"ღარიბაშვილს სურს საჯარო კონფლიქტი ამირან გამყრელიძესთან, რომ იგი შეცვალოს და მერე გამოაქვეყნოს ის "სტატისტიკა", რაც მოესურვება" - ვინ როგორ ეხმაურება პრემიერის განცხადებას?
უკვე არაერთი გამოხმაურება მოჰყვა პრემიერ-მინისტრ ირაკლი ღარიბაშვილის განცხადებას, რომელსაც კომენტატორთა უმრავლესობა ანტივაქსერულად მიიჩნევს.
ციტატა პრემიერის განცხადებიდან:
"თავდაპირველად ჩვენი მიზანი იყო ვაქცინაციის წახალისება და "დელტას“ და სხვა შტამების შემთხვევაში სხვა სურათი იყო, მაგრამ "ომიკრონის დროს“, უმეტეს შემთხვევაში ვაქცინა არ მუშაობს. ვაქცინირებულ პირს ჩვეულებრივ ემართება "ომიკრონი“. მაგალითად, მე ვარ ერთი მაგალითი - მქონდა სხვა შტამი გასულ წელს, ორჯერ ვიყავი აცრილი "ფაიზერის“ ვაქცინით, მაგრამ მაინც დამემართა "ომიკრონი“. მინდა გითხრათ, რომ აბსოლუტურ შემთხვევებში ძალიან მსუბუქ ფორმებში მიმდინარეობს აღნიშნული ვირუსი". ამ ციტატის მიხედვით პრემიერი თითქოს გულისხმობს, რომ ვაქცინა ადამიანს ინფიცირებისგან არ იცავს, თუმცა ფრაზა აშკარად ორაზროვანი და დაუზუსტებელია.
"ილიაუნის" პროფესორის, ჯანდაცვის ყოფილი მინისტრის, ზურაბ ჭიაბერაშვილის შეფასებით, ღარიბაშვილმა ანტივაქსერული განცხადება გააკეთა. ჭიაბერაშვილის აზრით კი, აღნიშნული ქმედებით პრემიერი ცდილობს, საჯარო კონფლიქტში შევიდეს ამირან გამყრელიძესთან. ამას კი იმისთვის აკეთებს, რომ იგი თანამადებობიდან გადააყენოს.
"რატომ თქვა ღარიბაშვილმა ანტივაქსერული სისულელე? ანტივაქსერული, შავრაზმული, პრორუსული ძალებისთვის "კოჭის გაგორებით" ამის ახსნა ძალიან ზედაპირული იქნებოდა. ღარიბაშვილს და მთავრობას აწუხებს ოფიციალური კოვიდ-სტატისტიკა, რომელსაც ვერაფერს უხერხებს მანამ, სანამ დაავადებათა კონტროლის ცენტრს ამირან გამყრელიძე ხელმძღვანელობს. ღარიბაშვილს სურს საჯარო კონფლიქტი ამირან გამყრელიძესთან, რომ იგი შეცვალოს (ჯანდაცვის მინისტრის ხელით) და მერე გამოაქვეყნოს ის "სტატისტიკა", რაც მოესურვება. თქვენ შეიძლება ბევრი პრეტენზია გქონდეთ დაავადებათა კონტროლის ცენტრთან, მაგრამ არ უნდა აყვეთ ღარიბაშვილს, რომ ამას მიაღწიოს. ბატონ ამირანსაც, იმედი მაქვს, ნერვები ეყოფა." - წერს ჭიაბერაშვილი "ფეისბუქში"
"რესპუბლიკური პარტიის” თავმჯდომარე ხათუნა სამნიძე მავნებლობას უწოდებს პრემიერ-მინისტრის განცხადებას.
როგორც სამნიძემ ჟურნალისტებს განუცხადა, პრემიერი საკუთარი განცხადებით ანტივაქსერებს ახალისებს.
"პრემიერ-მინისტრის განცხადება არის პირდაპირი მნიშვნელობით მავნებლობა და საფრთხეს უქმნის ადამიანის სიცოცხლეს. როგორც ჩანს, პრემიერი ვერ აცნობიერებს, რომ ვაქცინა არის იმისთვის, რომ სიკვდილიანობა შემცირდეს და ადამიანებმა მარტივად გადაიტანონ, თუ ისინი დაინფიცირდებიან. მხოლოდ საკუთარი გამოცდილებით საუბარი ნიშნავს, რომ საერთოდ ვერ აღიქვამს ვითარებას ადეკვატურად. პრემიერის ეს განცხადება ახალისებს ანტივაქსერებს და იმ ადამიანებს, ვისაც არ აქვთ სრული ინფორმაცია რა საშიშ ვირუსთან გვაქვს საქმე“, - განაცხადა ხათუნა სამნიძემ.
პრემიერის განცხადებას გამოეხმაურა "ნაციონალური მოძრაობის" ერთ-ერთი ლიდერი ლევან ხაბეიშვილიც.
"ფაქტობრივად, პრემიერი ამბობს - დიდი ამბავი თუ ვაქცინას არ გაიკეთებთ და მოკვდებით, ამაზე არ ვნერვიულობ, მე კი ორჯერ ვარ ვაქცინირებულიო - ასეთი იყო დაახლოებით მისი განცხადება, ცხადია, უპასუხისმგებლო. არ არსებობს მსოფლიოში მაღალი თანამდებობის პირი, რომელიც საუბრობს დანაშაულებრივად, როგორც ჩვენი ქვეყნის პრემიერ- მინისტრი. ფაქტობრივად, ის ადასტურებს, რომ ადამიანების სიცოცხლე და ჯანმრთელობა არაფრად უღირს, ამას აკეთებს ერთი მიზნით, რომ ჩაიწეროს ქულები და კონკრეტული საზოგადოებრივი ჯგუფები წაახალისოს,"- განაცხადა ხაბეიშვილმა.
პრემიერის მიერ ვაქცინაზე გაკეთებულ განცხადებაზე განმარტება გააკეთა მთავრობის სტრატეგიული კომუნიკაციების დეპარტამენტის უფროსმა ნინო გიორგობიანმა.
მისი თქმით, განცხადება კონტექსტიდან ამოგლეჯილად გავრცელდა. იხილეთ გიორგობიანის განმარტება სრულად