რუსეთის "ეფესბე" აცხადებს, რომ ომის მომხრე ბლოგერ ტატარსკის მკვლელობა უკრაინის მოქალაქე იური დენისოვმა დაგეგმა: "მან ტრეპოვას გაუგზავნა ბიუსტი"

რუსეთის უშიშროების ფედერალურმა სამსახურმა (FSB) განაცხადა, რომ დაადგენლია ომის მომხრე რუსი ბლოგერის, ვლადლენ ტატარსკის მკვლელობაში მეორე ეჭვმიტანიის ვინაობა.

უწყების თანახმად, უკრაინის მოქალაქე, 35 წლის იური დენისოვი ტატარსკის უთვალთვალებდა და ის ასაფეთქებელი მოწყობილობა, რომელიც მკვლელობის ჩადენისთვის იყო გამოყენებული დარია ტრეპოვას, მან გაუგზავნა. FSB-ს ცნობით, დენისოვმა და დარია ტრეპოვამ, ტატრსკის აფეთქება ერთობლივად დაგეგმეს. ტრეპოვამ ბიუსტი 2 აპრილს მიიტანა პეტერბურგის ერთ-ერთ კაფეში, სადაც ტატარსკის მონაწილეობით ღონისძიება მიმდინარეობდა და უშუალოდ ხელში მიაწოდა ბლოგერს, რის შემდეგაც ბიუსტი აფეთქდა.

"1987 წელს დაბადებულმა დენისოვმა მოსკოვში შუამავლის მეშვეობით "ექსპრეს მიწოდებით“ გაუგზავნა ასაფეთქებელი მოწყობილობა, რომელიც შენიღბული იყო სამხედრო კორესპონდენტის თაბაშირის ბიუსტის სახით“, - აცხადებენ FSB-ში.

მათივე ვარაუდით, დენისოვი კიევიდან ლატვიის გავლით მოსკოვში გაემგზავრა თებერვალში, სადაც შემდგომში მან შეაგროვა ინფორმაცია ტატარსკის "ცხოვრების წესსა და ადგილებზე“, სადაც ხშირად სტუმრობდა. FSB-ის ცნობით, მკვლელობის მომდევნო დღეს, დენისოვი სომხეთის გავლით თურქეთში გაიქცა.