"ეს ჩემს ცხოვრებაში ყველაზე უბედური პერიოდი იყო" - ვიქტორია ბექჰემი დევიდის ღალატის შესახებ ალაპარაკდა

ვიქტორია ბექჰემი მისი მეუღლის ღალატის სკანდალზე საჯაროდ პირველად ალაპარაკდა.

ჭორები 2003 წელს, მას შემდეგ გავრცელდა, რაც დევიდის პერსონალური ასისტენტი, რებეკა გამოვიდა და ფეხბურთელთან რომანზე ილაპარაკა. მას მოგვიანებით მეორე ქალიც მოჰყვა, რომელიც ირწმუნებოდა, რომ ფეხბურთელს 1 წლის განმავლობაში ხვდებოდა. დევიდის ორივე რომანი ფეხბურთელის ესპანეთში ცხოვრების პერიოდში გამჟღავნდა.

"ეს ჩემს ცხოვრებაში ყველაზე უბედური პერიოდი იყო", - აცხადებს ვიქტორია Netflix-ის დოკუმენტურ სერიალში "Beckham", რომლის პრემიერა 4 ოქტომბერს შედგა. ვიქტორიას თქმით, მეუღლის ღალატით ძალიან იყო განაწყენებული და მასზე ბრაზობდა.

Spice Girls-ის ყოფილი წევრი სერიალის პროდიუსერებს უმხელს, რომ მან ტრავმაზე ხმამაღლა მხოლოდ იმიტომ არ ისაუბრა, რომ ქმრის საფეხბურთო კარიერა არ გაენადგურებინა.

"ეს იმას არ ნიშნავს, რომ არავინ მისმენდა, უბრალოდ, ყოველთვის ყურადღებას ვაქცევდი მის საჭიროებებს", - დასძენს ვიქტორია.

მან ბექჰემზე 1999 წლის ივლისში იქორწინა. 2003 წელს დევიდი "რეალ მადრიდში" სათამაშოდ, ესპანეთში გადავიდა საცხოვრებლად, ვიქტორია კი თავის შვილებთან - ბრუკლინთან და რომეოსთან ერთად დიდ ბრიტანეთში დარჩა.

წყვილი ოთხნაწილიან დოკუმენტურ სერიალში არ ასახელებს იმ ქალების სახელებს, ვისთანაც დევიდს რომანი ჰქონდა, თუმცა მათი ვინაობა მკითხველისთვის ისედაც ცნობილია. 2003 წელს რებეკა ლუსი და სარა მარბეკი ირწმუნებოდნენ, რომ მათ ფეხბურთელთან მცირეხნიანი რომანები ჰქონდათ. მალაიზიელი წარმოშობის სარა მარბეკი აცხადებდა, რომ დაოჯახებულ ფეხბურთელს 2 წლის განმავლობაში ესაუბრებოდა და რამდენჯერმე შეხვდა კიდეც. რაც შეეხება რებეკას, ის ბექჰემის პერსონალურ ასისტენტად მუშაობდა და პირველი იყო, ვინც ფეხბურთელი ღალატში ამხილა.

ჭორების გავრცელებიდან მალევე, ვიქტორიაც ესპანეთში გადავიდა საცხოვრებლად.

"ეს ურთულესი პერიოდი იყო და ისეთი გრძნობა მქონდა, რომ მთელი სამყარო ჩვენს წინააღმდეგ იყო გაერთიანებული. გულწრფელად რომ ვთქვა, მე და დევიდიც ერთმანეთის წინააღმდეგ ვიყავით", - გამოტყდა ვიქტორია.

დიზაინერმა იმაზეც ისაუბრა, თუ როგორ იმოქმედა სკანდალმა მათ ქორწინებაზე:

"მადრიდამდე ერთიანი გუნდი ვიყავით. მართალია, ყველა ჩვენს წიანააღმდეგ იყო, მაგრამ მთავარია, რომ ერთად ვიყავით და ერთმანეთის იმედი გვქონდა. ესპანეთში ჩასვლის შემდეგ კი, თითქოს ერთმანეთს დავშორდით და გვერდში არავინ გვყავდა. ეს ძალიან სევდიანია, ვერც კი აღვწერ რა რთული იყო და როგორ იმოქმედა ამან ჩემზე".

მეუღლის მსგავსად, დევიდისთვისაც ემოციურია ამ პერიოდის გახსენება. ვეტერანი ფეხბურთელი გამოტყდა, რომ ჭორების გავრცელების შემდეგ, მისი ფიზიკური მდგომარეობაც უკან-უკან წავიდა და ფეხბურთის თამაშიც უჭირდა:

"არც კი ვიცი, ამდენ რამეს როგორ გავუმკლავდით. ვიქტორია ჩემთვის ყველაფერია და როცა მას ასეთ განაწყენებულს ვხედავდი, ჩემთვისაც ძალიან ძნელი იყო. მაგრამ ორივე მებრძოლები ვართ, ერთმანეთისთვის და ჩვენი ოჯახისთვის უნდა გვებრძოლა. ყველაფერი რაც გაგვაჩნია, ბრძოლად ღირდა..."

მიუხედავად ყველაფრისა, დევიდი და ვიქტორია სირთულეებს გაუმკლავდნენ. ვიქტორიას ესპანეთში გადასვლიდან 1 წლის შემდეგ, მათ მესამე ვაჟი კრუზი შეეძინათ, 2011 წელს კი მეოთხე შვილი - გოგონა, რომელსაც ჰარპერი.

წყარო: pagesix

მოამზადა: ანა სიბოშვილმა