2
მარტიდღის ზოგადი ასტროლოგიური პროგნოზი
აზერბაიჯანელი ჟურნალისტის აფგან სადიგოვის საექსტრადიციო პატიმრობა დამატებით, ისევ 3 თვით, 3 მაისამდე გაგრძელდა.
აღნიშნული გადაწყვეტილება თბილისის საქალაქო სასამართლოს მოსამართლემ, ლელა მარიდაშვილმა მიიღო. სხდომაზე პროკურატურა სადიგოვის მიმართ შეფარდებული საექსტრადიციო პატიმრობის ვადის კვლავ გაგრძელებას შუამდგომლობდა.
სახელმწიფო ბრალმდებელი, ნანიკო ზაზუნაშვილი განმარტავდა, რომ პროკურატურას მიზანშეწონილად მიაჩნია, სადიგოვის პატიმრობა დამატებით, 3 თვით გაგრძელდეს.
“დღევანდელი ჩვენი შუამდგომლობით მოთხოვნილი იყო საექსტრადიციო პატიმრობის ვადის 3 თვით გაგრძელება, ვინაიდან მოცემულ შემთხვევაში ყველა პროცედურა ამოწურული არ არის, რაც კანონმდებლობითაა გათვალისწინებული. კერძოდ, ამ შემთხვევაში, სასამართლოების მიერ დასაშვებად არის ცნობილი აფგან სადიგოვის ექსტრადიცია აზერბაიჯანის რესპუბლიკაში. თუმცა, საბოლოო გადაწყვეტილება საქართველოს კანონმდებლობით იუსტიციის მინისტრის მიერ მიიღება. ამჟამად, აღნიშნული გადაწყვეტილება მიღებული არ არის და გარდა ამისა, ვინაიდან ევროპული სასამართლოს მიერ დროებითი ღონისძიებაა გამოყენებული, შესაბამის ვადამდე პირის ექსტრადიცია შესაძლებელი არ არის.
3 მაისს ამოიწურება 9 თვიანი საპატიმრო ვადა, თუ მანამდე არ მოხდა საბოლოო გადაწყვეტილების - დადებითის, ან უარყოფითის მიღება, პირი ან უნდა გათავისუფლდეს, ან შეიცვალოს აღკვეთის ღონისძიება. ექსტრადიციის თაობაზე საბოლოო გადაწყვეტილება აღკვეთ ღონისძიებასთან მიბმული არ არის, შესაძლებელია პირის მიმართ სხვა ალტერნატიული ღონისძიება იყოს გამოყენებული და შემდეგ მოხდეს ექსტრადიციაზე გადაწყვეტილების მიღება. ექსტრადიციის შესახებ გადაწყვეტილების მიღება ვადაში შეზღუდული არ არის“, - განაცხადა ზაზუნაშვილმა “ინტერპრესნიუსთან“.
პროკურორის განცხადებით, ბრალდებულის მხრიდან მიმალვის რისკები მომატებულია.
აღნიშნულ შუამდგომლობას დაცვის მხარე არ დაეთანხმა. ადვოკატ ქეთი ჩუთლაშვილის განმარტებით, შუამდგომლობა დაუსაბუთებელია და მტკიცებულებები არ არის წარმოდგენილი.
“დღეს თბილისის საქალაქო სასამართლომ განიხილა აფგან სადიგოვის მიმართ საექსტრადიციო პატიმრობის 3 თვით გაგრძელების ვადა, ეს არის ბოლო შესაძლებლობა, როცა შეიძლება იყოს გაგრძელებული და გამოყენებული საექსტრადიციო პატიმრობა. ამის შემდეგ, ან უნდა გათავისუფლდეს პატიმრობიდან, ან მისთვის სხვა აღკვეთის ღონისძიების შერჩევა მოხდეს.
ჩვენ მიგვაჩნია, რომ პატიმრობის ძალაში დატოვების სამართლებრივი საფუძვლები არ არსებობდა. მნიშვნელოვანია ერთი გარემოება, რომელის სასამართლოს დღეს წარედგინა, ადამიანის უფლებათა ევროპულმა სასამართლომ აფგან სადიგოვის საქმეზე დროებითო ღონისძიება მიიღო, საქართველოს ხელისუფლებას 2025 წლის 4 მარტამდე აფგან სადიგოვის ექსტრადიცია აზერბაიჯანის რესპუბლიკაში აკრძალული აქვს. იმედი გვაქვს, რომ ადამიანის უფლებათა ევროპული სასამართლო გააგრძელებს დროებითი ღონისძიების გამოყენებას და საბოლოოდ საქართველოს აეკრძალება აფგან სადიგოვის აზერბაიჯანის რესპუბლიკაში ექსტრადიცია, ვინაიდან ევროპული სასამართლო ხედავს რისკებს, რომელიც აზერბაიჯანში ექსტრადირების შემთხვევაში ის დაექვემდებარება დევნას. ეს გადაწყვეტილება რამდენიმე ეტაპად იქნა მიღებული. თავდაპირველად, საქართველოს აკრძალული ქონდა სადიგოვის აზერბაიჯანისთვის გადაცემა თბილისის სააპელაციო სასამართლოს მიერ თავშესაფრის პროცედურებთან დაკავშირებით საბოლოო გადაწყვეტილების მიღებამდე. მას შემდეგ, რაც ეს გადაწყვეტილება ჩაგვბარდა, 28 იანვარს, ევროპულმა სასამართლომ 4 მარტამდე აუკრძალა საქართველოს სადიგოვის ექსტრადიცია“, - განაცხადა ჩუთლაშვილმა.
ადვოკატი შუამდგომლობდა სადიგოვის მიმართ შეფარდებული აღკვეთის ღონისძიება მსუბუქი აღკვეთის ღონისძიებით, 10 000-ლარიანი გირაოს სანაცვლოდ შეცვლილიყო.
ცნობისთვის, აზერბაიჯანელი ჟურნალისტი, აფგან სადიგოვი საქართველოში მიმდინარე წლის 3 აგვისტოს დააკავეს. მას თბილისის საქალაქო სასამართლოს გადაწყვეტილებით, კიდევ 3-თვიანი საექსტრადიციო პატიმრობა აქვს შეფარდებული. მას აზერბაიჯანში მიმდინარე გამოძიების საფუძველზე გამოძალვის ორ ეპიზოდს ედავებიან.
სადიგოვი 12 სექტემბრიდან შიმშილობს, აღნიშნულის დაწყების მიზეზი მიგრაციის დეპარტამენტისგან თავშესაფრის მიღებაზე უარია.
