სერგეი ბეზრუკოვი - "ერთხელ და სამუდამოდ ვთქვი უარი!"

პოპულარული რუსი მსახიობი სერგეი ბეზრუკოვი "ბედის ირონიის" შემდეგ კიდევ ერთი კლასიკური საბჭოთა კომედიის რიმეიკში - "იღბლიან ჯენტლმენებში" გამოჩნდა. 1971 წელს გადაღებული ცნობილი კინოფილმის რიმეიკი ისეთივე შედევრად ვერ იქცა, თუმცა საახალწლოდ ბევრს მოჰგვარა ღიმილი და ბევრიც კარგად ახარხარა, შემქმნელებს კი კარგი ფულიც მოუტანა.

"ძველი ფილმების მიხედვით გადაღებულ სურათებს ხშირად აფუჭებენ"

-  სერგეი, თავის დროზე ფილიპ კირ­კოროვი სერიოზულად გაბრაზდა, როცა რემიქსების მეფედ დაასახელეს. არ გეშინიათ, რომ თქვენც რიმეიკების მეფე გი­წოდონ?

-  არ ვფიქრობ, რომ ეგ მემუქრებოდეს. თუნდაც იმიტომ, რომ რიმეიკები ერთმანეთისგან განსხვავდება. საკმაოდ ძნელად მივიღე ახალ "ჯენტლმენებში" მონაწილეობის გადაწყვეტილება. მეც ეჭვით ვუყურებ ძველი საბჭოთა ფილმების გაახლებას. გარდა იმისა, რომ მსახიობი ვარ, ისეთივე მაყურებელი გახლავართ, როგორიც ყველა. სიამოვნებით დავდივარ ახალი ფილმების სანახავად. კეპს ვიხურავ, სათვალეს ვიკეთებ, შარფში ჩავრგავ სახეს და ვუყურებ. თუმცა იშვიათად ვახერხებ ინკოგნიტობის შენარჩუნებას - თუ მხედავენ დარბაზში, იყურებიან, ჩემს რეაქციას აკვირდებიან. თუმცა ძველი ფილმების მიხედვით გადაღებულ სურათებს ხშირად აფუჭებენ. მეც, როგორც კი გავიგე ახალი "ჯენტლმენების" შესახებ, ვიფიქრე, რომ ტყუილი წყლის ნაყვა იქნებოდა. თუმცა, ბედის ირონიით, ისეთი ადამიანები დაკავდნენ ამ სურათზე და ისე დამარწმუნეს, რომ გადაწყვეტილება მივიღე. იმპროვიზაციის საშუალება გვქონდა გადასაღებ მოედანზე, იყო თავისუფალი გარემო და ნიჭიერი, აზარტული, იუმორის გრძნობით დაჯილდოებული ადამიანების წყალობით ეს სურათი "იღბლიანი ჯენტლმენების" კლონი კი არ გახდა, არც პაროდია იმ მშვენიერი კომედიისა, არამედ სრულიად დამოუკიდებელი ფილმი. ყველამ დამოუკიდებელი გმირი შექმნა. მეც არანაირად არ შემიქმნია ევგენი ლეონოვის პერსონაჟის ასლი. ჩემთვის საინტერესო იყო ამ ფილმში თავის მოსულელება, ცელქობა, საკუთარი თავის დაცინვაც კი.

-  თუ ამისთვის მზად ხართ, მაშინ კიდევ ვიცინოთ თქვენზე. ალბათ იცით ასეთი ხუმრობა: "სიკვდილი არ არის საშიში. საშიშია, როცა სიკვდილის მერე შენს როლს სერგეი ბეზრუკოვი ითამაშებს"...

-  სამწუხაროდ, ვიცი. ამ ფრაზას ვალენტინ გაფტს მიაწერენ, თუმცა მას რომ შევხვდი, გულწრფელად მითხრა: "სერიოჟა, ხომ იცი, როგორ მიყვარხარ. დამიჯერე, მსგავსი არაფერი მითქვამს და ვერც ვიტყოდი". მე გულწრფელად ვწუხვარ, რომ ჭორიკანები ისეთ დიდ ოსტატებს მიაწერენ რაღაცებს, როგორიც ვალენტინ გაფტია. მას რომ მართლა მოენდომებინა ჩემზე რაიმეს შეთხზვა, გაცილებით უფრო ნიჭიერად შეთხზავდა.

"ერთხელ და სამუდამოდ ვთქვი უარი ამ პროექტზე"

-  ისე მოხდა, რომ ბოლო წლებში გახმაურებულ, კომერციულ წარმატებაზე გათვლილ პროექტებში ხვდებით. ასეთ ღრმა და მრავალმხრივ მსახიობს არტკინო არ გენატრებათ?

-  სიამოვნებით ვითამაშებდი მსგავს პროექტებში, მაგრამ არ მიმიღია ასეთი წინადადებები. თუმცა ვერც იმას ვიტყვი, რომ მხოლოდ კომერციულ, გასართობ სურათებში ვთამაშობდი. იყო ფილმი "მატჩი", რომელიც კომერციულად წარმატებული არ ყოფილა, კარგი, პატრიოტული სურათია. ასევე ფილმი "ვისოცკი. გმადლობთ, რომ ცოცხალია", არანაირად არ არის კომერციული პროექტი. სერიოზული, ფსიქოლოგიური დრამაა. უბრალოდ, ხალხი მიეჩვია კინოში დასასვენებლად და გასართობად სიარულს.

-  ახსენეთ ფილმი "ვისოცკი...". ეს ფილმი მკაცრად გააკრიტიკეს ვისოცკის ახლობელმა ადამიანებმა - მარინა ვლადიმ, სტანისლავ გოვორუხინმა...

-  ვფიქრობ, რომ ეს ნაწილობრივ ეჭვიანობის გამოა, მათ სურთ ვისოცკი მიისაკუთრონ. ჩვენ ამ სურათში ვისოცკის პატივი და ღირსება არ შეგვილახავს, ყველა კადრში მის მიმართ პატივისცემა გამოვხატეთ.

-  ცნობილია, რომ უარი თქვით "ბრიგადა-2"-ში მონაწილეობაზე, რომელიც უკვე გამოვიდა ეკრანზე. არადა, თავის დროზე სწორედ "ბრიგადამ" მოგიტანათ პოპულარობა და თქვენი მომავალი მეუღლეც (მსახიობი ირინა ბეზრუკოვა - მთარგმ.) იქ გაიცანით... მესამე ნაწილის გადაღებაზეც ლაპარაკობენ...

-  არა, ერთხელ და სამუდამოდ ვთქვი უარი ამ პროექტზე და ეს საკმარისია.

დოსიე

სერგეი ბეზრუკოვი 1973 წელს დაიბადა მოსკოვში, მსახიობისა და რეჟისორის ვიტალი ბეზრუკოვის ოჯახში. ტაბაკოვის სკოლა-სტუდიის დამთავრების შემდეგ მისივე თეატრში მუშაობს დღემდე. 2002 წელს გადაიღეს სერიალში "ბრიგადა", რომელმაც წარმატება მოუტანა. ასევე მონაწილეობდა ფილმებში "ოსტატი და მარგარიტა", "პუშკინი. უკანასკნელი დუელი", "ბედის ირონია. გაგრძელება", "ჩინური სერვიზი", "იღბლიანი ჯენტლმენები"...

დიდი ხანია დაქორწინებულია, თუმცა შვილი ჯერ არ ჰყავს. ცოტა ხნის წინ ცნობილი გახდა, რომ მრავალი მცდელობის შემდეგ მისი ცოლი დაფეხმძიმდა და 47 წლის ასაკში გააჩენს შვილს.

სერგეი პოლიტიკური აქტივობითაც არის ცნობილი, პუტინის პარტია "ედინაია როსიას" წევრია. თუმცა 2012 წლის თებერვალში უარი თქვა პრეზიდენტობის კანდიდატ ვლადიმირ პუტინის მხარდამჭერ ვიდეორგოლში მონაწილეობაზე. თავისი გადაწყვეტილება იმით ახსნა, რომ არ სურდა, თავისი აზრით სხვა ადამიანების არჩევანზე მოეხდინა გავლენა. საინტერესოა, რომ იმავე მოსაზრებას არ შეუშლია მისთვის ხელი, თბილისში თეატრალურ ფესტივალზე ჩამოსულს, სპექტაკლის მსვლელობისას იმპროვიზებულად არცთუ კორექტულად გაექილიკებინა საქართველოს პრეზიდენტი.

ჟურნალი "რეიტინგი"

(გამოდის ორშაბათობით)