიანი არსება - ინფუზორია-ფოსტალი. თავს ნუ ირცხვენ, პოლიტიკაში ნუ ერევი და განცხადებებს ნუ აკეთებ. რაიმე საქმე გაიჩინე და გაერთე, სანამ ჯერ კიდევ ცოცხლები ვართ ამ ქვეყანაზე. აბა, ჰე! კარგად იყავი",- დაწერა დოდონა კიზირიამ ბადურაშვილის პასუხად.
ლალი ბადურაშვილი "ნაციონალური მოძრაობის" მხარდამჭერს, მაია ორჯონიკიძესაც დაუპირისპირდა. ვერ გავიგე ეს "გიჟ მაიკო" ასე გაუთავებლად, მენტორული ტონით რატომ უნდა გველაპარაკებოდეს, ვინ ხართ რა გაგიკეთებიათ, ასეთი ტონით სიმონ ყაუხჩიშვილი და ივანე ჯავახიშვილი არ ლაპარაკობდნენო...
"ძალიან საწყენია, რომ ამ დონეზე დაეშვა ქალბატონი ლალი ბადურაშვილი. მე ამ დონეზე ვერ ვიკადრებ ამ ტონალობაში საუბარს. ეს არის პასუხი ქალბატონ ლალის მიმართ, ეს არის პასუხი იმ ადამიანების მიამრთ, ვისთვისაც სიტყვის თავისუფლება და კულტურა სხვადასხვა ცნებაა",-ასე უპასუხა მაია ორჯონიკიძემ ლალი ბადურაშვილის განცხადებას.
ლალი ბადურაშვილს პოლიტიკურ თემებზე სასაუბროდ ხშირად იწვევენ ამა თუ იმ გადაცემაში. ბოლოს ის ინგა გრიგოლიას "ღია ეთერში" იმყოფებოდა, სადაც ისევ "ნაციონალური მოძრაობის" წევრებს დაუპირისპირდა და შემდეგი განაცხადა: რატომ არ უნდა ვიყო ამ მთავრობის კმაყოფილი, თავისუფლად რომ ვსუნთქავ?
მსახიობმა ინგა გრიგოლიას გადაცემაში კომუნისტური რეჟიმის მიმართაც გამოხატა საკუთარი კმაყოფილება და საზოგადოებას შეახსენა, რომ კომუნისტების დროს აშენდა თეატრები, ვაზისუბანი, მუხიანი, დიღმის მასივი და ა.შ. სააკაშვილის 9 წლიანი მმართველობის დროს კი ლტოლვილებს 10 კორპუსი ვერ აუშენეს.
ინგა გრიგოლიამ საკუთარ გადაცემაში ლალი ბადურაშვილს ის პერიოდი შეახსენა, როცა ნინი ბადურაშვილი "ნაციონალური მოძრაობის" მხარდამჭერი იყო, რაზეც ბადურაშვილმა შემდეგი პასუხი გასცა: "მე ნინიზე არ ვპასუხობ ხოლმე, ნინი მაშინ იყო 20-22 წლის გოგო, სიმღერა უნდოდა და ყველასთან მღეროდა; ესტრადაა და ამას ნუ ჩავთვლით...", - აღნიშნა ლალი ბადურაშვილმა.
რა რეაქცია აქვს ნინი ბადურაშვილს ბებიის სკანდალურ განცხადებებზე და სატელევიზიო გამოსვლებზე, უცნობია.
თამარ ბოჭორიშვილი
AMBEBI.GE
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
