პროკურორის განცხადებით, ალეკ ბოლდუინი იარაღის გამოყენების სწავლის დროს ტელეფონზე საუბრობდა - მსახიობს 18-თვიანი პატიმრობა ემუქრება
მსახიობ ალეკ ბოლდუინს გადასაღებ მოედანზე 42 წლის ოპერატორის, ჰალინა ჰატჩინსის დაღუპვის საქმესთან დაკავშირებით არაგანზრახ მკვლელობისთვის წაუყენეს ბრალი.
სანტა ფეს რაიონულმა პროკურატურამ მსახიობი "არაერთ შემთხვევაში გამოვლენილ უკიდურესად უგუნურ ქმედებებში“ დაადანაშაულა. პროკურორების თქმით, იმ დროს, როცა Rust-ის გადასაღებ მოედანზე ცეცხლსასროლი იარაღის წვრთნებს გადიოდნენ, მსახიობი "ტელეფონზე საუბარში იყო გართული".
ჰატჩინსის არაგანზრახ მკვლელობაში წაუყენეს ბრალი ასევე იარაღის სპეციალისტს, ჰანა გუტიერესს, რომელიც ფილმის გადაღებების დროს 24 წლის იყო.
მოხსენების მიხედვით, სწორედ იმ დროს, როცა ბოლდუინს იარაღის სწორ გამოყენებას ასწავლიდნენ, ის ოჯახის წევრებს ესაუბრებოდა ტელეფონით. "მსახიობს იარაღის სპეციალისტ ჰანა გუტიერესთან სავალდებულო შემოწმებები რომ გაევლო და იარაღი ჰატჩინსისკენ არ მიემართა, ეს ტრაგედია არ მოხდებოდა“, - წერს გამომძიებელი.
ბოლდუინისადმი ბრალის წაყენების დოკუმენტში რამდენიმე გაუფრთხილებელი ქმედებაა ჩამოთვლილი, რამაც საბოლოოდ, ადამიანის მკვლელობა გამოიწვია:
- მან დაუგეგმავი რეპეტიციის დროს არ გამოიყენა ცეცხლსასროლი იარაღის ასლი
- იარაღის სპეციალისტი გადასაღები მოედნიდან გაუშვეს, რაც პროტოკოლს ეწინააღმდეგება
- იარაღის მხოლოდ სპეციალისტისგან მიღების პრაქტიკიდან გადახვევა
- გადასაღებ მოედანზე უსაფრთხოების შესახებ საჩივრების გაუთვალისწინებლობა
- ადეკვატური სერტიფიკატის გარეშე დაქირავებულ იარაღის სპეციალისტთან უსაფრთხოების შემოწმებების უგულვებელყოფა
თუ სასამართლომ მსახიობი და იარაღის სპეციალისტი დამნაშავედ სცნო, მათ 18-თვიანი პატიმრობა და 5 000 დოლარის ოდენობის ჯარიმა დაემუქრებათ.
შეგახსენებთ, გასული წლის ოქტომბერში ქალაქ სანტა-ფეში, ვესტერნ Rust-ის გადასაღებ მოედანზე ალეკ ბოლდუინის მიერ ცეცხლსასროლი იარაღიდან გასროლის შედეგად 42 წლის ოპერატორი დაიღუპა, რეჟისორი კი - დაიჭრა.
წყარო: bbc
მოამზადა: ანა სიბოშვილმა