25
მარტიდღის ზოგადი ასტროლოგიური პროგნოზი
2 ივნისს მოსულმა სტიქიამ კახეთის ზოგიერთი რაიონი დააზარალა.
პანკისის ხეობაში ძლიერმა ქარმა საცხოვრებელ სახლებს სახურავები გადახადა. სოფელ ჯოყოლოში ათზე მეტ სახლს აქვს სახურავი მთლიანად გადახდილი. საცხოვრებელი სახლები ქარმა ხეობის სხვა სოფლებშიც დააზიანა.
"გუშინ საღამოს ქარი ამოვარდა. სოფელში რამდენიმე სახლს სახურავი ახადა და ეზოში გადაისროლა. დღეს იყვნენ ზარალის აღსაწერად, მაგრამ ალბათ ახლიდან მოუწევთ ამის გაკეთება. დღეს საღამოს ისევ ძლიერი ქარი იყო. ფანჯრები დაამტვრია, სახურავი გადახადა, ღია ცის ქვეშ დავრჩით. წვიმს და წყალი ოთახებში ჩამოგვდის", - აღნიშნა სოფელ ჯოყოლოს ერთ-ერთმა მკვიდრმა.
ამასთან, ქარისგან გამოწვეული დაზიანებების გამო, უკვე 2 დღეა, პანკისის ხეობის სოფლებში მოსახლეობის ნაწილს ელექტროენერგია არ მიეწოდება.
ელექტრომომარაგებაში ხარვეზები გამოიწვია უამინდობამ დედოფლისწყაროშიც. როგორც სოფელ ოზაანის მაცხოვრებლები აცხადებენ, სოფელში ძლიერმა ქარმა ხეები წააქცია, რომლებიც ავტომობილებს დაეცა. მსხვერპლი არ არის, თუმცა, მეხრიშვილების უბანში დაზიანებულია რამდენიმე ავტომანქანა.
ოზაანის მკვიდრი ვასილ მეხრიშვილი ხელისუფლებისგან ზარალის ანაზღაურებას ითხოვს. "ეზოში დიდი კაკლის ხე მქონდა, რომლის ქვეშ მედგა "ფორდ ტრანზიტისა" და "ფიატის" მარკის ავტომობილები და ერთი ხელის მინი-ტრაქტორი. ძლიერი ქარის შედეგად ეს ხე მოტყდა, მანქანებს დაეცა და სამივე მათგანი დააზიანა. მივმართე დედოფლისწყაროს გამგეობას, საიდანაც შემოგვითვალეს, რომ კაკალიც თქვენი იყო, მანქანებიც თქვენია და ჩვენ არაფერი შეგვიძლიაო. დავრეკეთ უბნის რწმუნებულთან, რომელმაც პოლიციას მიმართა. იქ, თავის მხრივ, თქვეს, რომ ეს საკითხი მათ არ ეხებათ. ამის გამო, იძულებული ვარ, საჯარო განცხადება გავაკეთო", - განაცხადა ვასილ მეხრიშვილმა.
მისივე თქმით, ის უმუშევარია, ოჯახი მძიმე სოციალურ მდგომარეობაშია და ზარალის ანაზღაურებას ითხოვს. "მე არც მანქანებს, არც კაკალს, არაფერს ხელს არ ვახლებ, ერთი წელიწადიც რომ გავიდეს. ეს ყველაფერი იქნება კაკლის ხის ქვეშ მოყოლილი, სანამ ამ საკითხს ბოლომდე არ მივიყვან", - დასძინა დაზარალებულმა.
დედოფლისწყაროს გამგებლის მოვალეობის შემსრულებელი სოლომონ ღორაშვილი კი ამბობს, რომ სხვა სოფლებიდან არსებული დაზიანებების შესახებ გამგეობაში ინფორმაცია არ შემოსულა.
"მეც ეს ინფორმაცია მაქვს, სხვა დაზიანებებზე არავის უცნობებია," – აღნიშნავს გამგებლის მოვალეობის შემსრულებელი.
