"ეს ადამიანი იქნება ჩემთვისაც მისაღები და მასთან გავაგრძელებთ თანამშრომლობას" - ეკატერინე ტიკარაძე მის შემცვლელზე

ჯანდაცვის მინისტრის ეკატერინე ტიკარაძის განცხადებით, ჯანდაცვის ახალი მინისტრის ვინაობის შესახებ ინფორმაცია არ აქვს.

როგორც ტიკარაძემ ჟურნალისტებს განუცხადა, გადაწყვეტილებას პრემიერი მიიღებს და "გუნდი ერთობლივად გაასაჯაროვებს”.

კითხვაზე, ვის უწევს თავად რეკომენდაციას ჯანდაცვის მინისტრის პოსტზე და დაუჭერს თუ არა მხარს ამ პოზიციაზე არჩილ თალაკვაძეს, ტიკარაძე ამბობს, რომ პრემიერი ვისაც დაასახელებს, მისთვისაც მისაღები იქნება.

"პრემიერი მიიღებს გადაწყვეტილებას და ეს ადამიანი იქნება ჩემთვისაც მისაღები და მასთან გავაგრძელებთ თანამშრომლობას”,- განაცხადა ეკატერინე ტიკარაძემ.

რაც შეეხება იმას, რატომ გააქტიურდა ეკატერინე ტიკარაძე სხვადასხვა პრეზენტაციის გამართვის მიმართულებით, მინისტრის თქმით, ღონისძიებები პანდემიის პირობებში განვლილ 2- წლიან პერიოდს ემსახურება.

"ჯანდაცვის სამინისტროს 11 მიმართულება აქვს. მნიშვნელოვანია, რომ გუნდის ყველა წევრი ერთნაირად იყოს დაფასებულ და შეფასებული. ეს ღონისძიებები ემსახურება 2-წლიან რთულ პერიოდს, რომელიც კოვიდ-პანდემიის პერიოდში გავიარეთ და მნიშვნელოვანია, ამ ადამიანებს მიეცეთ საშუალება, რომ საზოგადოებას წარმოუდგინონ მათ მიერ შესრულებული სამუშაო”,- განაცხადა ეკატერინე ტიკარაძემ.

ცნობისთვის, ჯანდაცვის მინისტრის პოსტიდან გადადგომა ეკატერინე ტიკარაძემ 9 დეკემბერს დააანონსა. ის თანამდებობაზე წლის ბოლომდე დარჩება.