!["როცა ადამიანს შეუძლია, პატიმარ ქალს [მზია ამაღლობელს] ცილისწამებით შეეხოს, არაკაცობაა" - ანდრო ჭიჭინაძე ირაკლი კობახიძეზე](https://cdn.ambebi.ge/media/__thumbs__/images/2025/04-24/chichinadze10-51179.webp)
24
აპრილიდღის ზოგადი ასტროლოგიური პროგნოზი
ახალი წელი თბილისის რესტორნებისთვის უჩვეულოდ ინტერნაციონალური აღმოჩნდა. ერთ-ერთ რესტორანში ახალ წელს მეც შევხვდი, სადაც შოუპროგრამაც მრავალფეროვანი გახლდათ და მენიუც. ქართული ესტრადის მომღერლები რესტორნიდან რესტორანში გადარბოდნენ 2-3 სიმღერის შესასრულებლად, ეს ხომ მათთვის საახალწლოდ შემოსავლის წყაროა.
რაც შეეხება იმ რესტორანს, სადაც ახალი წლის დადგომას შამპანურის ბოკალით ხელში შევხვდი, - იქ ქართველების გარდა, უამრავი უცხოელი იმყოფებოდა, მათ შორის: თურქები, ეგვიპტელები, სირიელები და შოტლანდიელებიც კი. უმეტესობა მაინც, მეზობელი სომხეთიდან გახლდათ. როგორც რესტორნის მენეჯერისგან შევიტყვე, საახალწლო შოუპროგრამაზე დასასწრებად და ქართული ტრადიციული სამზარეულოს დასაგემოვნებლად 230 გაყიდული ბილეთის 70 პროცენტი სომხეთის მოქალაქეებმა შეიძინეს.
მიუხედავად იმისა, რომ ყველა ახალი წლის დადგომას ზეიმობდა, პროფესიულმა ინტერესმა არ მომასვენა და ერთი და იგივე კითხვა მეზობელი ქვეყნის რამდენიმე მოქალაქეს დავუსვი: რატომ გადაწყვიტეთ, ახალ წელს თბილისში შეხვედროდით?
არმენი:
- ახალ წელს რესტორნები ერევანშიც მუშაობს, მაგრამ იქ ახალი წლის აღნიშვნა ხუთჯერ ძვირი დაგვიჯდებოდა. ამიტომ აქ ვარჩიეთ წამოსვლა.
- ამხელა გზის გამოვლა გიღირდათ? თან - სიცივეში...
არტური:
- ეს რა სიცივეა? ერევანში 10-20 გრადუსი ყინვაა!.. აქ ოჯახთან ერთად ჩამოვედი. სასტუმროში გავჩერდით. რაც ერევნის რომელიმე რესტორანში უნდა დაგვეხარჯა, აქ მთელი კვირა გვეყოფა გასართობად.
გაიანე:
- ჩემი მეგობრები და ნათესავები სულ თბილისში ხვდებიან ახალ წელს. წელს ჩვენც გადავწყვიტეთ, აქ აღგვენიშნა ეს დღესასწაული. ერევანში ყველაფერი ძვირია. აქ ლილოს ბაზრობაზეც წავალთ და რაღაცებს ვიყიდით. ერევნის ბაზრებზე ლილოდან ჩამოაქვთ საქონელი სავაჭროდ.
- ამბობთ, ნათესავები და მეგობრები წლებია, თბილისში ატარებენ ახალ წელსო. დაბალი ფასის გარდა, კიდევ რა მოგწონთ თბილისში?
კარინა:
- მიუხედავად იმისა, რომ საქართველო მეზობელი ქვეყანაა, მაინც საზღვარგარეთად ითვლება. ჰოდა, ახალ წელს საზღვარგარეთ ვხვდებით (იცინის). საშუალება გვეძლევა, დავათვალიეროთ თბილისი, წავიდეთ ღამის კლუბებში, - მოკლედ, ლამაზად გავატაროთ ახალი წლის დღესასწაულები. აქ ნათესავებიც გვყავს და მათაც მოვინახულებთ. ჩემი ერევნელი მეგობრები ურეკში წავიდნენ ახალი წლის აღსანიშნავად.
- ზამთარში რა უნდათ ურეკში?
- ზაფხულში მეც ვიყავი დასასვენებლად ურეკში. ასე მოინდომეს ჩემმა მეგობრებმა. კერძო სასტუმროს მეპატრონეს დაურეკეს და შეუკვეთეს. სთხოვეს, 4 დღით მათთვის გაეხსნა სასტუმრო.
- რაც შეეხება რესტორნის მენიუსა და შოუპროგრამას, ალბათ მოგეწონათ და ამიტომ აარჩიეთ აქ ახალი წლის შეხვედრა, არა?
შოღიკ:
- ჩემს ეჩმიაძინელ ნათესავებსაც უნდოდათ ამ რესტორანში ახალი წლის შეხვედრა, მაგრამ ადგილები აღარ იყო და სხვა რესტორანში წავიდნენ. ერევანშიც კარგი კერძები იციან, მაგრამ ქართული სუფრა მაინც სულ სხვაა... რაც შეეხება შოუპროგრამას, აქ ცნობილი მომღერლები მღერიან. რამდენიმე მათგანი ვიცანი - ისინი 2 წლის წინ ქართულ-სომხურ მუსიკალურ პროექტში მონაწილეობდნენ. ჩვენთან სომხურ სიმღერებსა და ჯაზს ასრულებენ, აქ კი მსოფლიო ჰიტებიც სრულდება. ერევანშიცაა სხვადასხვა სახის გათამაშება და სახალისო ვიქტორინა და აქაც. მოკლედ, დაბალი ფასების გამო ვართ აქ.
სომხური სიმღერების აჟღერება სტუმრების მხიარულების კულმინაცია აღმოჩნდა. მხიარულ მოტივებზე სხვა სტუმრებიც აცეკვდნენ. თავიანთი კულტურის წარმოსაჩენად, თურქები და არაბებიც გაისარჯნენ და მუსიკოსებს შეკვეთა შეკვეთაზე მისდიოდათ "ჰაბიბისა" და ცნობილი თურქი მომღერლის, ტარკანის რეპერტუარის შესასრულებლად.
ჩამოსული სტუმრების სიმრავლის შესახებ ინფორმაცია სხვა რესტორნებშიც მოვიძიე და აღმოჩნდა, რომ უცხოელი კლიენტურის ნაკლებობას არც იქ უჩიოდნენ. ასე რომ, საქართველოში თუ შეიძლება, რაიმეთი ვიამაყოთ, ერთ-ერთი - სარესტორნე ბიზნესია.
გიორგი ბერიძე
(გამოდის ხუთშაბათობით)
