კადიროვმა რუს სენატორსა და ბიზნესმენს მტრობა გამოუცხადა - რა კავშირი აქვს ამას რუსეთის უმდიდრესი ქალის ოფისში მომხდარ სროლასთან?
- მთავარ ფოტოზე: რამზან კადიროვი და სულეიმან ქერიმოვი რუსეთის ფეხბურთის თასის მატჩის დროს, 2011 წლის 1 მარტი
ჩეჩნეთის რესპუბლიკის მეთაური რამზან კადიროვი სისხლის შუღლით დაემუქრა დაღესტნელ სენატორს და მილიარდერ სულეიმან ქერიმოვს, ასევე სახელმწიფო სათათბიროს ორ დეპუტატს - ბეხან ბარახოევს და რიზვან ყურბანოვს - ამის შესახებ მან რესპუბლიკის უსაფრთხოების ბლოკის წარმომადგენლებთან შეხვედრაზე განაცხადა.
კადიროვის მტკიცებით, ისინი მის მოკვლას გეგმავდნენ.
"თუ ისინი არ დაამტკიცებენ, რომ არაფერი აქვთ საერთო მკვლელობის შეკვეთასთან, მე ოფიციალურად ვაცხადებ სისხლის შუღლს ბარახოევის, კარიმოვის და ყურბანოვის წინააღმდეგ" - განაცხადა მან.
შეხვედრაზე ასევე განიხილეს მოსკოვში Wildberries-ის ოფისში მომხდარი მოვლენები, სადაც 18 სექტემბერს სროლა მოხდა.
Wildberries-ის ოფისში კონფლიქტში მონაწილეობდნენ ჩრდილოკავკასიელები, მათ შორის "კადიროველები". დაპირისპირების მიზეზი გახდა რუსულ Amazon-ად წოდებული კომპანიის, Wildberries-ის დამფუძნებლის, ტატიანა ბაკალჩუკისა და მისი მეუღლის, ვლადისლავ ბაკალჩუკის ოჯახური და საქმიანი კონფლიქტი, რომელშიც პირდაპირ თუ ირიბად ჩართული აღმოჩნდნენ თვით ვლადიმირ პუტინი, რამზან კადიროვი და დაღესტნელი ოლიგარქი, სულეიმან ქერიმოვი.
- რა მოხდა?
18 სექტემბერს შუადღისას, კომპანიის თანადამფუძნებელმა ვლადისლავ ბაკალჩუკმა სცადა შეჭრილიყო Wildberries-ის მოსკოვის ოფისში, რომელიც მდებარეობს ბიზნესცენტრ "რომანოვ დვორში", კრემლიდან 500 მეტრში. ვლადისლავ ბაკალჩუკს თან ახლდნენ შერეული საბრძოლო ხელოვნების შეიარაღებული მებრძოლები და ჩეჩნეთის ყოფილი პროკურორი ანას ელმურზაევი, ჯამში, 20-მდე ადამიანი.
ოფისის დაცვასთან შეტაკების დროს დაიწყო სროლა, რის შედეგადაც ორი ადამიანი დაიღუპა და შვიდი დაიჭრა.
- ცნობილია, რომ ბაკალჩუკმა დახმარებისათვის, არა სასამართლოს ან სამართალდამცავ ორგანოებს, არამედ რამზან კადიროვს მიმართა. კადიროვი ღიად ჩაერთო დავის გადაჭრაში. მან Wildberries-ისა და Russ-ის გარიგებას ძმები მირზოიანებისა და „კავკასიელი ცნობილი ადამიანების“ თავხედური თარეში უწოდა.
Wildberries-ის ოფისში მომხდარის გამო ბაკალჩუკს ბრალი წაუყენეს რუსეთის ფედერაციის სისხლის სამართლის კოდექსის რამდენიმე მუხლით, მათ შორის 105-ე მუხლით "მკვლელობა".
ამის შემდეგ ბაკალჩუკმა ტელეგრამის არხზე დაწერა, რომ ის თავისუფალია. მან ასევე ახსენა ქერიმოვი და ბარახოევი და თქვა, რომ ისინი "მფარველობენ" ძმებს მირზოიანებს, ტატიანა ბაკალჩუკის ახალ პარტნიორებს.
მედიის ინფორმაციით, სწორედ სულეიმან ქერიმოვმა მოაწყო ტატიანა ბაკალჩუკისა და რობერტ მირზოიანის შეხვედრა, ჯერ პრეზიდენტის ადმინისტრაციის ხელმძღვანელთან ანტონ ვაინოსთან, შემდეგ კი პირადად ვლადიმერ პუტინთან. ამის შემდეგ პუტინმა დაამტკიცა გარიგება და თანაშემწეს მაქსიმ ორეშკინს პროექტის ზედამხედველობა დაავალა.
წაიკითხეთ ასევე: