სასიკვდილო წყალდიდობის წარმოუდგენელი მასშტაბები - დრონმა ვალენსიაში აპოკალიფსური სურათი გადაიღო: დაღუპულთა რიცხვი 158-მდე გაიზარდა (ფოტო/ვიდეო)
ვალენსიაში წყალდიდობის შედეგად დაღუპულთა რიცხვი 158-მდე გაიზარდა. ქვეყნის პოლიციამ დრონით გადაღებული კადრები გაავრცელა, სადაც სტიქიის წარმოუდგენელი მასშტაბები ჩანს.
წყალდიდობას ვალენსიასთან ახლოს, რეგიონში აპოკალიფსური ნგრევა მოჰყვა.
კადრებში ჩანს ათასამდე მიტოვებული მანქანები, დანგრეული ხიდები, განადგურებული საცხოვრებელი სახლები, დატბორილი ათიათასობით კვადრატული მეტრი და ტალახში ჩაფლული საცხოვრებელი უბნები.
“სამწუხაროდ, ზოგიერთ მანქანაში გარდაცვლილები არიან,“ - განაცხადა ესპანეთის ტრანსპორტის მინისტრმა ოსკარ პუენტემ.
წყლის ნაკადმა მთლიანი სოფლები გაანადგურა და ადამიანების უცნობი რაოდენობა კვლავ დაკარგულად ითვლება.
ესპანეთის პოლიციის განცხადებით, ტრაგედიას კიდევ უფრო ამძიმეს ის ფაქტი, რომ რეგიონში არსებული უმძიმესი მდგომარეობით მძარცველებმა ისარგებლეს და ათობით მიტოვებული მაღაზიიდან მაღალი ღირებულების საქონელი, მათ შორის კომპიუტერები, მობილური ტელეფონები და სუნამოები მოიპარეს.
ვალენსიის რეგიონში 39 ეჭვმიტანილი დააკავეს.
სამაშველო სამუშაოები გრძელდება და ხელისუფლებამ გუშინ სამაშველო მისიაში 1 200-ზე მეტი თანამშრომელი ჩართო, რომლებიც დრონების დახმარებით მოქმედებენ.
”ამჟამად ყველაზე მნიშვნელოვანი რამ არის რაც შეიძლება მეტი ადამიანის გადარჩენა”, - განაცხადა პრემიერ-მინისტრმა, პედრო სანჩესმა.
იხილეთ ასევე: