24
მარტიდღის ზოგადი ასტროლოგიური პროგნოზი
"გზებს თუ არ მიხედეს, ცოტაც და, შევარდნაძის წლებში დავბრუნდებით... ისეთ დღეშია მანქანა, რომ თვეში ორჯერ "პროფილაქტიკაში" ვართ. საღამოს, სამსახურიდან წამოსული ადამიანები რომ მიაწყდებიან ხოლმე, მთელი ორი საათი ველოდები რიგს, მანქანა რომ შევაკეთო... ისედაც ხომ ვზარალდებით, მანქანები ლამის ნაწილ-ნაწილ იშლება და რამდენიმე საათი სამუშაო დროც გვეკარგება", - შემომჩივლა ერთ-ერთი სამარშრუტო ტაქსის მძღოლმა თამარაშვილის ქუჩის გავლისას...
ამ ქუჩით სიარული ყოველდღე მიწევს და უკმაყოფილო მგზავრების ბუზღუნმა, 9-წლიანი "ჰიტი" - "ასფალტი ვჭამოთ?!." - უკვე გადაფარა...
მძღოლების თქმით, ასფალტი გზებზე ზამთარში ამოიყარა, თუმცა კარგი მდგომარეობა არც შარშან ზაფხულს იყო. რამდენიმე ადგილას, იქ, სადაც ყვავილები იყიდება, გზები წარამარა ფუჭდება, რასაც მძღოლების თქმით, გავარვარებულ ასფალტზე ცივი წყლის დასხმა იწვევს. ასფალტს ჯერ ბზარები უჩნდება, შემდეგ კი - იყრება. გზების გაფუჭება ზამთრის ყინვებმა და გადაუღებელმა წვიმებმაც გამოიწვია...
თბილისის ქუჩებში არსებულ მდგომარეობას აპროტესტებენ ავტომანქანების მფლობელები. მათი თქმით, თუ პრობლემები უახლოეს ხანებში არ აღმოიფხვრა, შესაძლოა, მათ მერიას დაზიანებული მანქანების კომპენსაცია მოსთხოვონ...
მარიამ ჯაფარიძე, მძღოლი:
- თითქმის ყოველდღე რუსთავი-თბილისის ტრასის გავლა მიწევს და ამ ბოლო დროს, საკმაოდ მძიმე ვითარებაა. ზამთარში, ცუდი ამინდები რომ იყო და გადაუღებლად წვიმდა, უხარისხოდ "დაკერებული" ასფალტი თითქმის ყველგან ამოიყარა, რის გამოც, ზოგან იმხელა ღრმულები გაჩნდა, კარგად რომ ჩაიხედო, ამერიკას ან გრენლანდიას დაინახავ... ამას წინათ ვნახე, ერთი პატარა მანქანა ჩავარდნილა ორმოში, ისეთი ღრმა ორმო იყო, ერთი საბურავი ჩაჭედილი ჰქონდა. ხელით ასწიეს და გვერდზე გადადგეს.
- გზების ასეთი მდგომარეობა რამდენად აზიანებს ავტომანქანას?
- ძალიან აზიანებს. მეც "ჩავარტყი" ორმოში და საბურავის დისკი გაიბზარა... როგორც ხელოსანმა ამიხსნა, ჩემს ავტომანქანას უხარისხო დისკი რომ ჰქონოდა, შესაძლოა, გატეხილიყო. სახელოსნოში მისულს უამრავი ავტომანქანა დამხვდა. იქ მყოფთა უმეტესობას, უგზოობის გამო ჰქონდა მანქანა მოშლილი... რაც გზები გაფუჭდა, ვცდილობ, ისე ვატარო (ალბათ ყველა მძღოლი ასე იქცევა), რომ ორმოს ავარიდო, ზიგზაგებით სიარული მიწევს. ზოგჯერ საპირისპირო ზოლზე გადავსულვარ და ორმაგი ხაზი გადამიკვეთავს, რაც მოზრდილ ჯარიმას ითვალისწინებს ან კიდევ უცებ დამიმუხრუჭებია, ორმოზე უფრო "რბილად" რომ გადამევლო. ამ დროს კი შესაძლოა, უკან მომავალი მანქანა შემომასკდეს. ამ ყველაფერთან ერთად, მანქანაც იმტვრევა, მისი გაკეთება კი იაფი ნამდვილად არ ღირს. ამიტომ ვცდილობ, თავი ავარიდო, რის ფასად - სხვა საქმეა... კარგი იქნება, არსებობდეს კანონი, რომლის თანახმადაც შესაძლებლობა გექნება, უჩივლო იმ უწყებას, ვინც ვალდებულია, გზები შეაკეთოს. მაშინ უფრო მეტი პასუხისმგებლობით მოეკიდებოდნენ საქმეს, რადგან ავტომანქანის მათი მიზეზით დაზიანების შემთხვევაში, ვალდებული იქნებოდნენ, შეეკეთებინათ...
ირაკლი კაპანაძე, მძღოლი:
- ცენტრალურ ქუჩებზე მიწევს სიარული. ქავთარაძის ქუჩის ბოლოში ვცხოვრობ და საბურთალოს ქუჩაზე ვმუშაობ. ამ ბოლო დროს ისეთ დღეშია გზები, ვცდილობ, ყურადღებით და დაბალი სიჩქარით ვიარო, მაგრამ მაინც დავაზიანე ავტომანქანა. კარტოზიას ქუჩაზე ისეთი ორმოა, ოთხი მანქანა ერთმანეთის მიყოლებით ჩავარდა... ვაკეთებთო, მაგრამ არ დაადგა საშველი. არადა, იმ დღეს "პროფილაქტიკაში" რომ მივედი, ხელოსანმა მითხრა, - ერთი კვირა დამიტოვე, თავის მოსაფხანად არ მცალიაო. ისეთი სამსახური მაქვს, მანქანის გარეშე ხელფეხშეკრული ვარ. სახელმწიფო უნდა ზრუნავდეს თავის მოქალაქეებზე, პირიქით კი იქცევა და გულგრილი დამოკიდებულებით მაზარალებს...
ლევან ჩალაძე, ქალაქის კეთილმოწყობის სამსახურის უფროსის მოადგილე:
- მესმის მოსახლეობის აღშფოთება, ამიტომ პრობლემის მოგვარებაზე ინტენსიურად ვმუშაობთ. კომპანიამ, რომელიც ამაზე მუშაობს, ხელშეკრულება მთელ ქალაქზე გააფორმა და ორი კვირის განმავლობაში ყველა პრობლემა ეტაპობრივად უნდა მოაგვაროს. კეთილმოწყობის სამსახურმა შეადგინა ცხრილი, რომლის მიხედვითაც აქცენტი ცხელ წერტილებზე კეთდება. ცენტრალურ ქუჩებზე, სადაც ღრმულებისა და ორმოების პრობლემა იყო, რეაბილიტაცია მიმდინარეობს, ასფალტის ხელახალი საფარი დაიგო... იქ, სადაც სამუშაოები დარჩენილია, ღამე ვმუშაობთ, დღის განმავლობაში საცობი რომ არ წარმოიქმნას და ქალაქში მოძრაობა არ შეფერხდეს.
- პრობლემის მოგვარების ვადა 2 კვირაა?
- მერის მოვალეობის შემსრულებელმა განაცხადა, ნორმალური ამინდების შემთხვევაში, ერთი თვე გვჭირდება, პრობლემა მთლიანად რომ ამოვწუროთო. დაახლოებით ორი კვირა გავიდა (ინტერვიუ ჩაწერილია 24 მარტს. - ავტ.) და ვცდილობთ, დარჩენილ ორ კვირაში ჩავეტიოთ...
- ბევრმა აღნიშნა, რომ ასფალტის საფრის მალე გაფუჭება მისი უხარისხობით იყო გამოწვეული.
- არა, ვერ დავეთანხმები. ბოლო 3-4 წლის განმავლობაში დაგებულ გზებს ბუნებრივი მიზეზების გამო პრობლემა არ შეჰქმნია. სხვა დროს, გზების პერიოდული შეკეთება, ნებისმიერი ხარისხის ასფალტის შემთხვევაში აუცილებელია. ორმოების პრობლემების მოგვარებაზე 5 ორგანიზაცია მუშაობს. გარდა ამისა, ტენდერები გვაქვს გამოცხადებული. მასში გამარჯვებული კომპანიები კი ასფალტის საფრის შეცვლაზე ან ხელახლა დაგებაზე იმუშავებენ.
ლალი პაპასკირი
(გამოდის ხუთშაბათობით)
