სიტყვიერი დაპირისპირება რუსთაველზე - პოლიცია აქციის მონაწილეთა კოლონებს რუსთაველის გამზირზე ავტომობილებით გადაადგილების უფლებას არ აძლევს

რესპუბლიკის მოედანზე შეკრებილ მოქალაქეებს, რომლებიც ავტოკოლონებით ცდილობენ პარლამენტთან მისვლას, პოლიცია ამის საშუალებას არ აძლევს.

აღნიშნულის გამო, აქციის მონაწილეებსა და სამართალდამცველებს შორის სიტყვიერი შელაპარაკების რამდენიმე ფაქტი იყო.

სამართალდამცავების მოწოდებაა, აქციის მონაწილეებმა მანქანები დატოვონ და რუსთაველის გამზირზე ფეხით გადაადგილდნენ.

“რუსთაველის გამზირი არის დაკეტილი, აქციის მონაწილეებს შეუძლიათ ფეხით მიბრძანდნენ, არანაირ შეფერხებას პოლიციის მხრიდან ადგილი არ ექნება", - განუცხადა ერთ-ერთმა სამართალდამცავმა აქციის მონაწილეებს.

“მანქანებში ყველა ის საშუალებაა, რომელიც საჭიროა ღამის თენებისთვის - ზოგ მანქანაში წყალია, ზოგში საკომუნიკაციო საშუალებები, ზოგში კარავია“, - ამის შესახებ „კოალიცია ცვლილებებისთვის" ლიდერმა, ნიკა მელიამ სამართალდამცავებთან საუბრისას განაცხადა.

• ნიკა მელიას განცხადებით, ღამისთევისთვის საჭირო საშუალებების შეტანის შემდეგ ავტომობილები რუსთაველის გამზირს დატოვებენ.

"რა აზრი აქვს გზის ჩახერგვას, პარლამენტში შეიჭრება მანქანა? მანქანა სატრანსპორტო შესაძლებლობაა. 30-40 მანქანაა, სხვადასხვა შესაძლებლობები აქვს. დეკლარირებულია, რომ ღამეს ვათენებთ. ზოგ მანქანაში წყალია, ზოგში საკომუნიკაციო საშუალებები, ზოგში კარავია. ჩაიხედეთ და ნახეთ, რაც არის. მანქანებში ყველა ის საშუალებაა, რომელიც საჭიროა ღამის თენებისთვის, ამიტომ გაუგებარია გადაწყვეტილება. რატომ გვაიძულებთ, რომ ვიჭიდაოთ? შემოსატანია რაღაცები და გავლენ ისევ", - განაცხადა ნიკა მელიამ

ამ წუთებში, რესპუბლიკის მოედანზე შეკრებილი აქციის მონაწილეები მსვლელობით საქართველოს პარლამენტისკენ სწორედ ფეხით მიემართებიან.

აქციის მონაწილეები 26 ოქტომბრის არჩევნების შედეგებს არ აღიარებენ, აღნიშნულ კონტექსტში კი ახალი პარლამენტის პირველ სხდომას აპროტესტებენ, რომელიც ხვალ უნდა გაიმართოს.