კონორ მაკგრეგორს ქალის გაუპატიურებაში ადანაშაულებენ - "სპორტსმენმა ის საწოლზე მიაჭყლიტა, ქალს დაზიანებები დარჩა" - რა ხდება ცნობილი საქმის მასალებით?
შერეული საბრძოლო ხელოვნების ირლანდიელი მებრძოლი, კონორ მაკგრეგორი ქალის გაუპატიურებაში დაადანაშაულეს. არსებული ინფორმაციით, შემთხვევა დუბლინის ერთ-ერთ სასტუმროში მოხდა.
- სავარაუდო დაზარალებული, ნიკიტა ჰენდი მაკგრეგორისა და კიდევ ერთი მამაკაცისგან ზიანის ანაზღაურებას ითხოვს და ამტკიცებს, რომ მასზე სექსუალური ძალადობა განხორციელდა.
მაკგრეგორის ადვოკატებმა სასამართლოს განუცხადეს, რომ ჰენდი სპორტსმენის დაშანტაჟებას ცდილობს.
საქმის პროკურორმა ნაფიც მსაჯულებს განუცხადა, რომ სავარაუდოდ, ჰენდიზე სექსუალური ძალადობა 2018 წლის 9 დეკემბერს მოხდა. დანაშაულის ჩამდენი პირები კი კონორ მაკგრეგორი და ჯეიმს ლოურენსი არიან.
- ჰენდის ადვოკატმა ჯონ გორდონმა განაცხადა, რომ მისი დაცვის ქვეშ მყოფი მაკგრეგორს იცნობდა, რადგან ისინი ერთი ასაკობრივი ჯგუფიდან და ერთი რაიონიდან იყვნენ და საერთო მეგობრებიც ჰყავდათ.
2018 წელს ჰენდი დრიმნაგში თავის პარტნიორთან და შვიდი წლის ქალიშვილთან ერთად ცხოვრობდა. გორდონმა თქვა, რომ მაკგრეგორი "უზომოდ ცნობილი" იყო და დრიმნაგში "გმირად" ითვლებოდა.
საქმის მასალების მიხედვით, მაკგრეგორმა ჰენდისა და მის მეგობარს 8 დეკემბერს, საშობაო წვეულების შემდეგ გაუარა. ქალს ეგონა, რომ მაკგრეგორი მას და მის მეგობარს სხვა წვეულებაზე წაიყვანდა.
მოგვიანებით მათ ლოურენსი შეუერთდა და Beacon Hotel-ში წავიდნენ, სადაც ალკოჰოლისა და კოკაინის მიღება დაიწყეს. ერთ მომენტში, მაკგრეგორმა ჰენდის ანიშნა, რომ საძინებელში შესულიყო.
როგორც საქმის მასალებშია აღწერილი, მაკგრეგორი ჰენდის "მიუახლოვდა", მაგრამ ქალს სექსუალური კავშირი არ სურდა, რადგან მენსტრუალური ციკლი ჰქონდა. ჰენდი ამტკიცებს, რომ სპორტსმენმა ის "საწოლზე მიაჭყლიტა". ქალი ცდილობდა მის მოშორებას, მაგრამ ვერ შეძლო მის მოშორებას, მაგრამ ვერ შეძლო და მკერდზე სილურჯეები, ნაკაწრები და ჭრილობა დარჩა.
- სასამართლომ ასევე მოისმინა გინეკოლოგის ჩვენება, რომელმაც ჰენდის როტუნდას საავადმყოფოს გადაუდებელი დახმარების განყოფილებაში, 10 დეკემბერს გასინჯა.
ექიმმა დენიელ კეინმა აღნიშნა, რომ ქალი მთელი გამოკვლევის განმავლობაში "კანკალებდა და ტიროდა". კეინის თქმითვე, ჰენდის მრავლობითი დაზიანება აღენიშნებოდა. ამის ამსახველი ფოტოები მან სასამართლოს წარუდგინა.
ექიმმა აღნიშნა, რომ დაზიანებები საშუალოდან მძიმე ხარისხის იყო. სავარაუდოდ, მოგვიანებით მას სექსი ლოურენსთანაც ჰქონდა, მაგრამ ქალის თქმით "ეს არ ახსოვს".
ჰენდი შემდეგ დედასთან მივიდა, რომელმაც 999-ზე დარეკა. ის საავადმყოფოში სასწრაფო დახმარების მანქანით გადაიყვანეს.არსებული ინფორმაციით მაკგრეგორი დაზიანებებს "უხეშ სექსს" მიაწერს.
მოსალოდნელია, რომ საქმის განხილვა დაახლოებით ორი კვირის განმავლობაში გაგრძელდება.