23
მარტიდღის ზოგადი ასტროლოგიური პროგნოზი
შეიარაღებული ძალები დგას უფრო მაღლა, ვიდრე ნებისმიერი ჩვენგანის პიროვნება ან თუნდაც უსამართლოდ შექმნილი იურიდიული პრობლემები, - ამის შესახებ საქართველოს პრეზიდენტმა მიხეილ სააკაშვილმა თავდაცვის სამინისტროში , შეიარაღებული ძალების გაერთიანებული შტაბის ახალი უფროსის, ირაკლი ძნელაძის წარდგენისას განაცხადა. მისი თქმით, შეიარაღებული ძალების განვითარება არ შეჩერდება.
"შეიარაღებული ძალები დგას პოლიტიკური კონიუნქტურის მიღმა და დგას უფრო მაღლა, ვიდრე ნებისმიერი ჩვენგანის პიროვნება ან თუნდაც უსამართლოდ შექმნილი იურიდიული პრობლემები. ჩვენ ვერ გავაჩერებთ შეიარაღებული ძალების განვითარებას. თავდაცვის მინისტრთან ჩვენ გვქონდა კონსტრუქციული აზრთა გაცვლა ამ საკითხზე. თავდაცვის სამინისტროს ზუსტად იგივე შეხედულება აქვს, რომ ჩვენ უნდა გავაგრძელოთ გზა ნატო-ს მიმართულებით", - აღნიშნა პრეზიდენტმა.
კომენტარი საქართველოს თავდაცვის მინისტრმა ირაკლი ალასანიამაც გააკეთა და აღნიშნა, რომ მიუხედავად პრემიერ ბიძინა ივანიშვილის მთავრობის და ოპოზიციის განსხვავებული პოზიციებისა რიგ საკითხებზე, ქართული არმია, ქართული ჯარი არის ის, რასაც ორივე პოლიტიკური ძალა სიამაყით აფასებს.
"ჩვენ მას აუცილებლად ერთობლივად მოვუვლით. დარწმუნებული ვარ, რომ მომავალში, სწორედ იმ წარმატებაზე, რომელსაც 1-ელ ოქტომბერს ქართველმა ხალხმა მიაღწია და ჩვენ დავუმტკიცეთ ყველას, რომ ფუნდამენტურად დემოკრატიული საზოგადოება ვართ, ამ წარმატებაზე უნდა ავაშენოთ ძლიერი, გაერთიანებული სახელმწიფო და დავიმკვიდროთ ჩვენი ადგილი ევროატლანტიკურ ოჯახში", - განაცხადა ირაკლი ალასანიამ.
