ვინ არის მსოფლიოში ყველაზე მდიდარი ქალი, რომელსაც ვერცერთ ელიტარულ წვეულებაზე ვერ ნახავთ
L'Oreal-ის დამფუძნებლის შვილიშვილმა ფრანსუაზა ბეტანკურტ მაიერსმა 26 სექტემბერს მსოფლიოში უმდიდრესი ქალის სტატუსი დაიბრუნა და უმდიდრესი ქალების რეიტინგში კვლავ პირველ ადგილზეა.
მას ხანმოკლე პერიოდით Topline Walmart-ის მემკვიდრე ალისა უოლტონი უსწრებდა.
- ფრანსუაზა ბეტანკურ მაიერსის რეიტინგში კვლავ ლიდერობა L'Oreal-ის აქციების ფასის ზრდას დაემთხვა. მისი ქონების სავარაუდო ღირებულება მიმდინარე კვირაში $93.1 მილიარდამდე გაიზარდა, ხოლო უოლტონის ქონება $90.4 მილიარდამდე დაეცა.
მაიერსის ქონების 5,5 მილიარდი დოლარით ზრდა L'Oreal-ის აქციების მკვეთრს ზრდას მოჰყვა, როცა ხუთშაბათს ბრენდის აქციები 7%-ით გაძვირდა. L'Oreal-ის აქციების ფასის ზრდა ჩინეთითაა განპირობებული, რომელიც ბრენდისთვის სიდიდით მეორე ბაზარია.
L'Oréal-ის დამფუძნებლის, ეჟენ შუელერის შვილიშვილი (თმის საღებავების გამომგონებელი) და კომპანიის საბჭოს წევრი 1997 წლიდან არის, ბეტანკურ-მაიერსის სახელი მილიარდერთა სიაში 2018 წელს, დედის, ლილიან ბეტანკურის გარდაცვალების შემდეგ მოხვდა.
ბიოგრაფია
ფრანსუაზა ბეტანკურ-მაიერსი დაიბადა 1953 წლის 10 ივლისს. ის არის ფრანგი ბიზნესმენი, ქველმოქმედი, მწერალი და ახლა უკვე ყველაზე მდიდარი ქალი მსოფლიოში.
მკაცრ ოჯახში გაზრდილმა ფრანსუაზამ კერძო კათოლიკურ სკოლაში მიიღო განათლება, სამეცნიერო ხარისხი კი ქრისტიანებისა და ებრაელების საერთაშორისო ურთიერთობაზე დაიცვა. თუმცა, ფუნდამენტური სამეცნიერო კვლევები, რომლითაც ფრანსუაზა ინტერესდებოდა ახალგაზრდობაში, აბსოლუტურად მიუღებელი და უსარგებლო აღმოჩნდა დედამისისთვის, ვისთვისაც ბევრად მნიშვნელოვანი იყო ელიტარულ საზოგადოებაში ძვირადღირებული სამოსითა და სამკაულით თავის მოწონება.
იგი დაქორწინდა ჟან-პიერ მაიერსზე, ბიზნესის აღმასრულებელ და ოსვენციმში მოკლული რაბინის შვილიშვილზე. მათ ორი შვილი ჰყავთ. ცნობისათვის, ბეტანკურ-მეიერსი და მისი ოჯახი კომპანიის 33%-იან წილს ფლობენ.
პარიზის ღვთისმშობლის ტაძრის ხანძრით დაზიანების შემდეგ, ბეტანკურ-მეიერსმა მის შესაკეთებლად 226 მილიონი დოლარის გაღების შესახებ განაცხადა. ამჟამად, 70 წლის ფრანსუაზა L'Oréal-ის ვიცე-პრეზიდენტია. მისი ვაჟები, ჟან-ვიქტორ მეიერსი და ნიკოლას მეიერსი კი რეჟისორები არიან.
ბეტანკურ-მეიერსი არასოდეს ახდენს პირადი და სოციალური ცხოვრების აფიშირებას, არ ესწრება ელიტარულ წვეულებებს, რომლებიც მდიდრებისთვის იმართება, არამედ დროის გატარებას წიგნებთან და საყვარელ ფორტეპიანოსთან ამჯობინებს, რომელსაც ტრადიციულად, დღეში რამდენიმე საათს უთმობს.
რაც შეეხება წიგნებს, ფრანსუაზას ეკუთვნის ორი წიგნი - ბიბლიის ხუთტომეული და ბერძენი ღმერთების გენეოლოგია.
L'Oréal-ი
L'Oréal-ის მოგება წლიდან წლამდე იზრდებოდა პანდემიამდე. თუმცა, პანდემიის წლები არც ბრენდისთვის აღმოჩნდა გამონაკლისი - სახლში გამოკეტილი ადამიანები ნაკლებად მოიხმარდნენ მაკიაჟს და ამან თავისებური გავლენა იქონია.
თუმცა, პანდემიის დასასრულს სწრაფი აღმავლობა მოჰყვა - ბრენდის მომხმარებლებმა ერთიორად გაზარდეს ხარჯები ფუფუნების პროდუქტებზე და უკვე 2023 წელს, კომპანიის აქციების ფასი 35%-ით გაიზარდა.
Consumer Edge Research-ის ანალიტიკოსის, ბრეტ კუპერის თქმით, 2024 წელს კომპანიის აქციები შესაძლოა, კიდევ 12%-ით გაიზარდოს.
ბეტანკურ მეიერსი ასევე თავმჯდომარეობს მისი ოჯახის ჰოლდინგ კომპანიას, Téthys-ს, რომელსაც აქვს L'Oréal-ის აქციები. მისი ქმარი, ჟან-პიერ მეიერსი კომპანიის აღმასრულებელი დირექტორია. 2016 წელს ორივემ დააარსა შვილობილი კომპანია Téthys Invest SAS, რომელიც ფსონებს დებს ისეთ სფეროებზე, რომლებიც კომპანიას არ ეჯიბრება.
"L'Oreal-ის გიგანტური იმპერიის მფლობელი ფრანსუაზა ბეტანკურ-მაიერსი ყოველთვის იზოლირებული, თითქოს საკუთარ ჭუპრში ცხოვრობს და უზარმაზარი პასუხისმგებლობის მიუხედავად, მაინც არასდროს ინტერესდება სამყაროში მიმდინარე მოვლენებით“ - ასე დაახასიათა მწერალმა ტომ სენქტონმა ფრანსუაზა.
დღესდღეობით L'Oreal მეორე კომპანიაა საფრანგეთში თავისი მასშტაბით. იგი მხოლოდ ნავთობის გიგანტს Total Fina Elf-ს ჩამორჩება.
სწორედ L'Oreal-ს ეკუთვნის ყველაზე პოპულარული და გაყიდვადი კოსმეტიკური პროდუქცია, ხოლო კომპანიის დასაქმებული ადამიანების ჯამური ოდენობა მთელს მსოფლიოში 88 ათასს აჭარბებს.
ავტორი: ეკა დარჩიაშვილი