ვინ არის კიტ კელოგი, ვის დანიშვნასაც ტრამპი უკრაინისა და რუსეთის საკითხებში სპეციალურ წარმომადგენლად აპირებს და როგორ გეგმავს ომის დასრულებას?

აშშ-ის არჩეულმა პრეზიდენტმა, დონალდ ტრამპმა გადამდგარი გენერალ-ლეიტენანტი კიტ კელოგი რუსეთ-უკრაინის კონფლიქტის საკითხში სპეციალური წარმომადგენლის პოსტზე შეარჩია.

• აღნიშნული ინფორმაცია ტრამპმა Truth Social-ზე გაავრცელა. იქვეა აღნიშნული, რომ კელოგს რუსეთ-უკრაინის ომის დასრულების შესახებ გეგმა უკვე შემუშავებული და წარდგენილი აქვს.

“კიტს ჰქონდა გამორჩეული სამხედრო და საქმიანი კარიერა, მათ შორის მსახურობდა ძალიან მგრძნობიარე ეროვნული უსაფრთხოების პოზიციებზე ჩემს პირველ ადმინისტრაციაში“, - წერს ტრამპი.

აღსანიშნავია, რომ ამჟამად აშშ-ში უკრაინის ომის საკითხზე მომუშავე სპეციალური წარმომადგენლის თანამდებობა არ არსებობს, თუმცა ამ პოზიციის შექმნასთან დაკავშირებით, აშშ-ის პირველმა პირმა ინტერესი პირადად გამოხატა.

• ვინ არის კიტ კელოგი?

2017-2021 წლებში, ტრამპის პრეზიდენტობისას, კელოგი თეთრი სახლის ეროვნული უსაფრთხოების საბჭოს შტაბის უფროსის პოზიციას იკავებდა. ის ასევე იყო, მაშინდელი ვიცე-პრეზიდენტის, მაიკ პენსის მრჩეველი ეროვნული უსაფრთხოების საკითხებში.

ჟურნალისტები მას დონალდ ტრამპის ერთგულ მხარდამჭერს უწოდებენ.

ის არის America First Policy Institute-ის თანათავმჯდომარე. ორგანიზაცია 2021 წელს შეიქმნა და საგარეო და საშინაო პოლიტიკაში ტრამპის იდეების გავრცელება- ანალიზს ემსახურება. ორგანიზაციის ვებსაიტზე, კელოგის ბიოგრაფიაში აღნიშნულია, რომ მას აქვს დიდი გამოცდილება უსაფრთხოების სფეროში.

ის ასევე იყო კონსერვატიული ამერიკული ტელეარხის Fox News-ისა და ტელეარხ CNN-ის კომენტატორი.

• თავად გადამდგარი გენერალი პლატფორმა X-ზე წერს, რომ მზად არის დაუღალავად იმუშაოს მშვიდობის უზრუნველყოფისთვის.

“პატივი მერგო პრეზიდენტ დონალდ ტრამპისგან დავინიშნო პრეზიდენტის თანაშემწედ და სპეციალურ წარმომადგენლად უკრაინისა და რუსეთის საკითხებში. ამერიკის ინტერესების დაცვისას, მოუთმენლად ველი დაუღალავად მუშაობას “მშვიდობის ძალის მეშვეობით“ უზრუნველსაყოფად“, - აცხადებს კიტ კელოგი.

• რა გეგმა აქვს კელოგს რუსეთ-უკრაინის ომის დასასრულებლად?

კელოგმა უკრაინის შესახებ გეგმა ფრედ ფლეიცთან ერთად შეადგინა, რომელიც ტრამპის პრეზიდენტობის დროს ეროვნული უსაფრთხოების საბჭოს შტაბის უფროსი იყო.

1. Reuters-მა ივნისში გაავრცელა ინფორმაცია, რომ ომის დასრულების შესახებ კელოგის გეგმა გულისხმობს საბრძოლო ხაზების გაყინვას არსებულ ლოკაციებზე და კიევისა და მოსკოვის მოლაპარაკების მაგიდასთან დასხდომას.

2. გეგმის მიხედვით - აშშ ეტყვის უკრაინას, რომ ის მიიღებს უფრო მეტ ამერიკულ იარაღს მხოლოდ იმ შემთხვევაში, თუ სამშვიდობო მოლაპარაკებებს დაიწყებს. ამავდროულად, აშშ გააფრთხილებს მოსკოვს, რომ მოლაპარაკებაზე ნებისმიერი უარი გამოიწვევს უკრაინისადმი აშშ-ის მხარდაჭერის გაზრდას.

3. იმისათვის, რომ რუსეთი მოლაპარაკებებში მონაწილეობის მისაღებად წაახალისონ, შეერთებული შტატები და ნატოს სხვა ქვეყნები, ალიანსში უკრაინის გაწევრების საკითხის განხილვას გრძელი გარკვეული ვადით გადადებენ. თუმცა, უნდა შედგეს “მასშტაბური და ფართოდ შეთანხმებული უსაფრთხოების გარანტიები".

4. როგორც გეგმის ავტორები წერენ, უკრაინას არ მოსთხოვენ უარი თქვას რუსეთის მიერ მიტაცებული ტერიტორიის დაბრუნებაზე. თუმცა, კიევი უნდა დათანხმდეს, რომ ამ მიზნის მისაღწევად მხოლოდ დიპლომატიურ გზებს გამოიყენებს და გაიაზროს, რომ შესაძლოა პროცესს დიდი დრო დასჭირდეს.

5. გეგმის მიხედვით, იმისათვის, რომ რუსეთი დათანხმდეს შეთანხმებას, უნდა მოიხსნას ქვეყნისთვის დაწესებული სანქციების ნაწილი. თუმცა, უნდა დაწესდეს გადასახადები რუსეთის ენერგორესურსების იმპორტზე, თანხა კი უკრაინის რეკონსტრუქციას მოხმარდეს.

წყარო

იხილეთ ასევე:

• საგარეო პოლიტიკის "ქორი": ტრამპის რჩეული სენატორი მიგრანტთა ოჯახიდან, მკაცრი იმიჯით - ვინ არის აშშ-ის სახელმწიფო მდივნობის კანდიდატი მარკო რუბიო
• "ქორები" ტრამპის მომავალ ადმინისტრაციაში: რას უნდა ველოდოთ აშშ-ს საკვანძო თანამდებობებზე დასახელებული ადამიანებისგან: "რუსეთი უკმაყოფილოა წარმოდგენილი ფიგურებით"