"ნიუ-იორკში წარმოუდგენლად მძიმე სიტუაციაა..." - რას ყვებიან ქართველი ემიგრანტები, რომლებიც ჰოსპიტალებში მოხალისეებად მუშაობენ

ბოლო დღეებში, ამერიკამ კორონავირუსით ინფიცირებულთა რაოდენობით მსოფლიოში ყველა ქვეყანას გაასწრო. ბოლო მონაცემებით, აშშ-ში კორონავირუსით ინფიცირებულია 165 000-მდე ადამიანი, გარდაიცვალა - 3000-ზე მეტი პაციენტი.

ვირუსის გავრცელების მხრივ, ყველაზე მძიმე ვითარება ნიუ-იორკშია. იქ მცხოვრები ქართველი ემიგრანტების თქმით, მოსახლეობაში მცირედი იმედი გააჩინა 1000-საწოლიანი სამედიცინო გემის შესვლამ, რადგან ის ნიუ-იორკის სამედიცინო დაწესებულებებისა და ექიმებისთვის ერთგვარი შეღავათი იქნება.

ლადო წითაშვილი, ნიუ-იორკში მცხოვრები ქართველი ემიგრანტი AMBEBI.GE-ს უყვება, რომ გემი-ჰოსპიტალის სანახავად სანაპიროზე უამრავი ადამიანი შეიკრიბა:

"სამედიცინო გემი რომ შემოვიდა, უამრავი ხალხი მოვგროვდით გარშემო - ამ გადაღლილი და გაწამებული ხალხისთვის, ერთგვარი შვება და იმედი იყო მისი დანახვა... გემს ოფიციალური დელეგაცია დახვდა და თქვეს, რომ მათ შორის იყო პრეზიდენტი ტრამპიც.

ვითარება ყოველდღიურად მძიმდება, თუმცა, რახან ძალიან ჭრელია ადგილობრივი მოსახლეობა, თავის ცხოვრების წესით, მრწამსით და წარმოშობით, მათი მართვა და კონტროლი ადვილი არ არის, ამიტომ თუ ერთი ქუჩა ცარიელია, მეორე შეიძლება ჩვეულებრივად განაგრძობდეს ცხოვრებას, თუმცა კაფე-ბარები და მსგავსი დაწესებულებები ყველგან დაკეტილია.

ზოგან ძალიან ბევრი ხალხი დადის ქუჩაში, ამიტომ აპირებენ რეგულაციები გაამკაცრონ. მოხალისეებიც გამოჩდნენ, რომლებიც ყველას მოუწოდებენ, დარჩნენ სახლში - ეს არ არის თამაში, არც რაიმე შოუს ნაწილი, უბრალოდ დარჩით სახლში, თქვენივე კეთილდღეობისთვისო... ზოგი მადლობას უხდის გაფრთხილებისთვის, ზოგი აგრესიულად პასუხობს მათ.

- რა ხდება ნიუ-იორკში, ხალხი პანიკაშია?

- დიახ, პანიკაშია, თუმცა, ცდილობენ ვითარებას მოერგონ... ჩემი ექიმი მეგობრები მოხალისეებად მუშაობენ კარანტინებში, ასევე თვითიზოლაციაში მყოფებს ეხმარებიან და მათგან ვიცი, სპეციალისტების ვარაუდით, ნიუ-იორკში შესაძლოა, უფრო რთული ვითარება იყოს, ვიდრე სტატისტიკა აჩვენებს.

კიდევ ერთი ემიგრანტი დალი არჩვაძე კი გვიყვება ქართველის შესახებ, რომელიც კორონავირუსით სამსახურში ყოფნის დროს დაინფიცირდა:

- ჩემი ახლობელი, რომელიც აქ ოჯახთან ერთად ცხოვრობს, მოხუცს უვლიდა, რომელსაც კორონავირუსი აღმოაჩნდა. როგორც გაირკვა, თავადაც დაინფიცირდა და ოჯახის წევრებსაც გადასდო. ახლა ყველანი თვითიზოლაციაში არიან და ხანდახან მათთან საკვები და სხვა საჭირო ნივთები მიმქონდა, რადგან სავადმყოფოებში ადგილი არ არის და მხოლოდ იმას იღებენ, ვისაც ვირუსი მძიმე ფორმებში აქვს გამოხატული. ამათ ექიმი სახლის პირობებში მკურნალობდა, რადგან მსუბუქი სიმპტომები აქვთ...

მომინდა, კიდევ უფრო მეტი გამეკეთებინა - თან ასე დეპრესიასაც ვშველი, სახლში ჯდომა არ მიწევს და ეს ჩემთვის ბევრს ნიშნავს. მივედი ახლომდებარე ჰოსპიტალში და ვთხოვე, სამედიცინო განათლება მაქვს, რით შემიძლია დახმარება-მეთქი. გავიარე სწრაფი გადამზადება - ვგულისხმობ, პირველადი საფრთხეების აღქმას, თორემ აქ ისეთი პროფესიონალი ეპიდემიოლოგები და ვირუსოლოგები არიან, საეჭვო სიმპტომით მისულ ხალხს მაშინვე ცნობენ...

მიმართვიანობამ ისეთი მასშტაბური სახე მიიღო, ექიმები 24-საათიან რეჟიმში მუშაობენ, შინ დღეების განმავლობაში არ მიდიან და პაციენტებს მაინც ვერ აუდიან. არ ვიცი, როდის ისვენებენ, როდის სძინავთ, როდის იკვებებიან, სულ ხალხი ჰყავთ და რიგი მაინც არ მცირდება... ჰყავთ ძალიან მძიმე პაციენტებიც და მათი რაოდენობა ყოველდღიურად მატულობს.

- რა არის თქვენი ფუნქცია?

- კარანტინში მყოფებისთვის მიმაქვს საკვები და საჭირო ნივთები, შესაბამისი სპეცტანსაცმლით ვარ, დისტანციურად ვუზომავ სიცხეს და ექიმის მითითებებს ვასრულებ... ამით ძალიან ვეხმარებით ადგილობრივ მედპერსონალს, რადგან ნიუ-იორკში მართლაც წარმოუდგენლად მძიმე სიტუაციაა.

ქეთი წამალაძე, ნიუ-იორკში მცხოვრები ემიგრანტი:

"ძალიან მძიმე დღეები გვაქვს. დღე და ღამე გასწორებული აქვთ ექიმებს და ცალკე პოლიციას, რომელიც მოსახლეობას რეგულაციების დაცვისკენ მოუწოდებს, თუმცა, ზოგან დისტანციასაც არ იცავენ. აგრესიულებიც კი არიან, კარანტინის დარღვევის უამრავი ფაქტია... ზოგს ძალიან უჭირს შინ ჯდომა, განსაკუთრებით მოხუცებს და ათას მიზეზს იგონებენ, რომ სახლიდან გავიდნენ.

მე მოხალისე ვარ და სხვებთან ერთად ვაწარმოებ კარანტინსა და თვითიზოლაციაში მყოფების მდგომარეობის აღწერას, ყოველ მომდევნო დღეს წინას ვადარებთ, ვასრულებთ ექიმის მითითებას კვებისა თუ სხვა რეკომენდაციების შესახებ, ასევე, პაციენტების ჯანმრთელობის მდგომარეობაზე ვაწვდით ინფორმაციას, რომელსაც შემდეგ თავად ამოწმებენ... მოხალისეები ვცდილობთ, წვრილმანი და ტექნიკური საკითხები მოვუგვაროთ ექიმებს.