პარტნიორები:
ავტორი:

“სურათი ნათელია - გუშინდელი არჩევნები, თბილისში პუტინის მარიონეტულმა მთავრობამ მოიპარა“ - როგორ ეხმაურებიან არჩევნების შედეგებს საერთაშორისო დონეზე

“სურათი ნათელია - გუშინდელი არჩევნები, თბილისში პუტინის მარიონეტულმა მთავრობამ მოიპარა“ - როგორ ეხმაურებიან არჩევნების შედეგებს საერთაშორისო დონეზე

ეუთო/ოდირმა საქართველოში გამართული საპარლამენტო არჩევნების მიმდინარეობა და შედეგები შეაფასა.

"კენჭისყრის დღე პროცედურულად კარგად იყო ორგანიზებული. ასევე, იყო დაძაბული გარემო და ხშირად ირღვეოდა ხმის ფარულობა, იყო პროცედურული შეუთავსებლობები და დარღვევები. იყო შეტყობინებები იმაზე, რომ დაშინებამ და ზეწოლამ ამომრჩევლებზე უარყოფითი ზეგავლენა მოახდინა, ამან კი პროცესზე უარყოფითად იმოქმედა", - ამის შესახებ ეუთოს სპეციალურმა კოორდინატორმა პასკალ ალიზარდმა პრესკონფერენციაზე განაცხადა.

მან იმედი გამოთქვა, რომ არჩეული ხელმძღვანელობა ეფექტურად გაუმკლავდება ძირითად გამოწვევებს, რომელიც ამ ქვეყნის წინაშე დგას და რაც უკავშირდება ევროკავშირში გაწევრიანებას.

  • ეუთო/ოდირის დასკვნას გამოხმაურება საერთაშორისო დონეზე მოჰყვა.

გერმანიის საგარეო უწყების განცხადებით, “გერმანია ყურადღებით ადევნებს თვალს საქართველოში მიმდინარე მოვლენებს და მოუწოდებს ყველა მხარეს გამოიჩინონ თავშეკავება, თავიდან აიცილონ ძალადობა და შემდგომი პოლარიზაცია“.

როგორც გერმანიის საგარეო საქმეთა სამინისტროს განცხადებაშია აღნიშნული, “გერმანია სრულად მხარს უჭერს ეუთო/ოდირის საერთაშორისო სადამკვირვებლო მისიის წინასწარ დასკვნებსა და შეფასებებს საქართველოს საპარლამენტო არჩევნების შესახებ. ჩვენ შეშფოთებულები ვართ გავრცელებული ინფორმაციით დაძაბული გარემოსა და დარღვევების შესახებ, რომლებიც უნდა მოგვარდეს და გამოსწორდეს“.

“გერმანია ყურადღებით ადევნებს თვალს საქართველოში მიმდინარე მოვლენებს და მოუწოდებს ყველა მხარეს გამოიჩინონ თავშეკავება და თავიდან აიცილონ ძალადობა და შემდგომი პოლარიზაცია“, - აცხადებენ უწყებაში.

გერმანიის საგარეო საქმეთა სამინისტროს მტკიცებით, არჩევნების შედეგებისადმი მიდგომა და მთავრობის ფორმირება ასევე გავლენას მოახდენს საქართველოს მომავალ პროგრესზე ევროპისკენ მიმავალ გზაზე.

  • 26 ოქტომბრის საპარლამენტო არჩევნების შედეგებს ეხმიანება გაერთიანებული სამეფოს ყოფილი პრემიერ-მინისტრი, ბორის ჯონსონიც.

მისი თქმით, საქართველოში არჩევნები პუტინის მარიონეტულმა მთავრობამ მოიპარა.

“სურათი, რომელიც საქართველოდან იქმნება, ნათელია - გუშინდელი არჩევნები თბილისში პუტინის მარიონეტულმა მთავრობამ მოიპარა. მხარს ვუჭერ ქართველ ხალხს, რომელიც იცავს თავის თავისუფლებას, უფლებებს და მომავალს“, - წერს ჯონსონი სოციალურ პლატფორმა X-ზე.

  • ამასთან, მედიასთან დამატებით დეტალებზე ისაუბრა ეუთო/ოდირის სადამკვირვებლო დელეგაციის წარმომადგენელმა ელჯი მერფიმ.

“500-ზე მეტი დამკვირვებელი გვყავდა და რამდენიმე მათგანმა აღნიშნა, რომ ხმის რამდენჯერმე მიცემის მცდელობა იყო“, - განაცხადა მან.

მერფის შეფასებით, საარჩევნო უბნების გახსნა კარგად იყო ორგანიზებული. მისივე თქმით, დამკვირვებლები აღნიშნავდნენ, რომ იყო დაშინება, ხოლო 24%-ის შემთხვევაში ხმის ფარულობა დაირღვა, რაც მაღალი მაჩვენებელია.

  • ”ყველამ ძალიან კარგად იცის ის ერთი უბანი, სადაც შედეგები ცესკომაც გააუქმა, რადგან აშკარა მტკიცებულება იყო, რომ ბიულეტენები საარჩევნო ყუთში ჩაიყარა. საქართველოში 3 000-ზე მეტი უბანი იყო. ჩვენ ჩვენი სტატისტიკა გვაქვს - ჩვენმა დამკვირვებლებმა რაღაც ადგილებში აღმოაჩინეს დარღვევები, როდესაც საარჩევნო უბანზე პროცედურები არ იყო დაცული.

მნიშვნელოვანია, რომ როდესაც ადამიანები ფიქრობენ, რომ დარღვევა იყო, მათ უნდა ჰქონდეთ შესაძლებლობა, რომ საჩივარი შესაბამის უწყებაში შეიტანონ და ეს საჩივარი შესაფერისად და სათანადოდ უნდა განიხილონ. არის პრობლემა ნდობასთან დაკავშირებით - თუ რამდენად ენდობიან გასაჩივრების მექანიზმებს.

რაც შეეხება ხმების რამდენჯერმე მიცემას, ძალიან ცოტა დადასტურებული შემთხვევა არის - 500-ზე მეტი დამკვირვებელი გვყავდა და რამდენიმე მათგანმა აღნიშნა, რომ ხმის რამდენჯერმე მიცემის მცდელობა იყო“, - განაცხადა ელჯი მერფიმ.

  • საქართველოს საპარლამენტო არჩევნებში სისტემატური დარღვევების შესახებებ არსებულ ბრალდებებს უპასუხა ჰელსინკის კომისიის თავმჯდომარემ ჯო უილსონმა და განაცხადა, რომ “ქართველი ხალხი იმსახურებს მთავრობას, რომელიც უსმენს და პატივს სცემს მათ ხმას“.

“მაწუხებს საქართველოს საპარლამენტო არჩევნებში სისტემატური დარღვევების შესახებ სანდო ბრალდებები.

ასევე შეშფოთებული ვარ რუსეთის მხრიდან კარგად დადასტურებული მცდელობებით, ზეგავლენა მოახდინოს არჩევნებზე. მოვუწოდებ აშშ-ის სახელმწიფო დეპარტამენტს, ყურადღებით შეისწავლოს გაყალბების ბრალდებები და თუ დადგინდება, რომ ეს ასეა, გააკეთოს მკაფიო განცხადება ამის შესახებ“, - აღნიშნულია ჯო უილსონის განცხადებაში.

მისი განმარტებით, “MEGOBARI აქტი“ შეეცდება დასაჯოს ისინი, ვინც ძირს უთხრის დემოკრატიას საქართველოში და მხარს უჭერს საქართველოს ხალხს თავისუფლებისა და სუვერენიტეტის განმტკიცებისკენ სწრაფვაში.

იხილეთ ასევე:

ტეგები თემაზე: