"მე გუშინ ვუყურე ჩვეულებრივ ოლიგარქს" - თინა ხიდაშელი დავით კეზერაშვილზე
"ვერ მივხვდი საერთოდ, რა ამოცანა ჰქონდა ინტერვიუს, სავარაუდოდ იყო მცდელობა, დაეწყოთ მისი გარეცხვა, სინამდვილეში, მან ვერც გუშინ თქვა სათქმელი", - ასე აფასებს "პალიტრანიუსის“ გადაცემა "360 გრადუსში“ ყოფილი თავდაცვის მინისტრი, თინა ხიდაშელი ასევე ყოფილი თავდაცვის მინისტრის, დავით კეზერაშვილის ინტერვიუს.
თინა ხიდაშელის განცხადებით, დავით კეზერაშვილი როგორც ჩანს, "ინტელექტთან მწყრალადაა“, რადგან ჰგონია, რომ ვინმე დაიჯერებს, რომ მან თავდაცვის მინისტრობის და ფინანსური პოლიციის უფროსობის დროს მიღებული გამოცდილებით ბიზნესი ააწყო.
"როგორც ჩანს, ინტელექტთან მწყრალად ვართ, რადგან თქვა: 21 წლის ვიყავი მიშასთან ერთად რომ დავიწყე ბრძოლა. კი ბატონო, მეც ვადასტურებ, მახსოვს, მაშინ, იმ მოძრაობაში ყველა პატარა ვიყავით, ასე იყო ნამდვილად, ეს ნაწილი შეიძლება ბევრმა ადამიანმა დაადასტუროს, მაგრამ მერე "24 წლის ვიყავი, როცა ფინანსური პოლიციის უფროსი გავხდი, მერე იქიდან თავდაცვის მინისტრი გახდი და მერე თავდაცვის მინისტრობის და ფინანსური პოლიციის უფროსობის დროს რომ გამოცდილება შევიძინე და ამბები გავიგე იმითი ბიზნესი ავაწყვე“...რადგან დიდი ხანია ამ ქვეყანაში აღარ ცხოვრობს, თვითონ შეიძლება ასცდა იმას, სანამდე წავიდა წინ საზოგადოება, რამდენი ინფორმაცია აქვს, როგორ განვითარდა, მაგრამ ხალხმა, ვისაც მასთან ურთიერთობა აქვს, მაინც ხომ იცის, რომ ასეთი ამბები აღარ იყიდება საქართველოში - რომ 21 წლის პოლიტიკურ ცხოვრებას იწყებ, ერთი დღე ბიზნესი არ გქონია, პოლიტიკიდან მიდიხარ წლების შემდეგ და "ლუკოილის" წილის 50%-ის პატრონი ხდები. შეიძლება არიან ადამიანები, ვისაც ამ ზღაპრების სჯერა, მაგრამ იმედია ცოტა“, - განაცხადა თინა ხიდაშელმა.
თინა ხიდაშელის თქმით, მან გუშინ "ოლიგარქს უყურა“.
"მე ვუყურე გუშინ ჩვეულებრივ ოლიგარქს, რომელსაც აქვს განცდა და მან ეს რამდენჯერმე თქვა პირდაპირ, რომ "ძალიან ცუდია, მარტო მე ვარ, ვისაც ფული აქვს“. 2011 წელს ზუსტად ეს ეწერა ბიძინა ივანიშვილის იმ ცნობილ წერილში. დღეს ამ კაცს რომ ვუყურებდი, ეს იყო კაცი, რომელიც ჩაცინებებით გველაპარაკებოდა და გვეუბნებოდა, რომ ის არის ერთადერთი, არავის არ ეძებს, გვითხრა, რომ მას ადამიანები არ აინტერესებს, ვინმე თუ მათხოვრად მომადგება, აუცილებლად დავეხმარებიო. ივანიშვილს სხვათა შორის ეს არ უთქვამს, ივანიშვილმა ხალხს დაუძახა“, - განაცხადა თინა ხიდაშელმა.