ისრაელმა სირიის ცენტრალურ ნაწილზე იერიში მიიტანა, დაიღუპა 18 ადამიანი, 32 დაშავდა - ვრცელდება ავიადარტყმების ამსახველი კადრები
გაერთიანებულ სამეფოში დაფუძნებული ორგანიზაციის, “სირიის ადამიანის უფლებათა ობსერვატორიის“ ინფორმაციით, ისრაელის მიერ, წუხელ სირიის ცენტრალურ ნაწილში განხორციელებული ინტენსიური ავიადარტყმების შედეგად, 18 ადამიანი დაიღუპა და 32 დაშავდა.
ორგანიზაციაში აცხადებენ, რომ დაღუპულებს შორის 8 სირიელი მებრძოლია.
თავდასხმას ირანის ხელისუფლება გამოეხმაურა და ისრაელის მხარდამჭერ ქვეყნებს მოუწოდა, მისი მხარდაჭერა და შეიარაღება შეწყვიტონ.
"მკაცრად ვგმობთ სიონისტური რეჟიმის ამ დანაშაულებრივ თავდასხმას სირიის მიწაზე. რეჟიმის მხარდამჭერებს მისი მხარდაჭერისა და შეიარაღების შეწყვეტისკენ მოვუწოდებთ“, - განაცხადა საგარეო საქმეთა სამინისტროს პრესსპიკერმა, ნასერ კანანმა.
მოგვიანებით გავრცელდა ინფორმაცია, რომ ლიბანის ტერიტორიიდან ისრაელის ჩრდილოეთ ნაწილისკენ 15 რაკეტა გაისროლეს.
ინფორმაციას The Times of Israel-ი ავრცელებს.
გამოცემის ცნობით, რაკეტები ღია ადგილებში მოხვდა და დაშავებულების შესახებ ინფორმაცია არ ვრცელდება.
თავდასხმაზე პასუხისმგებლობა დაჯგუფება “ჰეზბოლამ“ აიღო და განაცხადა, რომ სამიზნე სამხედრო ბაზა იყო. უცნობია, არის თუ არა დაკავშირებული აღნიშნული იერიში, ისრაელის მიერ, სირიის ცენტრალურ ნაწილის დაბომბვასთან.