ვიქტორ იანუკოვიჩი ინტერპოლის ძებნილთა სიაში აღარ არის

ინტერპოლის ძებნილთა სიაში უკრაინის ყოფილი პრეზიდენტი, ვიქტორ იანუკოვიჩი აღარ არის. ამის შესახებ ტელეკომპანია "დოჟდი" იტყობინება.

"2015 წლის 16 ივლისს ინტერპოლმა ვებგვერდიდან ძებნილთა სიაში იანუკოვიჩის შესახებ ინფორმაცია წაშალა და პრეზიდენტის შესახებ ინფორმაციაზე წვდომა დაბლოკა", - ნათქვამია იანუკოვიჩის ადვოკატების განცხადებაში.

ვიქტორ იანუკოვიჩი 2010 წლის 25 თებერვალს აირჩიეს უკრაინის პრეზიდენტად, გასული წლის თებერვალში კი ის კიევში მასობრივი დემონსტრაციების შედეგად გადააყენეს. 2015 წლის იანვარში ინტერპოლმა იანუკოვიჩი ძებნილთა სიაში შეიყვანა. უკრაინის მთავრობა მას მილიონობით დოლარის მითვისებაში ადანაშაულებს. ამ დროისათვის ვიქტორ იანუკოვიჩის ადგილსამყოფელი უცნობია, ის სავარაუდოდ, კვლავ რუსეთში იმყოფება.

"ინტერპრესნიუსი"