"სამწუხარო იცით რა არის? იმ ვიდეოს გადაღების შემდეგ მარიამიც წააქციეს, გაზებიც აყლაპეს" - რას ჰყვება პეტრე კოლხი შვილის ვიდეოზე, რომელიც მთელ მსოფლიოში პოპულარულია

ცოტა ხნის წინ თითქმის ყველა სოციალურ პლატფორმაზე გავრცელდა თბილისში, რუსთაველის გამზირზე გადაღებული ვიდეო. ტიკ-ტოკის რამდენიმეწამიან ვიდეოში ჩანს სპეცრაზმთან მდგარი ახალგაზრდა გოგონა, რომელსაც ძალოვანი ხელით ანიშნებს რომ მიუახლოვდეს და კამერის წინ ერთად პოზირებენ.

“თანამედროვე რომელო და ჯულიეტას“ სახელით გავრცელებულ ვიდეოს დღეს 10 მილიონი ნახვა აქვს. ამასთან, ის ძალიან ცნობილმა გლობალურმა გვერდებმა და ინფლუენსერებმა გააზიარეს.

• როგორც აღმოჩნდა, კადრებში ასახული მთავარი გმირი, პეტრე კოლხის ქალიშვილი -მარიამ კვარაცხელიაა.

AMBEBI.GE პეტრე კოლხს ესაუბრა. როგორც აღმოჩნდა, ვიდეოს საკმაოდ მოულოდნელი გაგრძელებაც აქვს, რომელიც არც თუ ისეთი რომანტიკულია, როგორ განწყობასაც კადრები ტოვებს.

“წლების წინ, მარიამის მიმართ იყო გასაოცარი ბულინგი იმის გამო, რომ მდინარეში ტუნიკით ჩავიდა. მაშინ ფოტოები ჩემს სოციალურ გვერდზე განვათავსე, რომ ბევრი მოწონება ჰქონოდა. მისი ბავშვური ახირება იყო და ძალიან უწყინარი ფოტოები. თუმცა, 10 წლის წინ, ერის ძალიან დიდმა ნაწილმა ჩაწიხლა და მაშინ მარიამი ყოველდღიურად იმდენად მძიმე ფსიქოლოგიურ სტრესს გადიოდა, რომ რთულად გადასატანი იყო ოჯახის წევრებისთვისაც.

მას მერე გავიდა დრო. უნივერსიტეტი წარჩინებით დაამთავრა, მაგისტრატურასაც ამთავრებს და უცხოეთშიც ჩააბარა. ახლა აპირებს გერმანიის ერთ-ერთ უნივერსიტეტში წასვლას, თუმცა მანამდე მეგობრებთან ერთად დააარსეს სტუდენტური მოძრაობა “ნაბიჯი“, რომელიც ძალიან რეიტინგულია.

• პირგავეშებული ებრძვის ამ რეჟიმს, ისევე, როგორც ყველა ჩვენგანი. ყოველდღიურად გამოდიოდა მარიამი აქციაზე თავის მეგობრებთან ერთად.

როგორც კი რუსთაველზე ძალების გამოყენება იწყებოდა, მარიამი მიდიოდა, პოლიციელებს ცხვირწინ უდგებოდა, რომ ამით პროტესტი გამოეხატა. ესაუბრებოდა - “ნუ ურტყამთ ახალგაზრდებს, ნუ სცემთ, ნუ იყენებთ ძალებს ჩვენს წინააღმდეგ, ჩვენს ამ ქვეყნის მოქალაქეები ვართ -თქვენს ამ ქვეყნის“ და ა.შ.

ვფიქრობ, ეს ვიდეორგოლიც ზუსტად იმისთვის ჩაწერა, რომ გამოეხატა დამოკიდებულება ადამიანების მიმართ და ისინიც თავის მხარეს გადმოეყვანა. გარკვეულწილად გამოუვიდა კიდეც. ჩანს, როგორ უყურებს ის პოლიციელი დაფარული სახიდან, ეს არის ერთგვარი ნიშანი იმისა, რომ ყველაფერი წარმავალია და ყველა ერთ მხარეს, სამშობლოს სადარაჯოზე უნდა ვიდგეთ.

• არავის აქვს უფლება იძალადოს ქართველ ხალხზე, ახალგაზრდობაზე, საქართველოს ევროპულ მომავალზე. დარწმუნებული ვარ, რომ ამ ვიდეომ პოზიციაც გაათბო, ოპოზიციაც, მტერიც და მოყვარეც.

ფაქტი სახეზეა - უკვე 10 მილიონი ნახვა აქვს. მსოფლიო დონის ბლოგერებმა წაიღეს. დარწმუნებული ვარ ეს ვიდეო თავის როლს შეასრულებს იმ ზონდერებისთვისაც და გაულღობს იმ გაყინულ გულებს. თუ რა თქმა უნდა გული გააჩნიათ.

ვფიქრობ, მარიამის ვიდეომ იმაზე მეტი გააკეთა, ვიდრე პოლიტიკოსები და დღევანდელი ხელისუფლების წარმომადგენლები აკეთებენ ჩვენი ქვეყნისთვის. თუკი ჩემი შვილის ღიმილმა და თვალების სილამაზემ ის ზონდერი გაალღო და გაათბო, იქნებ ეს მეთოდი გამოვიყენოთ? ულამაზესი გოგონების მეტი რა გვყავს. დავდგეთ, ვუთხრათ ამ ბიჭებს, რომ მათია ეს სამშობლო და მომავალი. ნუ ალეწავენ ამ გოგონებს თავყბას.

სამწუხარო იცით რა არის? იმ ვიდეოს გადაღების შემდეგ მარიამიც წააქციეს და გაზებიც აყლაპეს. მოიწამლა ჩემი შვილი და თვალები დასიებული ჰქონდა.

იხილეთ ასევე:

• "არა, რა სისულელეა! როგორ შეიძლება გაშორდე ექვსი შვილის დედას... ხშირად ჩამოვდივარ და სულ ერთად ვართ" - რას ჰყვება პეტრე კოლხი მეუღლესა და ექვს შვილზე
• "ჩემს შვილს ეკლესია შეაძულეს... ბევრმა სასულიერო პირმა დაგვწყევლა, მარიამი რომ ჯვრისწერის გარეშე გათხოვდა, ეს იყო დიდი პროტესტი" - პეტრე კოლხი