რას ყვება 25 წლის ქართველი გოგონა კუბაში ცხოვრებაზე: "ქარიშხალ "ირმას" შემდეგ, ჰავანელები წელამდე წყალში იდგნენ და ცეკვავდნენ..."

25 წლის ანა დე არსე ლომიძე მომავალი დიპლომატია. ის ამჟამად კუბაზე, საქართველოს საელჩოში მუშაობს. ახალგაზრდა, მიზანდასახულ ქართველ გოგონას წარმატებულ კარიერასა და პირად ცხოვრებაზე სასაუბროდ ჟურნალი "გზა" ინტერნეტით დაუკავშირდა.

ანა დაიბადა საქართველოში და გაიზარდა ესპანეთში. სკოლის დამთავრების შემდეგ ჩააბარა მადრიდის სახელმწიფო უნივერსიტეტში, პოლიტიკური მეცნიერებების ფაკულტეტზე, გაცვლითი პროგრამით ერთი წელი სწავლობდა დანიაში, კოპენჰაგენის უნივერსიტეტში. 2014 წელს მოხვდა ქართული დიასპორის სტაჟირების პროგრამაში და შესაბამისი კურსი საქართველოს საგარეო საქმეთა სამინისტროს პოლიტიკურ დეპარტამენტში გაიარა, სადაც პირველად ჰქონდა პრაქტიკული შეხება დიპლომატიასთან.

"2015 წელს, კოპენჰაგენში სწავლის დროს გავიარე სტაჟირება საქართველოს საელჩოში დანიაში. სწავლის დასრულების შემდეგ მივიღე შემოთავაზება, კუბაზე ახალგახსნილ საქართველოს საელჩოში ხელშეკრულებით მუშაობის დაწყებასთან დაკავშირებით. ეს ჩემი პირველი სამსახურია, ზუსტად იმ განხრით, რომელიც ყოველთვის მაინტერესებდა. რა თქმა უნდა, ესპანურის ცოდნამაც დიდი როლი ითამაშა" - გვიყვება ანა.

ცხოვრება კუბაზე

"როგორია კუბა? საინტერესო! ალბათ, ასეთ ცხოვრებისეულ და პროფესიულ გამოცდილებას ვერც ერთ სხვა ქვეყანაში ვერ მივიღებდი. ყოველთვის მინდოდა კუბის ნახვა, ჰავანაში ცხოვრება და ვიდრე აეროპორტში არ ჩამოვფრინდი, არ მჯეროდა, რომ ეს ყველაფერი მართლაც ხდებოდა ჩემს თავს. საერთოდ, კუბაზე ცხოვრება რთულია, ქვეყანაში ყველაფრის დეფიციტია. მაგალითად, შეზღუდულია ინტერნეტის მოხმარება. ინტერნეტი აქვთ მხოლოდ დიდ სახელმწიფო უწყებებს და უცხოელ წარმომადგენლებს.

ქალაქში თითზე ჩამოსათვლელი ადგილია, სადაც შეიძლება შესაბამისი საფასურის გადახდის შემდეგ ინერნეტით ისარგებლო. თუმცა, ყველაფერს აქვს დადებითი მხარე, თუნდაც, უინტერნეტოდ ყოფნასაც... მაქვს თავისუფალი დრო საიმისოდ, რომ ვიკითხო წიგნები, ვიარო ჩოგბურთისა და ცეკვის გაკვეთილებზე...

...არ მყავს შეყვარებული. ამ ეტაპზე, ჩემთვის პრიორიტეტული კარიერაა. მყავს ძალიან კარგი მეგობრები, რომლებიც ჰავანაში შევიძინე. მათი უმრავლესობა სხვადასხვა ევროპული ქვეყნის დიპლომატია. სხვათა შორის, ბევრს ვსწავლობ მათთგან, ხშირად ვმოგზაურობთ ერთად, ვათვალიერებთ კუბის სხვადასხვა ქალაქს.

...კუბაზე არის ცეკვისა და მუსიკის კულტი. ადრე კლიშე მეგონა, აქ ცხოვრების შემდეგ კი მივხვდი, რომ ეს სიმართლეა, ყველა კუბელი კარგად ცეკვავს! ბავშვები სიარულთან ერთად, ცეკვას სწავლობენ. მეც, უკვე ერთი წელია, რაც "სალსას" და "ბაჩატის" გაკვეთილებზე დავდივარ. ეს ნამდვილად დამეხმარა უკეთ გამეცნო კუბური კულტურა. ძველი ჰავანის ქუჩებში ყოველთვის ისმის მუსიკის ხმა. ქარიშხალმა "ირმამ" ირგვლივ ყველაფერი რომ გაანადგურა, მეორე დღეს, როდესაც ქალაქის ქუჩები წყლით იყო დატბორილი, ჰავანელები წელამდე წყალში იდგნენ და ცეკვავდნენ, სვამდნენ რომს, თამაშობდნენ დომინოს, რა თქმა უნდა, სიგარით ხელში. ამ ადამიანების პოზიტიური განწყობა ნამდვილად მისაბაძია.

ბოლო წლების განმავლობაში ტურიზმის სექტორი საკმაოდ განვითარდა. 2016 წელს კუბაში შემოვიდა ოთხი მილიონი ტურისტი. ტურისტული თვალსაზრისით კუბა უნიკალური ქვეყანაა, პირველ რიგში, მისი ისტორიითა და კულტურით. 2017 წელს ნახო ქვეყანა, სადაც ქუჩებში დადიან 20-50-იანი წლების ამერიკული მანქანები, რუსული "მოსკვიჩები" და ჩინური თანამედროვე ავტომობილები - ეს მხოლოდ აქ შეიძლება. ქალაქები სავსეა ჩე გევარას, ფიდელის, მარქსის, ლენინის გამოსახულებიანი ბანერებით და ეს ყველაფერი კოლონიური არქიტექტურის ფონზე...

აქ ამერიკელი მაფიოზების კვალსაც შეხვდებით, მათ მიერ აშენებულ უდიდეს სასტუმროებსა და საცხოვრებელ სახლებში. ქუჩებში ისმის ლათინური მუსიკა და ამ ყველაფერს ემატება ცხელი ტროპიკული ჰავა, ულამაზესი პლაჟები. ასეთი მდიდარი კულტურა და ამასთანავე, მსოფლიოს ერთ-ერთი საუკეთესო პლაჟები, ტურიზმისთვის ნამდვილად მიმზიდველია. თუმცა, ეს ყველაფერი საკმაოდ ძვირადღირებული სიამოვნებაა.... წაიკითხეთ მეტი

ლიკა ქაჯაია

ჟურნალი "გზა"