როგორ დასრულდა მსახიობ გოგა ბარბაქაძის ძმის საქმე - "ეს იყო გეგმა ევროპაში თავშესაფრის მისაღებად, თუმცა სამართლიანობა აღდგა"

სერიალ "შუა ქალაქის" მსახიობის, გოგა ბარბაქაძის ძმა, რეზი ნაცარიშვილი, რომელსაც ყოფილი სამხედრო პირი ჯგუფურ ცემასა და მუქარაში ადანაშაულებდა, თბილისის საქალაქო სასამართლომ უდანაშაულოდ ცნო. ამის შესახებ ინფორმაციას ნაცარაშვილის ადვოკატი მარიამ კუბლაშვილი "ფეისბუქზე" წერს და ყოფილი სამხედროს, დავით ნემსაძის შესახებ ახალ დეტალებს ავრცელებს.

• წაიკითხეთ: "მაიას უშვერი სიტყვებით მიმართავდა..." - ვინ მიაყენა შეურაცხყოფა გოგა ბარბაქაძის ცოლს და რატომ დააკავეს მსახიობის ძმა

"დღეს აღდგა სამართლიანობა და დადგა გამამართლებელი განაჩენი ბრალდებულ - რევაზ ნაცარიშვილის მიმართ! სასამართლომ დაადგინა, რომ იგი Rezi Natsara სრულიად უდანაშაულოა!

ამ საქმეზე დაზარალებულად ცნობილმა - დავით ნემსაძემ, ევროპაში პოლიტიკური თავშესაფრის მისაღებად, წინასწარ შემუშავებული გეგმის სისრულეში მოყვანის მიზნით, მოაწყო პროვოკაცია, თავს დაესხა მსახიობ - გოგა ბარბაქაძის ოჯახს და იმდენს მიაღწია, რომ უდანაშაულო კაცი დააჭერინა.

უფრო ადრე მან შექმნა და გაავრცელა ვიდეო, რომელიც შეიცავდა ცრუ ინფორმაციას მსახიობ გოგა ბარბაქაძის მეუღლე - მაია დობორჯგინიძის შესახებ. ვიდეო გააზიარა არაერთ ფბ გვერდზე, სადაც ათასობით ადამიანი უშვერი სიტყვებით ლანძღავდა ქალბატონს.

ოჯახის არაერთი თხოვნის მიუხედავად, ბოდიშის მოხდის ნაცვლად, დავით ნემსაძე პირდაპირ თავს დაესხა შემთხვევით სპორტულ დარბაზში შეხვედრილ ძმებს. დადგა სცენარი, რომ მასზე იძალადეს. ადგილზე გამოიძახა პოლიცია, მოახსენა, რომ თითქოს მას ორგანიზებული ჯგუფი დაესხა თავდაცვის სამინისტროს დავალებით და მოითხოვა მათი დაკავება. აი ამ მატყუარის ბოდვის გამო, ბრალი წაუყენეს და დააკავეს ჩემი კლიენტი, უწესიერესი ადამიანი, რადგან დაზარალებული იდგა პოლიციის წინ და აწყობდა აქციებს, პროვოკატორობდა, უწყვეტ რეჟიმში გადასცემდა და ამზეურებდა დაზიანებულ თვალს. მოკლედ, იკადრა უკადრებელი..

რა წუთს შეიტყო, რომ მე რეზის ადვოკატი ვიყავი, აგრესია გააგრძელა ჩემი მისამართით. დაავიწყდა მსახიობების ოჯახი და წერდა მხოლოდ ჩემზე, საუბრობდა მხოლოდ ჩემზე. მან არაერთხელ დამწამა ცილი, მომაყენა შეურაცხყოფა, განზრახ შელახა ჩემი რეპუტაცია, რათა მიეღო საპასუხი აგრესია, სავარაუდოდ ჩემი მეუღლისგან. როგორც მოგვიანებით გაირკვა, მას აღნიშნული მასალა სჭირდებოდა საფრანგეთში წარსადგენად, იმის დასტურად, თუ რა ცოდოა და როგორი მსხვერპლია, როგორ ჩაგრავენ საკუთარ ქვეყანაში. უფრო ადრე, მან მიზანში ამოიღო მაღალი თანამდებობის პირები და ცნობილი ადამიანები, რათა თავშესაფრის მიღებისას დასაბუთება უფრო მარტივი და ადვილი ყოფილიყო.

მთელი ამ ხნის მანძილზე ბევრი ვითმინე, ბევრი ტალახი მშვიდად, უემოციოდ ჩამოვიწმინდე, რათა ეს დღე დამდგარიყო. რათა მე დამემტკიცებინა ჩემი კლიენტის სიმართლე.

მადლობა ჩემს მეუღლეს, რომელმაც ითმინა და აიტანა ენით გამოუთქმელი, უშვერი სიტყვებით ლანძღვა, საშინელი ცილისმწამებლური განცხადებები, სჯეროდა ჩემი და რეალურად, ეს დღეც დადგა. დიდი მადლობა ადვოკატ - თეონა გვაზავას, ის ხომ ყოველთვის ჩემს გვერდითაა. ის, ანალოგიურად ამ საქმეზე პირველივე წუთიდან დაუზარებლად, უანგაროდ მუშაობდა. შუაღამისას დაკავებულ კლიენტთან გამომყვა და ჩვენ შევძელით სიმართლის დამტკიცება.

ახლა წერე და იკითხე მაიმუნო, არაადამიანო. ჩემი პასუხიც ესაა! დაიწყე ახლა გავლენები აქვთო, სასამართლოზე ზეწოლა მოახდინესო. რა ბედნიერი ვარ ერთი შენისთანა არაკაცი რომ ვამხილე. აი ასე!" - წერს კუბლაშვილი.

ცნობისთვის, რამდენიმე თვის წინ ყოფილმა სამხედრომ, დავით ნემსაძემ სოციალურ ქსელში გოგა ბარბაქაძის მეუღლის, მსახიობ მაია დობორჯგინიძის მისამართით შეურაცხმყოფელი ვიდეო გამოაქვეყნა. როგორც მაშინ მსახიობმა AMBEBI.GE-ს განუცხადა, ნემსაძეს მისი მეუღლე თავდაცვის სამინისტროს თანამშრომელი ეგონა და ვიდეოში "უშვერი სიტყვებით მიმართავდა, მასხარად მოიხსენიებდა და ვიდეო ლაივში აფურთხებდა კიდეც". როგორც მსახიობი განმარტავდა, იმ პერიოდში, როცა ვიდეო სოციალურ ქსელში აიტვირთა, ის თურქეთში გასტროლზე იმყოფებოდა, იქიდან ჩამოსულმა კი, დავით ნემსაძესთან დაკავშირება და შეხვედრა სცადა.

"აღმოჩნდა, რომ ჩემი ძმა სადაც ვარჯიშობდა, ეს ადამიანიც იქ ვარჯიშობდა. ჩემმა ძმამ დამირეკა, მოდი, აქ არის, დაელაპარაკე, იქნებ ეს ვიდეო აიღოსო. როცა მივედი, ვუთხარი, რომ მაია დობორჯგინიძის მეუღლე ვიყავი. ჩემს მეუღლეზე რაღაც ვიდეო დადე, ჩემმა ოჯახმა ასეთი რა დაგიშავა, რომ ასეთი შეურაცხყოფა მოგვაყენე-მეთქი, ვკითხე. თავდაცვის სამინისტროს მივმართე, მაია დობორჯგინიძე მართლა მათი თანამშრომელი იყო თუ არა და იმათმა პასუხი არ მომწერეს, შენ რანაირად დაგიჯერო, ათასი მასხარა მუშაობს იქო, აგრესიულად მიპასუხა. ამის შემდეგ, ჩემი ძმისკენ გამოიწია, მან კი მოგერიების მიზნით, ხელი მოუქნია, რაც მარჯვენა წარბში მოხვდა" - ამბობდა ბარბაქაძე და განმარტავდა, რომ ინციდენტის შემდეგ მისი ძმა დააკავეს.

მისივე ინფორმაციით, ნაცარიშვილს თავდაპირველად ცემას ედავებოდნენ, "რამდენიმე ხნის შემდეგ, დავით ნემსაძემ პროკურატურას დამატებითი განცხადებით მიმართა და კვალიფიკაციის შეცვლა, ბრალის დამძიმება მოითხოვა". საბოლოოდ სასამართლომ მსახიობის ძმა გირაოთი გაათავისუფლა.