ნეთანიაჰუ სამაგიეროს მიზღვით იმუქრება, ირანი კი აცხადებს, რომ ასეთ შემთხვევაში, მათი მორიგი სამიზნე ისრაელის მთელი ინფრასტრუქტურა იქნება - უახლესი ცნობები მსოფლიოს ერთ-ერთი ყველაზე ცხელი წერტილიდან
მას შემდეგ, რაც ირანსა და ისრაელს შორის ვითარება გამწვავდა, reuters -ის ინფორმაციით, ირანმა ოფიციალურად განაცხადა, რომ კონფლიქტის გამწვავების საშიშროების ფონზე, ისრაელზე სარაკეტო თავდასხმა დაასრულა.
ამასთანავე, ღამის განმავლობაში ისრაელის შეიარაღებულმა ძალებმა ბეირუთში “ჰეზბოლას“ სამიზნეებს დაარტყეს. მედიის ცნობით, ისრაელის არმია თავს დაესხა იარაღის წარმოების ობიექტებსა და ინფრასტრუქტურას.
ირანის შეიარაღებული ძალების შტაბის უფროსის თქმით, “თუ ისრაელი მათ წინააღმდეგ საპასუხო ქმედებას განახორციელებს, ირანის მორიგი სამიზნე მთელი მათი ინფრასტრუქტურა იქნება“.
როგორც გენერალ-მაიორი მოჰამად ბაგერი აცხადებს, “თუკი ისრაელს სურს გააგრძელოს დანაშაულები ან სურს რაიმე გააკეთოს ირანის სუვერენიტეტისა და ტერიტორიული მთლიანობის წინააღმდეგ, თეირანი ოპერაციას რამდენჯერმე გაძლიერებული ძალებით გაიმეორებს“.
მისი თქმით, ირანის რევოლუციური გვარდიის კორპუსი სათანადოდ მომზადებულია იმისთვის, რომ გაიმეოროს ისრაელის წინააღმდეგ განხორციელებული სარაკეტო შეტევა გაძლიერებული ინტენსივობით.
თუმცა მანამდე, ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ირანმა დიდი შეცდომა დაუშვა და ამისთვის გადაიხდის.
- “ირანმა დიდი შეცდომა დაუშვა და ამისთვის გადაიხდის, ისრაელზე დარტყმა ჩაიშალა და ჩაიშალა ისრაელის საჰაერო თავდაცვის სისტემის წყალობით, რომელიც ყველაზე მოწინავეა მსოფლიოში. ირანის რეჟიმს არ ესმის ჩვენი სიმტკიცე, დავიცვათ ჩვენი თავი და ჩვენი სიმტკიცე, რომ სამაგიერო მივუზღოთ ჩვენს მტრებს. გაიგებენ ამას“, - აღნიშნა ნეთანიაჰუმ.
ამასთანავე, მან მადლობა გადაუხადა აშშ-ს მხარდაჭერისთვის და ხაზი გაუსვა, რომ “მსოფლიოს ნათელი ძალები“ თეირანის წინააღმდეგ უნდა გაერთიანდნენ.
”არჩევანი არასოდეს ყოფილა ასეთი მკაფიო ტირანიასა და თავისუფლებას შორის, კურთხევასა და წყევლას შორის”, - აღნიშნა ნეთანიაჰუმ.
შეგახსენებთ, რომ გუშინ, ღამის საათებში, ირანმა ისრაელის მიმართულებით ბალისტიკური რაკეტები გაუშვა.
განცხადების თანახმად, საჰაერო თავდასხმის განგაშის ხმა ისრაელის ცენტრალურ და სამხრეთ ნაწილებში ისმის. ირანის რევოლუციურმა გვარდიამ განაცხადა, რომ ისრაელზე განხორციელებული სარაკეტო თავდასხმა გასულ კვირას "ჰეზბოლას" მეთაურის ჰასან ნასრალას, ისევე როგორც ჰამასის ლიდერის ისმაილ ჰანიეს მკვლელობის საპასუხოდ იყო.
-
"ტელეგრამარხებზე" ვრცელდება კადრები, სადაც ჩანს, რომ ისრაელზე განხორციელებული სარაკეტო თავდასხმა ირანის ქუჩებში დიდ ეკრანებზე, პირდაპირ რეჟიმში შუქდებოდა.
ამასთან, ვრცელდება ვიდეო, სადაც ჩანს, თუ როგორ დაეცა ირანული რაკეტის ფრაგმენტი პალესტინელს. მამაკაცი ადგილზე დაიღუპა.
ჯამში, ირანმა ისრაელისკენ დაახლოებით 181 ბალისტიკური რაკეტა გაუშვა. ქვეყნის მასშტაბით 1800 სარაკეტო განგაშის სიგნალი დაფიქსირდა.
Magen David Adom-ის აღმასრულებელმა დირექტორმა ელი ბინმა განაცხადა, რომ სარაკეტო თავდასხმისას პირდაპირი დარტყმა მოხდა ერთ-ერთ შენობაზე, ჩრდილოეთ თელ-ავივში.
-
ისრაელში ტერორისტულ თავდასხმას საქართველოს მოქალაქე ემსხვერპლა
ისრაელში, ტერორისტული თავდასხმის შედეგად დაჭრილი საქართველოს მოქალაქე კლინიკაში გარდაიცვალა. ტერორისტების თავდასხმას 6 ადამიანის სიცოცხლე შეეწირა, კიდევ 9 დაშავდა. ამის შესახებ ინფორმაციას გამოცემა The Times of Israel ავრცელებს.
მათი ცნობით, ერთ-ერთი ტერორისტი ავტომატით იყო შეიარაღებული, ხოლო მეორეს დანა ჰქონდა. არსებული ინფორმაციით, ორი ტერორისტი ტრამვაიდან გადმოვიდა და ცეცხლი გახსნა. ისინი უშიშროების ძალებმა რამდენიმე წუთში გაანადგურეს. ტერაქტი ირანიდან სარაკეტო თავდასხმამდე რამდენიმე წუთით ადრე მოხდა.
საქართველოს საგარეო საქმეთა სამინისტროს ინფორმაციით, ტერორისტული თავდასხმის შედეგად, ისრაელში გარდაცვლილი საქართველოს მოქალაქის სამშობლოში გადმოსვენების შესაძლებლობაზე საელჩო ისრაელის შესაბამის სტრუქტურებთან მუშაობს, რაც მისი დაღუპვის გარემოებების გათვალისწინებით, გარკვეულ დროს მოითხოვს. ამის შესახებ “ინტერპრესნიუსს“ უწყებაში განუცხადეს.
“ისრაელში საქართველოს საელჩო 1-ელ ოქტომბერს მომხდარი ტერაქტის შედეგად საქართველოს ერთი მოქალაქის გარდაცვალებას ადასტურებს. საელჩო გარდაცვლილი თანამემამულის საქართველოში გადმოსვენების შესაძლებლობაზე ისრაელის შესაბამის სტრუქტურებთან მუშაობს, რაც ბუნებრივია, მოითხოვს გარკვეულ დროს, მისი დაღუპვის გარემოებების გათვალისწინებით.
საქართველოს საგარეო საქმეთა სამინისტრო უსამძიმრებს გარდაცვლილის ოჯახს ამ მძიმე ტრაგედიას, ასევე მომხდარის გამო ისრაელის მთავრობას და ისრაელის ხალხს, საქართველო ტერორიზმის ნებისმიერ გამოვლინებას გმობს,“ - აღნიშნულია განცხადებაში.
იხილეთ ასევე:
- "ყურსასმენი მეკეთა, თავიდან ხმა ვერ გავიგე... ტერაქტს შევესწარი, ამ პერიოდში სამჯერ ჩაირთო განგაშის ზარი, ჩემს თავზე რაკეტები დაფრინავდნენ" - რას გვიყვება ისრაელში მცხოვრები ქართველი
- ისრაელში ტერორისტულ თავდასხმას საქართველოს მოქალაქე ემსხვერპლა - რა მოხდა იაფაში და რა კადრები ვრცელდება მედიაში?
- რაკეტების წვიმა, საგანგებო თათბირი მიწისქვეშა ბუნკერიდან... - ისრაელი დიდი პასუხისთვის ემზადება: რას ჰყვება იქ მყოფი ქართველი და როგორია ბოლო საათების ქრონოლოგია (ვიდეო)