"რუსების მიერ სამუდამო პატიმრობა მაქვს მოსჯილი, თანაც სამჯერ, 23 წელი რაღა პრობლემაა?!" - რას ამბობს მამუკა მამულაშვილი ოკუპანტი რუსეთის მარიონეტების გამოტანილ განაჩენზე?
სამუდამო პატიმრობა მაქვს მოსჯილი, თანაც სამჯერ, 23 წელი რაღა პრობლემაა?! - ასეთი რიტორიკული კითხვით ეხმაურება უკრაინაში მებრძოლი "ქართული ლეგიონის“ მეთაური მამუკა მამულაშვილი რუსეთის მიერ დროებით ოკუპირებული დონეცკის ე.წ. უზენაესმა სასამართლოს გადაწყვეტილებას, რომლის მიხედვითაც მას დაუსწრებლად 23 წლით თავისუფლების აღკვეთა მიუსაჯეს. მამუკა მამულაშვილთან ერთად, ე.წ. უზენაესმა სასამართლომ კიდევ სამ ქართველ მებრძოლს, გიორგი რუსიტაშვილს, ნოდარ პეტრიაშვილსა და ვანო ნადირაძეს 14 წლით თავისუფლების აღკვეთა მიუსაჯა. ე.წ. სასამართლომ მათ თავისუფლების აღკვეთა "დაქირავებული ჯარისკაცის შეიარაღებულ კონფლიქტში მონაწილეობის“ შესახებ მუხლით შეუფარდა.
“სასამართლომ დაადგინა, რომ 2014 წლის აპრილიდან 2024 წლის მაისამდე მამულაშვილმა უცხო ქვეყნებიდან, რომლებიც კონფლიქტის მხარეები არ იყვნენ, დაქირავებული მებრძოლების რეკრუტირება მოახდინა, უპირატესობა საქართველოს შეიარაღებული ძალების ყოფილ სამხედრო მოსამსახურეებს ენიჭებოდათ. ამის შემდეგ მან ისინი გაწვრთნა და მათი საომარ მოქმედებებში მონაწილეობა უზრუნველყო. ამისთვის ბრალდებულმა 23 მილიონ რუბლზე მეტის ეკვივალენტი მიიღო”, - ნათქვამია რუსეთის საგამოძიებო კომიტეტის განცხადებაში.
მამუკა მამულაშვილი:
- ეს არის სისხლის სამართლის მე-9 საქმე, რომელიც რუსეთის ფედერაციამ და მისმა მარიონეტებმა ჩემს წინააღმდეგ აღძრეს. სასჯელი ოთხჯერ შემიფარდეს, მათ შორის სამჯერ მუდმივი პატიმრობა მომისაჯეს. ძირითადად რუსი სამხედროების წინაშე ჩადენილ სამხედრო დანაშაულებს, ოფიცრების მკვლელობას და მსგავს რაღაცებს მედავებიან. რაც უნდათ იმას მოიგონებენ, ხელს რა შეუშლით?! სავარაუდოდ, დონეცკის ე.წ. სასამართლოს გადაწყვეტილება ჩემს წინააღმდეგ წამოწყებული მადისკრედიტირებელი კამპანიის ერთ-ერთი შემადგენელი ნაწილია. მათ სურთ, რომ სამხედრო დამნაშავეებად წარმოგვაჩინონ. მიზანმიმართულად ვრცელდება დეზინფორმაცია ჩემს წინააღმდეგ, ხან იმას მაბრალებენ, რომ მოწამლული არ ვიყავი და დავიბრალე და ხან რა სისულელეს.
- რუსები ყურადღებით აკვირდებიან უკრაინის წინააღმდეგ მებრძოლ ქართველებს, თუმცა, თქვენ მაინც განსაკუთრებული ყურადღების ცენტრში ხართ. როგორ გგონიათ, რა არის ამის მიზეზი?
- რუსები ზოგადად, საფრთხეს ხედავენ ადამიანებში, რომლებსაც იდეოლოგია აქვთ. "ქართული ლეგიონი“ არის ყველაზე დიდი უცხოური ლეგიონი უკრაინაში, რომელსაც იდეოლოგიასთან ერთად კარგი სამხედრო მომზადებაც აქვს. შესაბამისად, რუსეთისთვის ჩვენ განსაკუთრებულ საფრთხეს წარმოვადგენთ და 2014 წლიდან ორგანიზებულად გვებრძვიან, როგორც ინფორმაციული თვალსაზრისით, ასევე ფიზიკურადაც ცდილობენ ჩვენს განადგურებას.
- თქვენი მოწამვლის საქმეში თუ გამოიკვეთა რაიმე გარემოება?
- 12 კაცია უკვე ეჭვმიტანილი, მათ შორის არიან ამერიკის, უნგრეთის და ბრიტანეთის მოქალაქეები. გამოძიება ნამდვილად წინ მიიწევს.
- დავალების გამცემის ვინაობა თუ გამოაშკარავდა?
- დიახ, ესენი არიან რუსეთის სპეცსამსახურების თანამშრომლები. ჯერჯერობით ბევრ რამეს ვერ გავახმაურებ, თუმცა, ამის დროც მოვა.
ყველაზე მეტად გული იმაზე მწყდება, რომ ამ დეზინფორმაციულ კამპანიაში ქართული სპეცსამსახურები და მედიის ზოგიერთი წარმომადგენელიც ჩაერთო. მაგალითად, "იმედი", "რუსთავი-2" დიდი მონდომებით ავრცელებენ "რაშა თუდეის“ მიერ გავრცელებულ იმ ყალბ ინფორმაციას, რაც ჩემს დისკრედიტაციას ისახავდა მიზნად. რუსებისგან არაფერი მიკვირს, მე გული იმაზე მწყდება, რომ უკრაინაში მებრძოლი ქართველების წინააღმდეგ ბრძოლაში რუსულ სპეცსამსახურებს ქართველები რომ ეხმარებიან.
- ამის თქმის საფუძველს რა გაძლევთ?
- ფაქტები მაქვს, რომ რამდენიმე ადამიანი "ქართულ ლეგიონში“ სათვალთვალოდ და ამბების გადასაცემად შემოგზავნეს, უბრალოდ, ახლა, რიგი მიზეზებიდან გამომდინარე, მათ სახელებს არ დავასახელებ. ქართული უშიშროების რამდენიმე წარმომადგენელი ლეგიონის გარედან მუშაობს და გვითვალთვალებს. ეს მათ ჰგონიათ, რომ ჩვენ არაფერი ვიცით, სინამდვილეში ძალიან კარგად ვიცით, ვინ მუშაობს საქართველოს საგარეო დაზვერვიდან და ვინ უშიშროებიდან. ცუდი ის არის, რომ ქართული სპეცსამსახურები რუსულ სპეცსამსახურებთან არიან დაკავებულები, რაც თავისთავად ქვეყნის ღალატს ნიშნავს.
- როგორ გგონიათ საქართველოში ჩამოსვლა თქვენთვის საფრთხის შემცველია?
- დიახ, რა თქმა უნდა, თუმცა ეს არ არის მთავარი მიზეზი, რის გამოც საქართველოში ვერ მოვდივარ, შესაძლოა ჩემი ჩამოსვლა ვინმემ პროვოკაციად შეაფასოს, ამასთან დაიწვეს "ქართული ლეგიონის“ ეფექტურობის ხარისხიც. კი, ძალიან მინდა ჩამოსვა და ჩემი ოჯახის მონახულება, მაგრამ ახლა ეს არ გამოვა. აქ გავაგრძელებ ჩემს ბრძოლას რუსული იმპერიალიზმის წინააღმდეგ. მთავარია უკრაინამ ამ ომში გაიმარჯვოს, ალბათ მერე ქართული საზოგადოებაც თავის სიტყვას იტყვის.
- რაიმე ცვლილება, ხომ არ არის ფრონტის ხაზზე, რა გავლენა იქონია მებრძოლების განწყობებზე იმ ფაქტმა, რომ ბაიდენმა უკრაინას აშშ-ის მიერ მიწოდებული შორი რადიუსის რაკეტების რუსეთის ტერიტორიის სიღრმეში გამოყენების უფლება მისცა?
- ვერ ვიტყვი უკრაინას დიდი რაოდენობით აქვს შორს მსროლელი არტილერიის ამუნიცია - ჭურვები. შესაბამისად, ეფექტურობას ვერ გავზრდით, ვიდრე ჭურვებს არ გადმოგვცემენ. უკრაინამ წერტილოვანი დარტყმები განახორციელა, ძირითადად ლოჯისტიკურ ცენტრებზე, სადაც შეიარაღება ინახებოდა. თუმცა, ეს არ არის საკმარისი, უკრაინას ბევრად მეტი შესაბამისი იარაღი სჭირდება იმისათვის, რომ რუსეთს სერიოზული ზიანი მიაყენოს. რაც შეეხება, თავად ფრონტის ხაზს, ძირითადად, აქტიურ თავდაცვაზე ვართ გადასული, მაგრამ არის მონაკვეთები, სადაც წინ წავიწიეთ. უნდა, ითქვას, რომ ოპერატიული თავისუფლების მიცემის შემდეგ, უკრაინელების მოტივაცია ბევრად გაზიარდა.
- საქართველოში, ბოლო დროს განვითარებულ პროცესები რა განწყობებს გიქმნით?
- ისეთი შთაბეჭდილება მრჩება, რომ საქართველოში პოლიტიკოსები აღარ არიან და ყოფილმა ფეხბურთელებმა დაიწყეს ქვეყნის მართვა. შეურაცხყოფას არავის არ ვაყენებ, მაგრამ არც კი ვიცი, მიხეილ ყაველაშვილს პოლიტიკაში რა ესაქმება, პრეზიდენტად მით უფრო. ძალიან ვწუხვარ, ქართულ პოლიტიკაში მყოფი პირების 90% პროცენტს პატრიოტიზმის განცდა არ აქვს, ამას ვამბობ როგორც ხელისუფლებაში მყოფ პირებზე, ასევე ოპოზიციის ნაწილზეც. ის, რაც ახლა ქვეყანაში ხდება დიდწილად იმის ბრალიც არის, რომ ოპოზიციას არ აქვს ხალხის ნდობის მანდატი. ადამიანებს უნდათ ბრძოლა, ოპოზიცია კი საპროტესტო მუხტს ანელებს. ოპოზიციონერმა ლიდერებმა ქვეყნისთვის უმნიშვნელოვანეს მომენტშიც კი ვერ შეძლეს ვიწრო პარტიული ინტერესების დავიწყება და კონსოლიდირება. კონსოლიდირებას და ერთობლივი სტრატეგიის შემუშავებას რომ თავი დავანებოთ, ერთმანეთის ლანძღვა-გინებისგანაც კი ვერ შეიკავეს თავი. საქართველოს სუვერენიტეტის საკითხია გადასაწყვეტი და ოპოზიცია ერთმანეთის მიწაში ჩადებით არის დაკავებული. ევროპელი დამკვირვებლებმა თქვეს, რომ არჩევნები გაყალბდა, ოპოზიცია კი იმასაც ვერ ახერხებს, რომ ხელისუფლებასა და ხალხს შორის მედიატორის როლი მაინც შეასრულოს.
- უკრაინაში მყოფ ქართველებს თუ გაქვთ საქართველოში დაბრუნების ცდუნება და პოლიტიკურ პროცესებში ჩართვა?
- პირადად მე არანაირი ცდუნება არ მაქვს, საქართველოში ძალიან ბევრი ნიჭიერი და განათლებული ახალგაზრდაა, რომელსაც პოლიტიკაში ჩართვის სურვილი და ენერგია აქვს, მაგრამ მათი პოლიტიკაში შეშვება არც ხელისუფლებას უნდა და არც ოპოზიციას. ქართულ პოლიტიკაში მხოლოდ კორუმპირებული, მექრთამე და ხალხის მოტყუებაში დახელოვნებული პოლიტიკოსები აპირებენ თავის დამკვიდრებას. თუმცა, მინდა გითხრათ, რომ ეს მხოლოდ საქართველოს პრობლემა არ არის, პოსტსაბჭოთა სივრცის ყველა ქვეყანაში უჭირთ ძველი თაობის პოლიტიკოსებს ახალი თაობისთვის გზის დათმობა.
- თქვენი და ნონა მამულაშვილი ხომ არ აპირებს ქართულ პოლიტიკაში დაბრუნებას?
- ვერცერთ მხარეს ვერ ვხედავ პროფესიულთა გუნდს, რომელთან ერთადაც ქვეყნისათვის სასარგებლო საქმის კეთება შეიძლება. მე თავიდანაც წინააღმდეგი ვიყავი, მისი პოლიტიკაში ჩართვის, მაგრამ მან მაინც სცადა თავისი ბედი...
იხილეთ ასევე: