რუსებმა უკრაინას “შაჰედის“ ტიპის უპილოტო საფრენი აპარატებით შეუტიეს - კიევში აფეთქებების ხმები ისმოდა: რა ხდება ამ დროისთვის ცნობილი

რუსულმა ძალებმა უკრაინას “შაჰედის“ ტიპის უპილოტო საფრენი აპარატებით შეუტიეს. ინფორმაციას უკრაინული მედია ქვეყნის შეიარაღებული ძალების საჰაერო ძალებზე დაყრდნობით ავრცელებს.

• საჰაერო ძალების ცნობით, დრონების ჯგუფი სუმის ოლქიდან პოლტავას ოლქისა და დასავლეთის მიმართულებებით გაფრინდა. დრონების რამდენიმე ჯგუფი დაფიქსირდა სუმის, ხარკოვის, ჩერნიგოვის, პოლტავას, დონეცკის, კიევის, ჟიტომირისა და ჩერკასის ოლქებში.

დრონებით თავდასხმის გამო დედაქალაქ კიევში საჰაერო თავდაცვის სისტემა ამოქმედდა და აფეთქებების ხმები ისმოდა. ნამსხვრევების ჩამოვარდნა რამდენიმე რაიონში დაფიქსირდა.

კიევის საქალაქო სამხედრო ადმინისტრაციის ხელმძღვანელმა, ტიმურ ტკაჩენკომ განაცხადა, რომ დარნიცკის რაიონში მდებარე კერძო სახლში ნამსხვრევების ჩამოვარდნის შედეგად ხანძარი გაჩნდა. მაშველებმა ცეცხლი ჩააქრეს, დაშავებულები არ არიან.

უკრაინის საჰაერო ძალების ცნობით, კიევის რეგიონში უპილოტო საფრენი აპარატის თავდასხმის შედეგად 1 ადამიანი დაიღუპა და 4 დაშავდა.

კერძოდ, ბროვარის რაიონში ნამსხვრევების ჩამოვარდნის გამო დაზიანდა სატვირთო მანქანა. 1999 წელს დაბადებული მძღოლი მიყენებული დაზიანებების შედეგად ადგილზე გარდაიცვალა.