"ჩემი ჰონორარი დაბალი იყო, რადგან არ შემეძლო რეგიონის კონცერტებზე სიარული... მიშას პერიოდიდან ჩრდილში ვარ, ახლა ასე აღარ არის" - რას ჰყვება ეკა კვალიაშვილი?

"ქართული ოცნების” ფინანსური ანგარიშის მიხედვით, 8 ოქტომბრიდან 26 ოქტომბრის ჩათვლით, პარტიამ წინასაარჩევნო საკონცერტო ღონისძიებებში მონაწილეობისთვის არაერთი ცნობილი ადამიანი დაიქირავა, მათ შორის: მუსიკოსები, წამყვანები და მსახიობები. სიაში, რომელიც მედიაში გამოქვეყნდა, ვხედავთ, რომ მომღერლებმა ერთმანეთისგან მკვეთრად განსხვავებული ჰონორარები აიღეს.

• მაგალითად, ეკა კვალიაშვილის ჰონორარი 637 ლარია, იგივე თანხა აიღო დათუნა მგელაძემაც. რომა რცხილაძის ჰონორარი 3125 ლარით განისაზღვრა, სოფო ბედიამ 5739 ლარი აიღო, იუმორისტმა ჯიმო აბესაძემ კი 10 204 ლარი.

ეკა კვალიაშვილს ინტერვიუს ჩასაწერად დავუკავშირდით და ჩვენი საუბარი მისი ჰონორარის სიმცირით დაიწყო:

- ჩემი ჰონორარი უფრო მეტი იყო, მაგრამ დაბალი იყო, იმიტომ რომ მხოლოდ ორ კონცერტზე გამოვედი. ისინი ბევრ კონცერტებში მონაწილეობდნენ. მე ჩემი ჯანმრთელობის გამო, არ შემეძლო რეგიონებში სიარული.

- წერდნენ, რომ ეკა მაგ სიიდან ყველაზე კარგად მღერის და რატომ უნდა ჰქონდეს დაბალი ჰონორარიო...

- მერე ეკა თუ ყველაზე კარგად მღერის, სადაც საჭიროა იქ დაწერონ, ასე ერთმანეთს რომ წერენ, რა აზრი აქვს. ისე შევეჩვიე ამას, რომ მიშას პერიოდიდან ჩრდილში ვარ. ახლა ასე ძალიან აღარ, მაგრამ აკრძალული ჰქონდათ ჩემი სახელის ხსენება. რესტორანშიც ვერ შევდიოდი რომ კონცერტი ჩამეტარებინა, მაგ დროს დავკარგე ბინა, რომ ბანკის ვალი ვეღარ გადავიხადე. რა შედარებაა, უბრალოდ იმ პერიოდიდან მოყოლებული იმდენი ნერვიულობა გამოვიარე.

- ჯანმრთელობის მდგომარეობაც არ გიწყობთ ხელს...

- მქონდა გაფანტული სკლეროზის დიაგნოზი, აქ ვერ გაიგეს რა მჭირდა. იმდენი ანთებითი კერა მქონდა, რომ ექიმი დაიბნა, რადგან ასე ადამიანი ვერ ცოცხლობს, მე კიდევ ფეხზე დავდიოდი. საფრანგეთში რომ ჩავედი კლინიკაში, ექიმმა გამოკვლევის შემდეგ მითხრა, ეს არის გაფანტული სკლეროზი, მაგრამ არ გაქვს ისეთი მძიმე ფორმისო. ნემსები რასაც შეტევების დროს იკეთებენ, არ მინდა, რომ გაიკეთო, რადგან ახლა იმ ასაკში მიდიხარ, როდესაც ეს დაავადება უკან იხევსო, მაშინ 49 წლის ვიყავი.

მახსოვს ერთხელ ძალიან ცუდად ვიყავი და ქაშვეთის ეკლესიასთან გავიარე და შევქანდი. ცხონებული მამა ღვთისო ვნახე, ელიზბარიც იქ იყო, ვუთხარი, მამაო, თვალებში დაბნელებული მაქვს-მეთქი. ოლარი გადამაფარა და ლოცვა წამიკითხა, უცებ თითქოს თვალებში გათენდა. გავხდი კარგად... მთელი გულით გააკეთა ამ ადამიანმა. თან მე ძალიან ბევრი სანერვიულო მქონდა, მიშა, ნაციონალები და მთელი ეგ სატანისტები, ჩემთვის ეგ ხალხი მიუღებელია. მაგათი თაყვანისმცემლები ვარსკვლავები ვინც არიან, მაგათ გამო დამემართა.

- იქნებ თქვენც არ აფასებდით სათანადოდ თქვენს ნიჭს...

- საშუალებას არ მაძლევდნენ, თორემ მე კი ვაფასებდი ჩემს ნიჭს. ფინანსური საშუალებები მომისპეს, გაავრცელეს ჩემზე ჭორები. მახსოვს ერთხელ მოსკოვიდან ქართველმა ებრაელმა დამირეკა და მითხრა, ვაიმე, გენაცვალე, შიშით გირეკავდი, ასე მითხრეს, არ დაურეკო, თორემ გაგლანძღავსო. ხმები დამიყარეს, გოიმკა და უგემოვნოაო.

- სხვათა შორის ჟურნალისტებშიც არსებობს მსგავსი აზრი თქვენთან დარეკვაზე...

- იქიდან მოყოლებული ხდება ეს ამბავი, სპეციალურად ქნეს, რომ ჩემი პიროვნება ხალხისთვის უარყოფითად დაენახვებინათ. "პეროს" თემა ჩემთვის მიუღებელია, ჩემი ორგანიზმი და ჩხვლეტა მიუღებელია. კარგ, ქალაქურ ოჯახში გავიზარდე და მარო თარხნიშვილის შთამომავალი ვარ და ვიღაც მართლა გოიმმა ხალხმა დამიყარა მსგავსი ჭორები.

იცით, რატომ ვერ მიტანდა მიშა, არასოდეს არ ვაკადრებდი ჩემს თავს იმას, რაც მაგას უნდოდა. აქ არ არის საუბარი, ინტიმურ კავშირზე, იცით, თქვენ რასაც ვგულისხმობ და ამას არ გავაჟღერებ ხმამაღლა. ვერ დავიწყებდი ქალაქის ელიტასთან იმის ლაპარაკს, რომ ეგ კაცი იყო კარგი, იმიტომ, რომ ეგ კაცი არ იყო კარგი, ყველაზე ცუდი იყო, თუ რამე არსებობდა.

ჩემი დიდი ბებია მარო თარხნიშვილი ვასილ მჟავანაძესთან კაბინეტში რომ შედიოდა, იმხელა პატივისცემა ჰქონდა მისი, როგორც ხელოვანის, რომ თათბირზე რომ ყოფილიყო გამოდიოდა. „ნეტო შტო“, ვერ მიგიღებ, ვერ მიმიღებ და კარგად იყავი...

მიშას ხმას არ აძლევდა ქალაქის ელიტა, პერიფერიებში მოსწონდათ, კარგი ეგონათ, იმიტომ რომ გზები დააგო. ქვეყნის სათავეში რომ მოდიხარ, გზები არ უნდა დააგო, ყელში ამოუყვანა ხალხს და არ ჩამოვთვლი ახლა, რაც გააკეთა ცუდი, შორს წაგვიყვანს. იმიტომ ვერ მიტანდა და აკრძალა ეკა კვალიაშვილი ყველგან.

- ახლა როგორ ცხოვრობთ, ბინის პრობლემა თუ მოაგვარეთ?

- არ მომიგვარებია, ახლაც ნაქირავებში ვცხოვრობ, მაგრამ ძალიან ლამაზ და კარგ ბინაში, კმაყოფილი ვარ. ქირის გადახდაში გამგეობა მეხმარება. როდესაც ძალიან სერიოზულად გავიჭედე, ლაივშიც გამოვდიოდი, არ ვიცოდი სად დამეძინა. ბოლო წლებში ძალიან გაძვირდა ბინები, ყველა შუამავალი ორი თვის თანხას ითხოვდა თავიდან, მაშინ ვითხოვე დახმარება... ახლა საბედნიეროდ, როგორც გითხარით, ქირით, მაგრამ კარგ სიტუაციაში ვცხოვრობ.

წაიკითხეთ ასევე:

• ეკა კვალიშვილი - 637ლარი, ნიკა არაბიძე - 5625, სოფო ბედია - 5739 - კიდევ ვინ მიიღო “ქართული ოცნების” წინასაარჩევნო საკონცერტო ღონისძიებებში მონაწილეობ და როგორი მათი ანაზღაურება