26
მარტიდღის ზოგადი ასტროლოგიური პროგნოზი
მას მერე, რაც "ვეფხისტყაოსნის" რეჟისორთან, ნიკოლოზ ხომასურიძესთან ინტერვიუ გამოვაქვეყნეთ, ნიკოლოზის და ზოგადად ამ პროექტის მიმართ საზოგადოებაში არაერთგვაროვანი შეფასებები გაჩნდა. ამიტომ მას ისევ დავუკავშირდით, რათა გაგვერკვია, საზოგადოების უარყოფით შეფასებებზე რას ფიქრობს.
- შენი პროექტი საზოგადოების გარკვეულმა ნაწილმა დადებითად ვერ მიიღო. სხვადასხვა არგუმენტი სახელდება: ვიღაცას არჩეული მსახიობები არ მოსწონს, ვიღაცას კიდევ პერსონაჟების სამოსი (განსაკუთრებულად ტარიელის). ზოგი ამბობს, რომ ცეკვით გადაწყვეტილი "ვეფხისტყაოსანი" მისთვის გაუგებარია და აინტერესებთ - რატომ მუზიკლი? მოკლედ, ჯერ არ შექმნილი პროდუქტის მიმართ ასეთი შენიშვნები გაჩნდა.
- ამა თუ იმ საკითხზე ცხადია, ყველას თავისი მოსაზრება აქვს. ჩემი სურვილი იქნება, ადამიანებს ნებისმიერ საქმეში მეტი სიყვარული და ნაკლები აგრესია ჰქონდეთ. გაუგებარი და უცნაურია სხვისი საქმის მიმართ გამოვლენილი ამდენი ნეგატივი. მით უმეტეს, იმ ადამიანების მიმართ, რომლებმაც რაღაც გადაწყვიტეს და მას მიზანმიმართულად მიჰყვებიან...
თუ ვინმეს კოსტიუმი არ მოეწონა, ან თუ რატომ მოხდა მიუზიკლის ჟანრში ამ ნამუშევრის გადაწყვეტა და კიდევ სხვა რამ, ვიმეორებ, ყველას თავის გაგება აქვს, მაგრამ აქვე ვიტყვი, რომ ჩვენ ჩვენი გაგება გვაქვს. ასე რომ, რაც მოგვწონს და ჩავიფიქრეთ, იმას ვაკეთებთ. ჯერ ერთი, ახლა პილოტზე ვმუშაობთ, რაც საცდელ გადაღებას ნიშნავს, ის არ არის დასრულებული ვერსია. წესით, ფოტოსურათით საბოლოო დასკვნის გაკეთება, წინასწარი მსჯელობა, თუ როგორი იქნება ნამუშევარი და მით უმეტეს, საპრეზენტაციოდ მომზადებული ვიდეომასალა, შეუძლებელია.
ამიტომ, მიმაჩნია, რომ ამ კომენტარების 99% ძალიან არაკომპეტენტურია. ამასთან, ისინი სიძულვილით არის გაკეთებული და ეს სიძულვილი დღესდეღეობით გამეფებულია ჩვენს საზოგადოებაშიც. დიახ, ერთმანეთის უპატივცემულობა, აგრესია, შური, ბოღმა, - რაც გინდათ, ის დაარქვით, რასაც ვერ მივესალმები და ვერც არაკომპეტენტურ შენიშვნებს გავიზიარებ.
- რატომ?
- არავისთან ვალდებულები არ ვართ, რადგანაც ჩვენ საქმეს ვაკეთებთ! ვცდილობთ, საკუთარი ხედვით შევქმნათ ეს პროექტი. სხვას როგორც უნდა და შეუძლია, ისე გააკეთოს. რაც მეტი იქნება "ვეფხისტყაოსანი" ეკრანიზებული, სცენაზე დადგმული, უკეთესი და გასახარელია. პირქით, ყველა უნდა ცდილობდეს, რომ ამ ნამუშევარზე მეტი საინტერესო პროექტი შეიქმნას, მაგრამ ამ მიმართულებით არავინ არაფერს ცდილობს...
მსოფლიოში შექსპირის ყველა ნამუშევარი ზეპირად იციან, რადგანაც გადაღებულია ფილმებიც და დადგმულია სპექტაკლებიც. ასევეა ალექსანდრე დიუმა, ყველამ იცის "სამი მუშკეტერი". "ვეფხისტყაოსანი" კი ადამიანების მცირე ჯგუფის გარდა არავინ, რადგანაც სათანადოდ არ ხდება მისი პოპულარიზაცია.
- ელოდებოდი ასეთ შემოტევას?
- ველოდებოდი, მაგრამ თუ ამდენი ღვარძლი და აგრესია იყო ხალხში დაგროვებული, არ მეგონა. ამიტომ, ვფიქრობ, რომ ქვეყანას მაგრად უჭირს და ასეთი საზოგადოების განვითარება რთულია. ეს რა თქმა უნდა, პოლიტიკის ბარალია, რადგანაც ძალიან დათრგუნვილია საზოგადოება იმისგან, რაც ქვეყანაში ხდება და ამის გამოა ასეთი დაძაბულობა, ერთმანეთის შეურაცხყოფა.
ქვეყანამ კულტურაზე უნდა გააკეთოს აქცენტი და უძველესი ცივილიზაციის კერას უნდა მიენიჭოს დანიშნულება. ჩვენი მოწოდება კი ინტელექტუალური, კულტურული პროდუქტების შექმნაა. რაც ძალიან კარგად გამოგვდიოდა აქამდე და მომავალშიც გამოგვივა. მაგრამ თუ ვიღაცის წამოწყებას ასეთ და ამხელა აგრესიას დაახვედრებენ, ის შეიძლება გაჩერდეს, დაკომპლექსდეს, მაგრამ ჩვენ არ გავჩერდებით, რადგანაც საქმე გვაქვს! გეგმას მიზანმიმართულად მივყვებით, მიუხედავად იმსა, რომ წახალისებისა და კეთილი სურვილების ნაცვლად, ამხელა უარყოფითი და უსამართლო შეფასებები მივიღეთ. ხომ ვამბობ, ასეთ დროს, ბევრი წამოწყება შეიძლება ჩაკვდეს.გამოვა, გამოვა, არადა, ვის რაში ეკითხება, სხვის საქმეში რომ ჰყოფს ცხვირს?! პირიქით, არ ჯობია, მეტი სიყვარულით მოეკიდოს ნებისმიერ წამოწყებას? რა უფლება მაქვს, ახლა მე ვინმე განვსაჯო?
- მოკლედ, სტიმული არ დაგკარგვია, ხომ?
- საქმის კეთების სურვილი როგორ დამეკარგება?! პირიქით, ამ ყველაფრის მერე მეტი სტიმული მომეცა. ჩვენს ნამუშევარს ნახავს როგორც ადგილობრივი მოსახლეობა, ასევე რამდენიმე უცხოელ პროდიუსერიც. ამ პროექტის განვითარება 2 წელიწადს მოიცავს, რომ ეს ყველაფერი შეიკრას, დამუშავდეს, ინვესტიცია იქნას მოძიებული...
- როგორ ფიქრობ, ინვესტიციას ჩადებენ?
- ვფიქრობ, რომ ჩაიდება. კარგი იდეაა, მაგარი ნაწარმოებია, ჩვენს პროექტშიც ბევრი ჟანრის სინთეზი იქნება თავმოყრილი, რაც მას კარგად წარმოაჩენს. მაგ მიმართულებით მივდივართ და ყველასთან სათანამშრომლოდ მზად ვართ.
- ისე, ამ პროექტთან დაკავშირებით შენი კომპეტენციაც ეჭვქვეშ დააყენეს...
- ცხოვრებაში ჩვენი პროექტებისთვის არასდროს სახელმწიფო თანხა არ გამომიყენებია და არც არავისი. მე და ჩემი სამეგობრო ვწვალობთ, ვაკეთებთ, რაღაც გამოდის, რაღაც - არა, რაღაცას ვაჩერებთ, რაღაცას ბოლომდე "ვაწვებით", რომ საქართველოს ეროვნული პროექტები შევკრათ და გავაკეთოთ. ადამიანებს ამ ქვეყანაში სხვების აზრით უყვართ ცხოვრება, - ის რას იფიქრებს, ეს რას იფიქრებს, იმან რა თქვა, ამან რა თქვა - შენ შენი გასაკეთებელი გააკეთე, იმან რა თქვა და რას აკეთებს, რაში გაინტერესებს? ნუ ერევი, მაგრამ იმას არ ვგულისხმობ, რომ შენი აზრი არ გქონდეს და არ გამოხატო. ამის გაკეთება დაცინვისა და შეურაცხყოფის გარეშეც შეიძლება, - ამით მეტი სტიმული მისცენ ადამიანებს, ვისაც რაღაცის გაკეთება სურს. ამ კომენტარების გაკეთებაში ბევრი ადამიანია ჩართული და ყველას თავისი შეხედულება აქვს. მაგრამ ვინც რაღაცას დაწერს, იმ სიტყვებზეა პასუხისმგებელი. ამიტომ, დაფიქრდეს, სანამ რამეს დაწერს, თორემ მისმა აზრმა შეიძლება კონფლიქტური და არაადეკვატური სიტუაცია გამოიწვიოს და ადამიანისთვის დაუგეგმავი შედეგები მოიტანოს. ასე რომ, გაითვალისწინონ, - სად წერენ, რას წერენ, ვის წერენ... ადამიანებს მეტი სიყვარულით მოეკიდონ, სხვების შრომას პატივი სცენ. შეიძლება რაღაც არ მოგწონდეს, მაგრამ ეს იმას არ ნიშნავს, რომ ვინმეს შეურაცხყოფა მიაყენო, თუ მასზე უკეთესი არაფერი გაგიკეთებია. ჩვენ კი რაც უფრო ვიმუშავებთ, მეტად განვვითარდებით.
ლალი ფაცია
სპეციალურად "ამბები.გე"-სთვის
