ჯადოქრებზე მონადირე ჯემა არტერტონი

მსახიობმა უკვე მოასწრო ბონდის ერთ-ერთ გოგონად ყოფნა "მოწყალების კვანტში" და ტამინას თამაში ფილმში "სპარსეთის პრინცი: დროის ქვიშები". "ჯადოქრებზე მონადირეების" გადაღებების დროს არც ისე იოლი პერიოდი ჰქონდა: მძიმე სამოსს ატარებდა და მართალ ჩხუბს სწავლობდა. 27 წლის ჯემა არტერტონი მომავალშიც უკეთეს და უკეთეს როლებს ელის.

"გადაღებები მძიმე იყო"

- "ჯადოქრებზე მონადირეები: ჰენ­­ზელი და გრეტელი" საკმაოდ დიდი პროექტია თქვენთვის...

- ნამდვილად ასეა. ჯერ ერთი, ეს ჩემი პირველი როლია ასეთი ჟანრის ფილმში. მეორეც, ყოველთვის მიყვარდა გრეტელის ტიპის თამამი გოგონები, სერიოზული საფრთხის შემთხვევაში კი მამაკაცის ძლიერი მხარიც მედგა გვერდში - ჯერემი რენერის. ეს ფილმი შესანიშნავი შესაძლებლობა იყო საკუთარი თავის გამოსავლენად და რაღაც ახლის სასწავლებლად. მიუხედავად იმისა, რომ გადაღებები მძიმე იყო, ყველაფერი ძალიან მომეწონა.

- მოგიწიათ მთავარი როლისთვის ბრძოლამ? როგორც, მაგალითად, ეს იყო ბონდის გოგონას როლისთვის "მოწყალების კვანტში". ამ­ბობენ, თქვენ ერთ-ერთი იყავით 1500 პრეტენდენტს შორის...

- ჯეიმს ბონდის შემთხვევაში ყველაფერი მარტივია, ისინი ყოველთვის ასე ამბობენ (იცინის). ბონდიანას შემქმნელებს უყვართ იმის ჩვენება, თითქოს აგენტი 007-ის გოგონას მთელ ქვეყნიერებაზე ეძებენ. მაგრამ აქ ვერასდროს გაიგებ, რა არის მართალი და რა - არა. ასეა "ჯადოქრებზე მონადირეების" შემთხვევაშიც. ჯერემი ამბობდა, რომ ის და რეჟისორი ტომი ვირკოლა გრეტელის როლის შემსრულებელს ძალიან დიდხანს ეძებდნენ. მათვის ძალიან მნიშვნელოვანი იყო, სწორად ეპოვათ გოგონა. მე ვერ შევძელი გასაუბრებაზე მისვლა, მე ხომ მაშინ ლონდონში გახლდით, ამიტომ სასინჯი ვიდეო გავგზავნე. განვიცდიდი: ჩანაწერი ვერ შეედრებოდა იმას, როცა ტექსტს მსახიობთან ერთად კითხულობ. თავდაჯერება მაკლდა. მერე ტომი ჩამოვიდა ლონდონში და შემხვდა. ჯერემის კი უნახავს ბრიტანული მოკლემეტრაჟიანი ფილმი "ელის კრიდის გაუჩინარება", რომელშიც მთავარ როლს ვასრულებდი. ვფიქრობ, ორივეს მოეწონა ჩემი ტიპაჟი: ერთი მხრივ, საწყალი ვჩანვარ, მეორე მხრივ კი - ძლიერი. გასაუბრების მერე გრეტელის როლზე დამამტკიცეს.

- ფილმში საინტერესო კოსტიუმი გაცვიათ...

- ო, ეს შესანიშნავი ჟაკეტი... ის ისეთ ძალას მმატებდა. თავს ქალურად ვგრძნობდი, თუმცა კი საშინლად მძიმე იყო. მე და ფილმის მხატვარმა მარლენ სტიურტმა ბევრი ვიმუშავეთ, რომ სასურველი შედეგი მიგვეღო. სამოსი ხომ წელვადიც უნდა ყოფილიყო, რომ ილეთები შემესრულებინა და იმავდროულად ისეთი შთაბეჭდილება შექმნილიყო, რომ ნამდვილი მონადირე ვარ.

- რა იყო ნამდვილი გამოცდა გადაღებების დროს?

- ასეთი გაქანების ფილმი საკმაოდ სწრაფად გადავიღეთ: 3,5-4 თვეში. საშინელი სისწრაფით ვმუშაობდით და ამ სისწრაფემ ფილმს საჭირო ენერგიაც მიანიჭა. ასეთი სამუშაოსგან კმაყოფილება მივიღე. ახლა მესმის, რატომ უყვართ ახალგაზრდა მსახიობებს ექშენში მუშაობა: დიდი რაოდენობის სამუშაო ენით აუწერელ სიამოვნებას გაძლევს.

- თუ გაგრძელდება ჰენზელისა და გრეტელის ამბავი და თუ გიხილავთ ისევ ეკრანებზე?

- სიამოვნებით ვითამაშებდი კიდევ ერთხელ გრეტელს, რადგან ეს კარგი გამოცდილებაა. და შესანიშნავად გავატარეთ დრო! კარგი ჯგუფი იყო... ვნახოთ, იქნებ გაგრძელდეს კიდეც.

დოსიე

ჯემა არტერტონი ინგლისის ქალაქ გრეივსენდში დაიბადა, დამლაგებლისა და მლესავის ოჯახში. უმცროსი და ჰყავს - ჰანა ჯეინ არტერტონი.

გრეივსენდის გოგონათა სკოლაში სწავლის პერიოდში სცენური ოსტატობის კურსებსაც ესწრებოდა. 16 წლისამ მიატოვა სკოლა და კოლეჯში ჩააბარა, თუმცა იქაც დიდხანს არ უსწავლია, დრამატული ხელოვნების სამეფო აკადემიის გრანტი მიიღო და გადავიდა.

2007 წელს მიიღო პირველი როლი სტივენ პოლიაკოფის ტელედრამაში "მერის დაპყრობა". ასევე თამაშობდა ლონდონის თეატრ "გლობუსის" სცენაზე. მის ფილმებს შორის, "ბონდისა" და "სპარსეთის პრინცის გარდა", ასევე არის ფილმები "თანაკლასელები", "სამნი გასაგდებად" და ა.შ. სულ მალე გამოვა ჯერემი რანერის ახალი კრიმინალური ტრილერი, რომელშიც ჯემა ბენ აფლეკსა და ჯასტინ ტიმბერლეიკს გაუწევს პარტნიორობას.

რაც შეეხება პირად ცხოვრებას, ჯემა 2010 წელს გაჰყვა ცოლად გაყიდვების მენეჯერ სტეფანო კატელის, თუმცა 2012 წლის ბოლოდან მასთან აღარ ცხოვრობს.

ჟურნალი "რეიტინგი"

(გამოდის ორშაბათობით)