13 დაღუპული და 18 დაშავებული - რუსებმა ზაპოროჟიე დაბომბეს

რუსმა ოკუპანტებმა ზაპოროჟიეში სამრეწველო ობიექტი დაბომბეს, დაღუპულია 13, ხოლო დაშავებულია 18 ადამიანი.

ამის შესახებ ინფორმაციას ზაპოროჟიეს საოლქო-სამხედრო ადმინისტრაციის მეთაური, ივან ფედოროვი Telegram-ის პირად არხზე და მედიებთან საუბარში ავრცელებს.

თავდაპირველად 1 გარდაცვლილისა და 3 დაშავებულის შესახებ ვრცელდებოდა ინფორმაცია, თუმცა მოგვიანებით ფედოროვმა ქალაქში განმეორებითი აფეთქებების შესახებ განაცხადა.

უკანასკნელი მონაცემებით, რუსების დაბომბვას 13 ადამიანის სიცოცხლე შეეწირა, რომ 18 დაშავებულია. ფედოროვის თქმით, ადგილზე შვიდი სამედიცინო ბრიგადა მუშაობს, ისევე როგორც პოლიციელები და საგანგებო სიტუაციების სამსახურის თანამშრომლები.

• ამასთან, ვრცელდება ინფორმაცია, რომ უკრაინამ რუსეთში, სარატოვის ოლქში, ქალაქ ენგელსში მდებარე ნავთობის ბაზაზე უპილოტო საფრენი აპარატებით იერიში მიიტანა. იერიშის შედეგად ნავთობბაზაზე ძლიერი ხანძარი გაჩნდა.

აფეთქებები მოხდა ასევე ქალაქ სარატოვში.