"მეცა, ტელეფონი გამტაცა და სახეში ჩამარტყა მუშტი. მის გვერდზე მყოფმა, ფეხებში წიხლები დამიშინა" - თავს დაესხნენ კიდევ ერთ ჟურნალისტს, რომელიც "ტვ პირველის" გადამღებ ჯგუფზე თავდასხმას იღებდა

"ტვ პირველის" გადამღებ ჯგუფს, ჟურნალისტ მაკა ჩიხლაძესა და ოპერატორ გიორგი შეწირულს სამსახურებრივი მოვალეობის შესრულების დროს ნიღბიანი პირები დაესხნენ თავს და ფიზიკურად სასტიკად გაუსწორდნენ. ირკვევა, რომ ნიღბიანმა პირებმა ასევე სცემეს ჟურნალისტი მაკა ჯანაშია და მისი და ეკა ჯანაშია, რომლებიც იღებდნენ "ტვ პირველის" გადამღებ ჯგუფზე თავდასხმას.

• აღნიშნულის შესახებ სოციალურ ქსელში წერს მაკა ჯანაშიას შვილი, მარიამ გოგიაშვილი:

"მაკა ჩიხლაძის და მისი ოპერატორის ცემის კადრებს იღებდნენ დედაჩემი და დეიდაჩემი ტელეფონებით. რის გამოც ტიტუშკებმა ორივეს წაართვეს ტელეფონი, სცემეს მაკა და თმით ითრიეს ეკა. მაკა არის კლინიკაში გადაყვანილი და ველოდებით ტომოგრაფიას. რა ჰქვია იმას, რაშიც ახლა ვცხოვრობთ, ადეკვატური სიტყვებით ვეღარ შევაფასებ. ეს ცხოველები და ორგანიზატორი სისტემა აუცილებლად აგებს პასუხს", - წერს მარიამ გოგიაშვილი.

• მოგვიანებით მაკა ჯანაშიამ მომხდარის შესახებ კლინიკიდან ისაუბრა:

"მივდიოდი რუსთაველზე, ბესიკის ქუჩა უნდა გაგვევლო, დავინახეთ რომ იქ იყო ყვირილი, ჩოჩქოლი, ცოტა ავიწიეთ ზევით, რომ შეგვეხედა ბესიკის ქუჩაზე, დავინახე რომ პატრულის მანქანასთან მაკა ჩიხლაძეს სპრეი შეასხა ვიღაც შავებში ჩაცმულმა ნიღბიანმა ადამიანმა. მაშინვე ჩავრთე ტელეფონის კამერა და წავედი რომ გადამეღო და დამეფიქსირებინა. ამასობაში მაკამ გაუხვია მეორე ქუჩაზე იმიტომ, რომ ეს ნიღბიანი ჯგრო გავიდა იმ ქუჩაზე, მაკა გაჰყვა და მეც გავყევი, ამასობაში ოპერატორიც დამეწია, იღებდა (ტვ პირველის ოპერატორი). და რომ ვიღებდი როგორ ეჭიდავებოდა მაკას ერთ-ერთი ნიღბიანი ადამიანი, ერთი ნიღბიანი მეცა, რომელიც დამამახსოვრდა იმით რომ ნიღაბზე ჰქონდა თეთრად გამოსახული ჩონჩხები.

მეცა, ტელეფონი, გამტაცა და სახეში ჩამარტყა მუშტი. მის გვერდზე მყოფმა, ფეხებში წიხლები დამიშინა, ამის შემდეგ გამოვედი იქიდან და შემდეგ გავიგე, რომ ოპერატორი უცემიათ, მძიმე მდგომარეობაში იყო", - ამბობს მაკა ჯანაშია.

• ნახეთ ასევე:
• “დამეტაკნენ, წამაქციეს, მირტყეს: “შე ბ**ო რას იღებო“, წიხლი მომაყოლა და მომაძახა...“ - რას ჰყვება მაკა ჩიხლაძე მასზე და ოპერატორზე თავდასხმის შესახებ
• “ვგრძნობდი, რომ “ბათინკებს“ მირტყამდნენ, ისე მაგრად მაჭერდნენ თავზე“ - “ტვ პირველის“ ოპერატორი გიორგი შეწირული
• "25 000 დოლარი, ვინც მაკა ჩიხლაძეზე და გიორგი შეწირულზე თავდამსხმელთა შესახებ ინფორმაციას მომაწვდის" - რას წერს "ტვ პირველის" დამფუძნებელი