"ზოგჯერ არ მიწვევდნენ მსოფლიოს საუკეთესო ორკესტრები, თუმცა ვამბობდი: "არა უშავს, მარტო დავუკრავ" - რას ჰყვება ხატია ბუნიათიშვილი ვარსკვლავურ კარიერაზე
უკვე ათ წელზე მეტია, რაც ხატია ბუნიათიშვილი ერთ-ერთი ყველაზე ცნობილი პიანისტია. მის შესახებ ამჯერად Apnews.com წერს.
- "სწორედ მისი სასცენო ხასიათი, ემოციურობა, ენერგია და შარმი ქმნის ბუნიათიშვილს კლასიკური მუსიკის ვარსკვლავად", - წერს გამოცემა.
ბუნიათიშვილის შესახებ გამოქვეყნებულ სტატიაში ასევე აღნიშნულია, რომ საქართველოში დაბადებული ხატიას შემოქმედება კლასიკურ მუსიკას მიმზიდველს ხდის მილენიალებისა და Gen Z-ის თაობის წარმომადგენლებს.
- 37 წლის ქართველ პიანისტს, ჰქონია კოლაბორაცია ისეთ ცნობილ შემსრულებლებთან, როგორებიცაა Coldplay და A$AP Rocky,
"ვფიქრობ, რომ ძალიან მნიშვნელოვანია მაგალითის მიცემა ახალგაზრდებისთვის - სარკე და სელფები კარგია, მაგრამ ამ დროს ცხოვრების მნიშვნელოვანი მომენტები არ უნდა გამოგრჩეს", - ამბობს ბუნიათიშვილი. ის ასევე საუბრობს "ფორტეპიანოსთან უდიდეს კავშირზე".
"ის (ფორტეპიანო) თავიდანვე აქ იყო. ისევე, როგორც ჩემი მშობლები და ჩემი და იყვნენ როცა დავიბადე, ასევე იყო ფორტეპიანოც... მიუხედავად იმისა, რომ სხვა რამეებიც შემეძლო მეკეთებინა ცხოვრებაში, ეს ჩემთვის ოჯახივით იყო და მყარად მაგრძნობინებდა თავს", - ამბობს პიანისტი.
- ხატია ბუნიათიშვილმა თავის ახალ ალბომზეც ისაუბრა, რომელზეც დირიჟორის გარეშე იმუშავა.
მინდოდა გამეკეთებინა ისე, როგორც ვგრძნობდი. ზოგჯერ დირიჟორები გეხმარებიან ამაში, ზოგჯერ კი სხვა რამეს სთავაზობენ, რაც შეიძლება მოგეწონოს ან არა... ძალიან მინდოდა ეს ჩემი გზა ყოფილიყო.
ამაყი ვარ იმით, რომ მივაღწიე წარმატებას დამოუკიდებლად, დირიჟორებისა და გავლენიანი ადამიანების გარეშე. ასევე, ზოგჯერ არ მიწვევდნენ მსოფლიოს საუკეთესო ორკესტრები. თუმცა ვამბობდი: "არა უშავს, მარტო დავუკრავ.“...
რეალურად, ჩემი კარიერა ჩემმა სოლო კონცერტებმა შექმნა, რადგან ხშირად არ ვიყავი ამ დიდი ძალისა და სისტემის ნაწილი. უნდა ვიმუშაოთ თანასწორობის საკითხებზე, რადგან ყველას არ აქვს ეს შანსი", - ამბობს პიანისტი.