ავტოკოლონა თბილისის შემოსასვლელთან, სტუდენტების და პროფესორ-მასწავლებლების საპროტესტო მსვლელობა და მზადება პარლამენტის დასკვნითი აქციისთვის: რა ხდება ქალაქში

თბილისში დაგეგმილ საპროტესტო აქციას რეგიონებიდან უერთდებიან.

“ერთიანობა ნაციონალური მოძრაობის“ პოლიტსაბჭოს თავმჯდომარის ლევან ხაბეიშვილის განცხადებით, დასავლეთიდან წამოსული მხარდამჭერები ჯერ რესპუბლიკის მოედანზე მივლენ, რის შემდეგაც საქართველოს პარლამენტთან გადაინაცვლებენ.

• “დასავლეთიდან საქართველოდან ათასობით ადამიანი გვიერთდება და მივდივართ რესპუბლიკის მოედანზე. ყველას მოვუწოდებ, დაღლის და სახლში ჯდომის დრო არ არის, გამოდით გარეთ!“, - განაცხადა ხაბეიშვილმა.

ამავე თემაზე საუბრისას, ხაბეიშვილმა განმარტა, რომ დასავლეთ და აღმოსავლეთ საქართველოდან მათ ათასობით მოქალაქე უერთდება.

“აღმოსავლეთ საქართველოდანაც არის კოლონები, ათასობით ადამიანი მოდის. დასავლეთ საქართველოდანაც ათასობით ადამიანი გვიერთდება, ფაქტობრივად კილომეტრიანი კოლონებია. დღეს და ხვალაც პროტესტი იქნება და დარწმუნებული ვარ რომ ამ პროტესტში ხალხი გაიმარჯვებს“, - განაცხადა ხაბეიშვილმა.

ამავდროულად მსვლელობა იმართება თბილისის ქუჩებში. სტუდენტები და პროფესორ-მასწავლებლები 26 ოქტომბრის არჩევნების შედეგებს არ აღიარებენ და ხელახალი არჩევნების დანიშვნას მოითხოვენ. მათ სხვადასხვა შინაარსის საპროტესტო ბანერები აქვთ გაშლილი.

მათი განცხადებით, “ქართული ოცნების“ ხელისუფლების პირობებში, საფრთხე ექმნება, მათ შორის განათლების სფეროს. როგორც აქციის მონაწილეები აცხადებენ, დღეს საფრთხეშია საქართველოს ევროპული მომავალი და ევროპული განათლება.

• 21:00 საათზე საქართველოს პარლამენტთან დიდი აქცია იგეგმება. გიორგი ვაშაძის განცხადებით, იგეგმება კარვების გაშლა და ღამის გათენება.

საავტომობილო კოლონები თბილისის ქუჩებში მთელი დღის განმავლობაში მოძრაობდნენ. ისინი საზოგადოებას აქციაზე გასვლისკენ და აქტიურობისკენ მოუწოდებდნენ.

გარდა ამისა, თბილისში, 15:00 საათზე გაიმართა “ქალთა მარში“. საპროტესტო აქციის მონაწილეებმა მსვლელობა ბიძინა ივანიშვილის სახლთან დაასრულეს და “ქართული ოცნების“ საპატიო თავმჯდომარეს ქვეყნის დატოვებისკენ მოუწოდეს.

იხილეთ ასევე:

• კადრები ბიძინა ივანიშვილის სახლის მიმდებარე ტერიტორიიდან, სადაც ქალთა მარშის მონაწილეები ჩემოდნებს ტოვებენ და სკანდირებენ: „წადი“
• თბილისში სტუდენტები და პროფესორ-მასწავლებლები საპროტესტო მსვლელობას მართავენ - რა ხდება ამ წუთებში თსუ-სთან
• “ათასობით ადამიანი გვიერთდება, ყველას მოვუწოდებ: დაღლის და სახლში ჯდომის დრო არ არის, გამოდით გარეთ!“ - ლევან ხაბეიშვილი