“ეჭვი არავის გვეპარებოდა, რომ ქართველი ოლიმპიელების წარმატებულ გამოსვლას, პარაოლიმპიელებიც ღირსეულად გააგრძელებდნენ!“ - ბიძინა ივანიშვილი გიგა ოჩხიკიძისა და ანა ჯაფარიძის შესახებ განცხადებას ავრცელებს
"ქართული ოცნების" საპატიო თავმჯდომარე, ბიძინა ივანიშვილი ქართველ პარასპორტსმენებს პარაოლიმპიადაზე მოპოვებულ მედლებს ულოცავს და ამასთან დაკავშირებით განცხადებას ავრცელებს:
“გილოცავთ! ქართველი პარამძლეოსანი, გიგა ოჩხიკიძე ზაფხულის პარაოლიმპიური თამაშების ჩემპიონია!
ქართველი პარასპორტსმენი, პარიზში მიმდინარე 2024 წლის პარაოლიმპიურ თამაშებზე ბირთვის კვრაში (F53) ოქროს მედლის მფლობელი გახდა და ორმაგად სასიხარულოა, რომ მან მსოფლიო რეკორდიც დაამყარა.
ეჭვი არავის გვეპარებოდა, რომ ქართველი ოლიმპიელების წარმატებულ გამოსვლას პარაოლიმპიელებიც ღირსეულად გააგრძელებდნენ.
- გიგა ოჩხიკიძესთან ერთად, რომელმაც საქართველოს პარალიმპიურ ნაკრებს პირველი უმაღლესი სინჯის მედალი მოუტანა, აღსანიშნავია ახალგაზრდა პარაოლიმპიელი ანა ჯაფარიძე, რომელმაც ასევე დიდ წარმატებას მიაღწია და პარატაეკვონდოში ჩვენს ქვეყანას ბრინჯაოს მედალი მოუტანა.
ჩვენი პარაოლიმპიელები მუდმივად აღგვაფრთოვანებენ თავიანთი შრომისა და ბრძოლის ჟინით. თითოეული მათგანის შეუპოვრობა, მონდომება და გამბედაობა, შთამაგონებელი მაგალითია მთელი ჩვენი საზოგადოებისთვის.
კიდევ უფრო მეტ წარმატებასა და გამარჯვებებს ვუსურვებ ქართველ პარაოლიმპიელებს, ვისითაც მთელი ქვეყანა ვამაყობთ!“ - აღნიშნულია მისალოც წერილში.
შეგახსენებთ, რომ გიგა ოჩხიკიძემ პარიზის პარალიმპიადაზე ოქროს მედალი მოიპოვა. მან ბირთვის კვრაში 9,66 მეტრი დააფიქსირა და ამით მსოფლიო რეკორდიც დაამყარა!
აქამდე 9 მეტრიანი ზღვარი აქამდე გადაკვეთილი არავის ქონია. მან მსოფლიოს რეკორდი, რომელიც აქვე პარიზში მაროკოელმა აბდელილაჰ განიმ დაამყარა, 44 სანტიმეტრით გააუმჯობესა.
პარატაეკვონდოისტმა ანა ჯაფარიძემ კი ბრინჯაოს მედალი მოიპოვა. ქართველი პარასპორტსმენი ბრინჯაოს ფინალში დაუპირისპირდა ეგვიპტელ სალმა მონიმ ჰასანს.
კვარცხლბეკზე მას მედალი მსოფლიოს ვარსკვლავმა, ჯეკი ჩანმა გადასცა.
იხილეთ ასევე: