25 წლის ებრაელი ქალის წინაშე "ჰამასიც" კი უძლური აღმოჩნდა: როგორ იხსნა ინბარ ლიბერმანმა ტერორისტებისგან კიბუცი - "5 შეიარაღებულ ტერორისტს მარტო გაუმკლავდა"

25 წლის ებრაელ ქალთან "ჰამასიც" კი უძლური აღმოჩნდა. გოგონამ მთელი კიბუცი (სასოფლო-სამეურნეო კომუნა ისრაელში) გადაარჩინა, როცა ის ადგილობრივების ჯგუფს წინ გაუძღვა და მათ ოცზე მეტი მოწინავე ტერორისტი მოკლეს. მათ შორის 5 შეიარაღებულ ტერორისტს გოგონა მარტო გაუმკლავდა.

ინბარ ლიბერმანი ნირ-ამის კიბუცის უსაფრთხოების კოორდინატორი 2022 წლის დეკემბრიდანაა. როცა მან შაბათს აფეთქებების ხმა გაიგო, მიხვდა, რომ ეს, ღაზას სექტორთან მდებარე კიბუცზე ჩვეულებრივი სარაკეტო თავდასხმებისგან განსხვავდებოდა. ლიბერმანი სასწრაფოდ მოემზადა, 12-კაციან უსაფრთხოების ჯგუფს იარაღი ჩამოურიგა და მათ საპასუხო შეტევას კოორდინაცია გაუწია.

ინბარ ლიბერმანმა დანაყოფი, დასახლების გასწვრივ, სტრატეგიულ პოზიციებზე განათავსა. როცა ჩასაფრებული დანაყოფი შეიარაღებულ თავდამსხმელს მოულოდნელად დაესხა თავს, მათ რეაგირება ვერ მოასწრეს და ლიბერმანის დანაყოფმა ისინი მისიის დროს დახოცა. ინბარმა, დამოუკიდებლად, 5 ტერორისტი მოკლა, დანარჩენებმა კი, ოთხ საათში, 20 მათგანის დახვრეტა მოასწრეს. მათი წყალობით, "ჰამასისთვის" ნირ-ამი აუღებელი ციხე-სიმაგრე გახდა.

ილიტ პაზმა, ნირ ამის კულტურულმა კოორდინატორმა, ახალი ამბების გამოცემა Israel Hayom-ს განუცხადა: "ეს გასაოცარი იყო. ჩემი ქმარი სათადარიგო დანაყოფში განათავსეს, რადგან ისინი მეტი მსხვერპლის თავიდან აცილებას ცდილობდნენ. ინბარმა გადაწყვეტილება მიიღო, რომ ტერორისტებს ოპერატიულად დასხმოდა თავს და სწორედ ამის დამსახურებაა ის, რომ ათობით მსხვერპლი აიცილეს თავიდან."

სოციალურ მედიაში პოსტი გამოქვეყნდა, რომელიც ინბარ ლიბერმანის გმირულ საქციელს ადიდებდა: "როცა ყველაფერი დასრულდება, ეს ქალი ისრაელის ჯილდოს მიიღებს. მისი გმირობის ისტორია ქვეყნის მომავალ თაობებსაც ემახსოვრება. ინბარის დამსახურებაა, რომ მთელ მიმდებარე ტერიტორიაზე ნირ ამის კიბუცი ერთადერთია, რომელიც უვნებელი რჩება",- წერია პოსტში.

ისრაელში, ბოლო მონაცემებით, 900 ადამიანი დაიღუპა და 2600 დაშავდა.

წყარო: nypost

მოამზადა: ანა სიბოშვილმა