"ჩვენი ქვეყანა, საქართველო, განსაცდელის წინაშე დგას და მე ვიცი, მჯერა, რომ..." - რა თქვა მეგი გოგიტიძემ მოსკოვში გამართულ კონცერტზე

მომღერალმა მეგი გოგიტიძემ 10 დეკემბერს მოსკოვში კონცერტი გამართა. როგორც ის "ფეისბუქის" ოფიციალურ გვერდზე წერს, რუსეთში ქართულ დიასპორას შეხვდა.

• კონცერტიდან კი ვიდეო გამოაქვეყნა, სადაც ქართულ და რუსულ ენებზე საქართველოში არსებული ვითარების შესახებ საუბრობს და ამბობს, რომ "ყველაფერი კარგად იქნება".

"ჩვენ ყველამ ვიცით, რომ ამ წუთას ჩვენი ქვეყანა, საქართველო, განსაცდელის წინაშე დგას და მე ვიცი, მჯერა, რომ ის ისე გაივლის, ღირსეულად ამ განსაცდელს, როგორც უფლისთვის იქნება სათნო.

ნუ გეშინიათ, ყველაფერი კარგად იქნება", - ამბობს მეგი გოგიტიძე.

ცნობისთვის, საქართველოს მასშტაბით საპროტესტო აქციები 28 ნოემბრის შემდეგ მიმდინარეობს. სწორედ ამ დღეს პრემიერ-მინისტრმა ირაკლი კობახიძემ განაცხადა, რომ ხელისუფლება აჩერებს ევროინტეგრაციის მოლაპარაკებების პროცესს 2028 წლამდე. აღნიშნულ განცხადებას საზოგადოების მხრიდან მწვავე პროტესტი მოჰყვა. აქციები იმართება როგორც თბილისში, ასევე საქართველოს რეგიონებში. აქციები ხშირად სრულდება სპეცრაზმის მიერ დარბევით. ამ დროის განმავლობაში დააკავეს ათობით ადამიანი, ასევე ნაცემია ათობით მოქალაქე. ნიღბიანი, უცნობი პირები 7 დეკემბერს თავს დაესხნენ "ტვ პირველის" გადამღებ ჯგუფს და ფიზიკურად სასტიკად გაუსწორდნენ.