მნიშვნელოვანი ინფორმაცია
21
მარტიდღის ზოგადი ასტროლოგიური პროგნოზი
პარასკევი, მთვარის ოცდამეორე დღე დაიწყება 03:43-ზე, მთვარე მშვილდოსანშია
არ წამოიწყოთ ახალი საქმეები. ყოველდღიური საქმეებით შემოიფარგლეთ. ნუ მიიღებთ მნიშვნელოვან გადაწყვეტილებებს. ვაჭრობისთვის არახელსაყრელი დღეა. მოერიდეთ საქმეების, ურთიერთობების გარჩევას. აკონტროლეთ ემოციები. კარგი დღეა შემოქმედებითი საქმიანობისთვის. ცოდნის მისაღებად, გამოცდის ჩასაბარებლად. ცუდი დღეა საქმიანობის, სამსახურის შესაცვლელად. უფროსთან ურთიერთობა კარგს არაფერს მოგიტანთ. გახსოვდეთ, რომ ამ დღეს ადამიანები უფრო მეტ დაპირებას იძლევიან, ვიდრე სინამდვილეში გაგიკეთებენ. მეტად დაისვენეთ, ივარჯიშეთ, მაგრამ მკვეთრ ილეთებს მოერიდეთ. შეასრულეთ საოჯახო საქმეები. არ გადაუსხათ სხვას სისხლი და პირიქით. ჯანმრთელობის გაუმჯობესების მიზნით კარგ შედეგს მოგიტანთ: სირბილი, ველოსიპედი, სწრაფი სიარული. არ გადატვირთოთ კუჭი. მოერიდეთ ცხიმიან საკვებს.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
"ვინმე ოთარ ჯირკვალიშვილს დაუწერია კონსტანტინეზე - "დიდოსტატი" დაუყოვნებლივ ამოიღეთ სასწავლო პროგრამიდანო“ - რას წერს კონსტანტინე გამსახურდია და რას პასუხობს მას ოთარ ჯირკვალიშვილი?
13:02 / 12-08-2022
კონსტანტინე გამსახურდია სოციალურ ქსელში წერს, რომ ოთარ ჯირკვალიშვილი სასწავლო პროგრამიდან "დიდოსტატის მარჯვენის“ ამოღებას ითხოვს. მართალია, ეს სტატუსი მწერალმა ჯირკვალიშვილმა 2017 წელს დაწერა, მაგრამ გამსახურდიას თქმით, სტატუსი სულ აქტუალიზაციას განიცდის, "ბატონი რაულ ჩილაჩავა მწერს, ისევ განაგრძობს და ახლა გიგი თევზაძეც აყვაო...“
კონსტანტინე გამსახურდია:
"ვინმე ოთარ ჯირკვალიშვილს დაუწერია კონსტანტინეზე - "დიდოსტატი" დაუყოვნებლივ ამოიღეთ სასწავლო პროგრამიდანო“. აი, არ მოსწონს და რა ქნას. ამაზე გამახსენდა ცოტნეს ერთი პოსტი, ფორმაში რომ იყო, იმ დროიდან: როდესაც გია ნოდიამ დაწერა, რა მწერალია კონსტანტინე, რისი თქმა უნდა, ვერ მივხვდიო, ცოტნემ უპასუხა: პირფაჩარა გია ნოდიამ შემოგვთავაზა ეს დიდებული "სიბრძნე" და ათასზე მეტი გინება შეიწერაო. ეს ჯირკვალიშვილი არ არის პირიმნაირი, "პირნუდაა“. მერე გამახსენდა, ანალოგიური ვიღაც გაბუნიამაც დაწერა, თან მწერალს გადასწვდა, სტალინთან დააკავშირა მძულვარედ და ბოღმიანად. მე კი არ ვიცოდი რა შეუქმნია ფასეული ან ამ ჯეელს: გაბუნიას ფოტოს დავხედე და საერთოდ არ მეცნო. ჭირვეული, ანჩხლი ბავშვი იყურებოდა ამ ფოტოდან, პოპულარული გერმანული ლიტფიგურის, პატარა ცახესის მსგავსი. ესენი ცხადია, ერთი კლასტერიდან არიან.
ესეც ფაუსტური პროქტოფანტაზმაა, რაც ამათ ჭირთ - თითქოს კონსტანტინეს ჟანგბადი ეწურება და ხელოვნურად აცოცხლებენ. ეშმა როგორ არ გაიცინებს! ეხლა კი მეტი სერიოზულობით - ეს ჩემი მომავალი წიგნიდანაა ამონარიდი:
“ზვიადის "საქართველოს სულიერი მისია“ ცალკე წიგნად გამოვიდა 1990 წელს. მისი რედაქტირება გავაკეთეთ მე და ჟურნალისტმა ვახტანგ ბახტაძემ. ამ კრებულში ასევე შევიდა საბჭოთა პერიოდში ლექციად წასაკითხი მოხსენების თეზისები "კონსტანტინე გამსახურდია და ქრისტიანობა“. ავტორს იგი არ წააკითხეს. ეს თეზისები ზვიადმა იმიტომ შეიტანა, რათა მომავალში გამოყენებული ყოფილიყო კონსტანტინე გამსახურდიას შემოქმედების დასაცავად. მწერალს როგორც სტალინიზმის, ისე პოსტსტალინიზმის პერიოდში გაშმაგებით ესხმოდა თავს კრიტიკოსთა, უფრო სწორად მაძაგებელთა (ის რაც, ინგლისურ ენაში არის detractor) და განმაქიქებელთა სამი თაობა.
ისე მოხდა, რომ ეს უმძიმესი ესტაფეტა დამოუკიდებლობის შემდგომ საქართველოშიც გადაიბარეს, როდესაც პერიოდულად ისევ ხდებოდა ორკესტრირებული შეტევები მწერალზე, ხან საეკლესიო ობსკურანტების, ხანაც დასავლურ განათლებაზე და ლიბერალიზმზე პრეტენზიის მქონე პირების მხრიდან. არც ერთ მწერალს ქართულ ლიტერატურაში არ ჰყოლია იმდენი მტერი, რამდენიც კონსტანტინეს. რასაკვირველია ამ ყველაფრის უკან დგას რუსული ჰიბრიდული ომის სპეცსამსახურულ-პროპაგანდისტული სამზარეულო, რომლის ამოცანაა ქართველი ერი დაარწმუნოს ერთ რამეში - რომ მას სრულფასოვანი პროზა არ გააჩნია. პოეზია კი ბატონო, ასე თუ ისე გაქვთო, რა თქმა უნდა, პუშკინთან და ბლოკთან ვერც ის მოვაო, მაგრამ მაინცო...
იქვე დამცინავად დააყოლებენ, თქვენს ხალხს სიმღერაში და ცეკვაში ხომ ვერავინ შეედრებაო. ქართველი სნობი რუსული კულტურული კოლონიის ბოსტანს ვერ სცდება, რის გამოც მათი ერთი ნაწილი ამ დამოკიდებულებას ვერ აცნობიერებს და ბრმა იარაღი ხდება, მეორე ნაწილი კი სწორედაც რომ აცნობიერებს. სხვათა შორის გია ჭანტურიამ, ვიდრე ზვიად გამსახურდიას მტრების რიგებს შეუერთდებოდა, (და ვინც სხვათა შორის, კონსტანტინეს მწერლობაზე მაღალი აზრისა იყო...) ერთი საყურადღებო, დამაფიქრებელი აზრი გამოთქვა, და როგორც მახსოვს, ეს იყო 1988 წლის დასაწყისში, რაც ამ საკითხს მეტად საინტერესო რაკურსიდან დაგვანახებდა:"ერს, რომელიც ყურადღებას მხოლოდ პოეზიას და სიმღერას აქცევს და პროზას უგულებელჰყოფს, გაუჭირდება დამოუკიდებლობის მიღწევა და საკუთარი სახელმწიფოს აშენება“.
დიახ, მტრები უგულებელყოფენ ცურტაველს, საბანისძეს, მერჩულეს, სულხან-საბას, ჭონქაძეს, ილიას, ყაზბეგს, ბარნოვს, კლდიაშვილს, გრიგოლს, მიხეილს, კონსტანტინეს, გურამ რჩეულიშვილს .... ეს კლასიკაა. თანამედროვენი უფრო აქეთ თქვენ გააგრძელეთ. და თან რამხელა ეპატაჟისტია კონსტანტინე, რომ ამდენს გაყეფებთ დღემდე.
P.S. კიდევ ერთხელ რომ გადავხედე ამ პოსტს, სადღაც გულმა რეჩხი მიყო, იქნებ მამათა და შვილთა ბრძოლის მსგავსია, მაინც ახალგაზრდებია, მთლად გრიგოლ ორბელიანივით ნუ გასასტიკდები, რაღაცამ თითქოს მითხრა. არა, ესენი არ არიან შვილები. ესენი შვილები კი არა, თავიანთ პაპისპაპათა რეინკარნაციებია, იმათი, რომლებიც ალბათ ახალგაზრდა ილიას ეუბნებოდნენ, რომ გამოსავალი სწორედაც გარუსებაშია. უბრალოდ დღეს რუსობა მოდაში აღარაა, სასარგებლო იდიოტობას კი ძნელად თუ ეშველება. ამიტომაც ერთხელ უკვე გავისტუმრე მთელი ამათი კლასტერი "ზმეინისკენ“ მცურავ რუსულ სამხედრო ხომალდთან ერთად".
კონსტანტინე გამსახურდიას ვრცელ სტატუსს გამოეხმაურა მწერალი ოთარ ჯირკვალიშვილიც, რომელიც წერს, რომ დილიდან უამრავმა ადამიანმა გაუგზავნა გამსახურდიას პოსტი.
ოთარ ჯირკვალიშვილი:
"დილით ასეთი სიურპრიზი დამხვდა, ათმა კაცმა მაინც გადმომიგზავნა კონსტანტინე გამსახურდია უმცროსის პოსტი, სადაც ეს ადამიანი მოაზროვნისთვის და კულტურული ადამიანისთვის შეუფერებელი სიტყვებით მლანძღავს. იქვე მიალანძღა დავით გაბუნიაც. როგორც ირკვევა, ბატონ რაულ ჩილაჩავას ამბავი მიუტანია კონსტანტინესთვის, რომ შენს დიდ პაპას კონსტანტინეს აკრიტიკებს, ამბობს, "დიდოსტატის მარჯვენა" ამოსაღებია სკოლის პროგრამიდანო. ბატონი კონსტანტინე გაუბრაზებია ამ კონტექსტიდან ამოგლეჯილ ვითომ სწორ ინფორმაციას და კარგადაც გამოვულანძღივარ. ყველაზე სამარცხვინო მაინც ის ამბავია, როდესაც ადამიანის გვარს დასცინი (აქილიკებ) და შეურაცხყოფ. შეგახსენებთ, რომ ბევრ ჩვენს გამოჩენილ მწერალს არ ჰქონია მაინცდამაინც ლამაზად მჟღერი გვარი...
მე მაინც მგონია, რომ ბატონი კონსტანტინეს განაწყენების ნამდვილი მიზეზი ჩემი მოთხრობა "გალაკტიონია", რომელიც ჟურნალ "არილში" დაიბეჭდა.
იქ ერთი შეხედვით ისე ჩანს, რომ მოთხრობის პერსონაჟის კოსტა არზაყანიას პროტოტიპი კონსტანტინე გამსახურდიაა, ეს მცდარი და ზედაპირული დაკვირვებაა, რადგან კოსტა არზაყანია საბჭოთა აგრესიული მწერლის კრებითი სახეა. ფეისბუქზე ძალიან ვრცელი პოსტების წერა არ მიყვარს, ამიტომ შემიძლია ბატონ კონსტანტინეს ჯანსაღ დისკუსიაში წერილით ვუპასუხო. სალანძღავი სიტყვების გამოყენება შეუფერებელია.
და კიდევ ერთი, ვინც იმ პოსტს ალაიქებთ ჩემი მეგობრებიდან, მომიწევს თქვენთან მეგობრობის გაუქმება. არა განსხვავებული აზრის გამო (სხვათა შორის, სინამდვილეში კონსტანტინე გამსახურდია მეც მე-20 საუკუნის უმნიშვნელოვანეს ქართველ მწერლად მიმაჩნია, ნაშრომიც მაქვს მის "დიონისოს ღიმილზე", ახლახან დავბეჭდე წიგნში "კრიტიკულ-ანალიტიკური წერილები"), არამედ იმის გამო, რომ აგრესიულ და უაზრო ლანძღვას უჭერთ მხარს და არა ჯანსაღ დისკუსიას.
P. S. ისე, სულ ახლახან "ჯაყოს ხიზნები" რომ ამოიღეს სკოლის პროგრამიდან, ეგ რატომ არავინ გააპროტესტა?"
მკითხველის კომენტარები /
59 /
თარიღის მიხედვით
მოწონების მიხედვით
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
"თუ ჯართს არ ჩავაბარებ საჭმლის გარეშე დავრჩებით" - 11 წლის ალექსანდრე ალავერდაშვილი
კვირის კითხვადი სტატიები
მნიშვნელოვანი ინფორმაცია
მკითხველის რჩევით
წაიკითხეთ ავტობიოგრაფიული "ლანდებთან ლაციცი" სრული,შეუსრულებელი, ბევრ რამეს გეტყვით ბატ. კონსტანტინე თავის პიროვნებაზე ......
,,ჯირკვალიშვილს'' ჭკუაზე იარა ჩვენმა მტერმ!