21
მარტიდღის ზოგადი ასტროლოგიური პროგნოზი
დაუწესებს თუ არა რუსეთი საქართველოს სავაჭრო ემბარგოს, ჯერ გადაწყვეტილი არ არის, თუმცა როგორ იმოქმედებს რუსული ემბარგო ქართულ პროდუქციაზე, მათ შორის ღვინის ექსპორტზე, ამ თემაზე სასაუბროდ სფეროს სპეციალისტებსა და ქართული ღვინის კომპანიებს მივმართეთ.
AMBEBI.GE-სთან საუბრისას მეღვინე როსტომ სესიაშვილი ამბობს, რომ რუსული ემბარგოს დაწესება ქართულ ეკონომიკაზე უარყოფითად იმოქმედებს.
"გამომდინარე იქიდან, რომ მეღვინეობა წამყვანი ბიზნესია, ალტერნატიული ბაზრების მოძიება საჭირო გახდება. გარკვეული პერიოდის განმავლობაში ალტერნატიული ბაზარი იყო, მაგრამ მეღვინეებმა რუსეთის გამო ისინი მეტ-ნაკლებად ჩრდილში მოაქციეს, რაც ვფიქრობ რომ ცუდია.
ქართული ღვინო ძირითადად გადის უკრაინაში, ბელორუსში, აშშ-ში, ჩინეთში, პოლონეთში, გერმანიაში, ყაზახეთი ერთ-ერთი უმნიშვნელოვანესი ბაზარია, მაგრამ აქ ნუსხიდან პოსტსაბჭოთა ქვეყნები ლიდერობენ.
რაც შეეხება ჩინეთს, მოგეხსენებათ ეს ქვეყანა ნებისმიერი პროდუქციისთვის უზარმაზარი ბაზარია. ბოლო ათწლეულის განმავლობაში ჩინელები ღვინის, მით უმეტეს, წითელი ღვინის სმას მიეჩვივნენ. წითელი ღვინო კი საქართველოში ერთ-ერთი საუკეთესოა და ვფიქრობ, მსოფლიოშიც", - ამბობს როსტომ სესიაშვილი.
მისი თქმით, ყურძნის ჩაბარების ფასს ბაზარი ადგენს:
"რაც შეხება სახელმწიფოს როლს, ამ შემთხვევაში მისი ადგილი განსაზღვრულია სუბსიდიის ჭრილში, რაც იმას ნიშნავს, რომ სახელმწიფო კერძო კომპანიებს სუბსიდირებით ეხმარება, რომელიც წელს არ ვიცი როგორ იყო, მაგრამ გასულ წლებში წითელ ყურძენზე 15 თეთრი იყო, თეთრზე კი 25. ასევე არის სახელმწიფო ქარხანა, რომელიც ჭარბ ყურძენს საბაზრო ღირებულებაში ითვისებს და თავისი რესურსებით რეალიზაციას უკეთებს.
სავარაუდოდ, რუსული ემბარგო ყურძნის ფასზე გავლენას მოახდენს. თუმცა კარგად გვახსოვს შარშანდელი წელი, რომელიც რუსეთის ბაზარმა განაპირობა - ეს იყო ყველაზე მაღალი ფასი, რომელიც ისტორიაში დაფიქსირდა. ამხელა ფასი ქართულ ყურძენს არასდროს ჰქონია, ეს იყო 3 ლარი და 15 თეთრი",- ამბობს როსტომ სესიაშვილი.
რაც შეეხება თავად ქართული ღვინის მწარმოებელ კომპანიებს, შპს "კახური ტრადიციული მეღვინეობის" გენერალური დირექტორის, ზურაბ ჩხაიძის თქმით, მოსალოდნელი რუსული ემბარგო სასიამოვნო არ იქნება, მაგრამ მათი კომპანია ალტერნატიულ ბაზრებს ყოველთვის ეძებს.
"არ ვფიქრობ, რომ ამას ემბარგოს სახე ექნება, რა თქმა უნდა, სასიხარულო არ იქნება, მაგრამ ალტერნატიული ბაზრების მოძიება ჩვენ არც არასდროს შეგვიჩერებია და ყველა ქვეყანაში აქტიურად ვმუშაობთ. ეს არ არის მხოლოდ რუსეთისა და ახლო მეზობლების პრობლემა და მსყიდველუნარიანობა მხოლოდ ქართულ ღვინოზე არ არის დავარდნილი, ზოგადად მსოფლიოშია ეს პრობლემა.
ამჟამად ჩვენ დაახლოებით 15 ქვეყანასთან ვმუშაობთ, შარშან გვქონდა წარმატება ტაილანდის ბაზარზე, წელს რამდენიმე ბაზართან ვმუშაობთ და ვფიქრობ, წლის ბოლოს კიდევ ერთ აზიურ ბაზარზე შევალთ. რუსეთშიც შეგვაქვს ჩვენი პროდუქცია, რამდენიმე კონტრაქტი გვაქვს გაფორმებული, რისი მეშვეობითაც რუსეთში შევდივართ", - ამბობს ზურაბ ჩხაიძე.
მისივე თქმით, ყურძნის ჩაბარების ფასს ბაზარი ადგენს, ეს არის მოთხოვნისა და მიწოდების შუალედური ფასი და ის რთველის პერიოდში დგინდება.
"რაც შეეხება იმოქმედებს თუ არა ყურძნის ჩაბარების ფასზე რუსული ემბარგო, აქ რამდენიმე ფაქტორია გასათვალისწინებელი. ზოგადად, არც ემბარგო გვაქვს და არც ფასის დაწევაზე ყოფილა საუბარი, ფასი იქნება საბაზრო, მაგრამ თვითონ გაყიდვებიდან გამომდინარე ვფიქრობ, რომ შარშანდელი ფასი არ იქნება, ხოლო ემბარგოს მოლოდინში წინასწარ პროგნოზის გაკეთება გამიჭირდება, ვინაიდან გარდა რუსეთისა, არის სხვა ბაზრები და სხვა პროდუქცია", - ამბობს ზურაბ ჩხაიძე.
შპს "წინანდლის ძველი მარნის" დამფუძნებელის, ელდარ მილდიანის თქმით, რუსული ემბარგოს დაწესების შემთხვევაში ყურძნის ჩაბარების ფასი დაეცემა.
"ჩვენ ღვინო გაგვაქვს პოლონეთში, კანადაში, ჩინეთში და ა.შ. რა თქმა უნდა, ყველა ქვეყანაში სხვადასხვა რაოდენობის პროდუქტი გაგვაქვს და ემბარგოს დაწესების შემთხვევაში, რა თქმა უნდა, ალტერნატიულ გზებზე ვმუშაობთ.
რაც შეეხება ფასს, სახელმწიფო ადგენს ფასს, შარშან ჩაბარების ფასი 3 ლარი და 15 თეთრი იყო, წელს იმედია ნორმალური ფასი იქნება, რომ ჩვენც შეგვეძლოს ნორმალურ ფასად გაყიდვა, რადგან გლეხსაც ხელი შეეწყოს და ჩვენც", - ამბობს ელდარ მილდიანი.
თაკო ესებუა
AMBEBI.GE
