შსს-მ ცოლ-შვილის მკვლელობაში ბრალდებული დააკავა

თბილისის მთავარი სამმართველოს დეტექტივების სამმართველოს თანამშრომლებმა 1980 წელს დაბადებული გოჩა ფ. ოჯახის წევრების მკვლელობის ფაქტზე, მომხდარიდან რამდენიმე წუთში, შემთხვევის ადგილზე დააკავეს.

როგორც "ინტერპრესნიუსს" შსს-დან აცნობეს, დაკავებულმა თბილისში, საკუთარ საცხოვრებელ სახლში, მეუღლეს - 1983 წელს დაბადებულ თამუნა ბ.-სა და მცირეწლოვან შვილს - 2008 წელს დაბადებულ გოგონას ცივი იარაღით სხეულზე მრავლობითი მძიმე დაზიანება მიაყენა. დედა-შვილი მიყენებული ჭრილობებით ადგილზე გარდაიცვალა.

მოგვიანებით, გოჩა ფ-მ თვითმკვლელობის მიზნით, დანის გამოყენებით, სხეულზე მრავლობითი დაზიანება მიიყენა. სამართალდამცველებმა დაკავებული სამედიცინო დახმარების მიზნით ღუდუშაურის საავადმყოფოში გადაიყვანეს.

გამოძიება ორი ან მეტი პირის განზრახ მკვლელობის ფაქტზე მიმდინარეობს (სსსკ-ის 109-ე მუხლის მე-3 ნაწილის "ა" ქვეპუნქტით).

"ინტერპრესნიუსი"