2 წლის ანი­ტა ფა­ცა­ციას საქართველოში დღეს ჩამოასვენებენ - ოჯახის ახლობელი ჟურნალისტებს მიმართავს

2 წლის ანიტა ფაცაციას საქართველოში დღეს 20:15 საათზე ჩამოასვენებენ. ამის შესახებ ინფორმაციას ფეისბუქ-ჯგუფი "ანიტასთვის" აქვეყნებს, სადაც გოგონას მდგომარეობის შესახებ ცნობები რეგულარულად ვრცელდებოდა. ჯგუფის ერთ-ერთი წევრი ჟურნალისტებს თხოვნით მიმართავს:

"არ ვიცი მერამდენე ღამეა, რომ ტრადიციულად მოგესალმოთ...

მნიშვნელოვან პოსტს ვწერ, მინდა ემოციების გარეშე მოგაწოდოთ ინფორმაცია, მაგრამ... ვწერ, ვშლი, ვწერ, ვშლი, ვწერ, ვშლი...

ამდენი ხნის განმავლობაში, ყოველ ღამე გწერდით ანიტას, მისი დედიკოს და მამიკოს ამბებს.პასუხისმგებლობა ავიღე, დაგპირდით, რომ ყველა ინფორმაციას გაგაცნობდით. კრიტიკული სიტუაციების დროს მიჭირდა, არ მინდოდა არაფრის წერა, მაგრამ ვწერდი იმიტომ, რომ თქვენ არც ერთი წამი არ მიგვატოვეთ და არც ჩვენ გვქონდა თქვენი მიტოვების უფლება...

ვწერ, ვშლი, ვწერ... ძალიან მიჭირს ამ სიტყვების დაწერა:

ანიტას ჩამოასვენებენ კვირას, 2 თებერვალს 20:15 საათზე.სამთავრობო გასასვლელიდან გამოვლენ, ამიტომ შიგნით ვერ შეხვალთ.

ძალიან მნიშვნელოვანი რამ უნდა ვთხოვო/მოვთხოვო ჟურნალისტებს!

ძალიან გთხოვთ, არავინ არ მოხვიდეთ ფოტოების, სიუჟეტების, ლაივ/სინქრონების და კომენტარებისთვის! ამას იმიტომ ვწერ, რომ ბევრმა გვთხოვა კომენტარი გაგვეკეთებინა (არ ვიცი რა კომენტარი შეიძლება გაგვეკეთებინა) მე და ჩემ მეგობრებს, რაც ძალიან მიუღებელია ამ სიტუაციაში. ამიტომ გთხოვთ, დაფიქრდით, სანამ რამეს მოიმიქმედებთ. თუნდაც ფოტო გადაიღოთ, დაფიქრდით ანიტას ოჯახის წევრები რას იგრძნობენ, ამ ფოტოს რომ შეხვდებიან სოც. ქსელში.

• ხუთშაბათს, 6 თებერვალს, უნივერსიტეტის ქუჩაზე მდებარე ამაღლების ეკლესიიდან გამოასვენებენ ანიტას...

არ მჯერა, რომ ეს დავწერე...

მადლობა რომ ბოლომდე იბრძოდით... ბოდიში, რომ დაგპირდით და ეს ამბავი კეთილ დასასრულამდე ვერ მივიყვანეთ...

ახლა უკვე ერთადერთი რასაც ვნატრობ, ანიტას მამამ, რომელსაც დღეს 28 წელი შეუსრულდა და დედამ, რომელიც ჩემთვის მეგობარზე, დაქალზე, დაზე მეტია და ახლა ჩემი გმირიც გახდა, ფიზიკურად მაინც გაუძლონ ამ ყველაფერს...", - აღნიშნულია პოსტსში.

2 წლის ანიტა ფაცაციას, რომელსაც მთელი საქართველო გულშემატკივრობდა, უმძიმესი დაავადება დილატაციური კარდიომიოპათია რამდენიმე თვის წინ დაუდგინეს. მას ესაჭიროებოდა მსოფლიოში ერთ-ერთი ურთულესი ოპერაცია - გულის გადანერგვა. პატარა გოგონას ოჯახს რამდენიმე ქვეყანამ უარი უთხრა ოპერაციის გაკეთებაზე. ბოლოს ის ინდოეთის ერთ-ერთ კლინიკაში იმყოფებოდა. გოგონას მდგომარეობა ბოლო დღეებში ძალიან მძიმე იყო. ფაცაციების ოჯახის ახლობლების წერდნენ, რომ ანიტას შინაგანი სისხლდენა ჰქონდა, რაც სავარაუდოდ გამოწვეული იყო იმით, რომ ბავშვის ორგანიზმი ვეღარ ეგუება გულის მუშაობის მასტიმულირებელ ეკმოს აპარატს. 2 წლის გოგონას სეფსისიც განუვითარდა და საბოლოოდ, მისი ორგანიზმი ვეღარ მოერია დაავადებას... ბავშვი 31 იანვარს გარდაიცვალა.