როდიდან იგეგმება "ჩემი ცოლის დაქალების" ეთერში დაბრუნება - რას ამბობს სერიალის პროდიუსერი გეგმებზე?
პოპულარული სერიალი "ჩემი ცოლის დაქალები" მალე მაყურებელს დაუბრუნდება. ამის შესახებ „ტელეკომპანია „ფორმულას“ ეთერში არხის დირქტორმა ზუკა გუმბარიძემ განაცხადა.
AMBEBI.GE სერიალის პროდიუსერს ირაკლი საღინაძეს დაუკავშირდა:
- კი, გადაწყვეტილება მივიღეთ, სერიალი აღვადგინოთ და მუშაობას ვიწყებთ იმისთვის, რომ "ჩემი ცოლის დაქალები" მაყურებელს დაუბრუნდეს. ამდენი ხანი პაუზა რომ იყო, ახლა ყველაფერი თავიდან არის ასაწყობი და გასაკეთებელი. ვინ სად არის, როგორ არის, - ეს ყველაფრი მოსაკითხია. მოკლედ, მუშაობას ვიწყებთ.
- გაქვთ მონახაზი, შინაარსობრივ ნაწილში რა მიმართულებას აირჩევთ?
- გადაწყვეტილება გუშინ მივიღეთ. ამიტომ შინაარსობრივ ნაწილში რა და როგორ იქნება, ჯერჯერობით არაფერი გვაქვს, მაგრამ რაღაც სიახლეები აუცილებლად იქნება. მეტი სხვა სათქმელი არ მაქვს.
- თქვენი გადაწყვეტილება სისრულეში რამდენ ხანში მოვა?
- ზუსტი პასუხი ძნელია, მაგრამ გეგმა ასეთია, რომ სადღაც 1-ელი ივლისისთვის ეთერში გასვლა მოვახერხოთ. ხომ ვამბობ, ყველაფერი თავიდან არის დასაწყები. მსახიობებს უნდა შევეხმიანოთ, ტექნიკური ნაწილიც გასაახლებელია, ყველაფერი, თავიდან ასამუშავებელი გვაქვს. ცხადია, ამ ყველაფერს დრო სჭირდება.
- ცნობილია, რომ პროექტი წინა სეზონზე იმის გამო შეწყდა, რომ მისთვის საჭირო ფინანსები არ არსებობდა. გარკვეული კრიზისი იყო...
- მოგეხსენებათ, საკმაოდ ძვირი პროექტია... სამწუხაროდ ქართული მედია პოლიტიკურ პროცესზეა მიბმული. ამიტომ ამხელა თანხის მობილიზება ასეთ პირობებში რთული აღმოჩნდა. თან, ჩვენი პაუზაც განპირობებული იყო იმით, რომ გარდა ფინანსური საკითხისა, ზოგადად იმდენად გაურკვეველი ვითარება იყო, რომ რაღაც რისკებზე წასვლას მოვერიდეთ. ახლა გადავწყვიტეთ მაქსიმალური მობილიზებით, მათ შორის, თანხების და ყველაფრის, პროექტი აღვადგინოთ, რადგანაც ბაზარზე ამის დიდი მოთხოვნაა. არსებობს გარკვეული პაუზის ხანგრძლივობა, რომლის მერეც ძალიან ძნელია, რაღაც აღადგინო. უკვე ისეთი კრიტიკული ფაზაა, თუ დროზე არ დავძარით, მერე უკვე ძალიან გაგვიჭირდება.
- თუმცა ამ პაუზის პერიოდში ''ხელოვნური სუნთქვა'' გადაიღეთ...
- კი, „კავეას“ შეკვეთა შევასრულეთ - სერიალი „ხელოვნური სუნთქვა“ გადავიღეთ. ეს სეზონი დასრულდა. მისი მორიგი სეზონი დამოკიდებულია იმაზე, თუ კიდევ შეგვიკეთავენ, ეს უკვე მათი საქმეა.
- მეც ერთ რიგით მაყურებელს ძალიან დამაკლდა "ჩემი ცოლის დაქალები"...
- ჩვენც ძალიან მოგვენატრა მასზე მუშაობა... მთელი ქვეყანაც ზოგადი სიტუაციის გამო ძალიან დეპრესიულ რუტინაში შევედით...