“ევროკავშირში მიღება არაა პროცესი, როცა გვინდა დავაკაკუნებთ და კარი თავისით გაიღება, ეს შანსი გაგვიჩნდა და კანონი აღმოჩნდა ბარიერი“ - ეკა ბესელია

“ვიტოვებ იმედს, რომ თქვენ დაიცავთ კონსტიტუციის 78-ე მუხლს და ქვეყანასა და მოქალაქეებს ააცილებთ ზიანს, რაც უკვე მოგვადგა და ყოველდღიურად გვადგება, ვიდრე ეს კანონი ძალაშია - ეს ზიანი არის არა ჰიპოტეტური და აბსტრაქტული, არამედ ძალიან კონკრეტული და უკვე დამდგარი ფაქტი!“ - ეს განცხადება საკონსტიტუციო სასამართლოს განმწესრიგებელ სხდომაზე ეკა ბესელიამ გააკეთა, რომელიც “უცხოური გავლენის გამჭვირვალობის შესახებ“ კანონის წინააღმდეგ პრეზიდენტის წარმომადგენელია.

ბესელიამ ხაზგასმით განაცხადა, რომ კანონი 1-ელი სექტემბრიდან კიდევ უფრო სახიფათო გახდება, როცა მისი მსუსხავი და რეპრესიული ზომები ამოქმედდება.

“არ მახსოვს კანონის მიღებას იმდენი ადამიანის პროტესტი მოჰყოლოდეს, რაც ამ კანონის განხილვასა და მიღებას მოჰყვა. ბევრი მანიფესტაცია და მიტინგი მინახავს და არ მახსოვს ამდენი მოქალაქე, რომელმაც იგრძნო, თუ რა საფრთხეს ქმნის კანონი.

დავითვალოთ, რა ზიანი მიადგა ჩვენ ქვეყანას კანონის მიღების შედეგად - კანონი მიღებით დაირღვა კანონიერების პრინციპი, არ არსებობდა მისი მიღების ლეგიტიმური მიზანი, არ იყო დაცული პროპორციულობის პრინციპი და არ იყო არანაირი დასაბუთება, თუ რატომ იყო საჭირო ამ ზომით ჩარევა ადამიანის ფუნდამენტურ უფლებებში, რა მასშტაბის ჩარევის საფრთხესაც ეს კანონი ქმნის“, - განაცხადა ბესელიამ საკონსტიტუციო სასამართლოს სხდომაზე.

• ბესელიამ საკონსტიტუციო სასამართლოს მიმართა, რომ “არ არსებობს არავინ, ვისაც კი შეიძლება ზიანი მიადგეს, თუკი ამ სადაო აქტს შეაჩერებთ - უბრალოდ, ვიღაცებს შეიძლება ნერვები აეშალოთ“.

“თუ სასწორის მეორე პინაზე ამ კანონის დამცველების - საბედნიეროდ, მცირე ჯგუფის ახირება თუ მათი პოლიტიკური მოტივაციისა და საგარეო ორიენტაციის არევა და შეცვლაა, ჩვენ და პირველ რიგში, საქართველოს კონსტიტუცია ამას ასე არ ვუყურებთ. როდესაც კონსტიტუციის 78-ე მუხლს ვწერდით, კარგად მახსოვს, რა ნორმატიული შინაარსი ჩავდეთ მასში, რატომ აღმოჩნდა განსაკუთრებულ ადგილას კონსტიტუციის გარდამავალ დებულებებში და რა იყო ის ხაზგასმა, რისთვისაც ჩვენ ეს გადაწყვეტილება მივიღეთ. ამ ქვეყნის ხელისუფლებას უნდა ჰქონდეს განცდა, რომ მას ყოველგვარი რყევების და გარე ფაქტორების ზემოქმედების შედეგად გამოერიცხა რაიმე დაშვება იმისა, რომ საგარეო კურსი შეგვეცვალა. ცალკეულ განცხადებებში გვესმის, რომ კონსტიტუციის ეს მუხლი შეიძლება გადაისინჯოს - ღმერთმა ნუ ქმნას, რადგან საქართველოს წინაშე მდგარი საფრთხეების გათვალისწინებით სწორედ კონსტიტუციის დონეზე განისაზღვრა, რა არის საქართველოს მისწრაფება და ჩაიწერა, რომ ეს არის ევროინტეგრაციის - ევროკავშირსა და ნატოში საქართველოს ინტეგრაცია...

ევროკავშირში მიღება არაა მუდმივი და მარადიული პროცესი, როცა გვინდა დავაკაკუნებთ კარს და ეს კარი თავისით გაიღება. მოცემულ პოლიტიკურ კონტექსტსა და ვითარებას აქვს დიდი მნიშვნელობა. ქვეყანას ეს შანსი გაუჩნდა, ამ შანსის რეალურად ხელშესახები შედეგის დადგომის დროს სწორედ ეს კანონი აღმოჩნდა გადაულახავი ბარიერი. ჩვენ არ ვიცით, როდემდე ექნება ქვეყანას ეს შესაძლებლობა ან რა კონტექსტი შეიძლება იყოს მომავალში. ამიტომ საფრთხე, რომელიც დღეს არსებობს, მისი თავიდან არიდება შესაძლებელია ამ შეჩერებული პროცესის სწრაფად განგრძობით, რათა ჩვენმა მოქალაქეებმა აწმყოში მიიღონ ის სიკეთე, რასაც ისინი ევროპულ ოჯახში ინტეგრაციით ელოდებიან და არა ოკუპანტთან მარტო დარჩენით. ეს არის ის, რაც შეიძლება თქვენ გააკეთოთ ამ კანონის შეჩერებით.

როდესაც საუბარია ამ სადაო ე.წ. რუსულ კანონად წოდებული აქტის შეჩერებაზე, შეჩერების შემთხვევაში კითხვა, თქვენ ვინმეს უფლებებს დაარღვევთ თუ არა, ცალსახა პასუხია, არა! ვის უფლებებს დაიცავთ? - ალბათ, ყველა იმ მოქალაქის, ვისაც საკუთარი ქვეყნის მომავალი გააზრებული, მოაზრებული აქვს ევროპულ ოჯახში, რომ მიიღოს ის სიკეთე, რასაც ეს კავშირი ეფუძნება, უსაფრთხოება, რომელსაც ჩვენი მოქალაქეები იმსახურებენ“, - განაცხადა ბესელიამ.

მისივე თქმით, კანონის შეჩერებით საკონსტიტუციო სასამართლო მოქალაქეების უფლებებს დაიცავს და ევროინტეგრაციის შეჩერებული პროცესის აღდგენასაც ხელს შეუწყობს.

“თუ ამ კანონს თქვენ შეაჩერებთ და ამას გააკეთებთ რაც შეიძლება მალე, იქნება ის, რაც ხელს შეუწყობს 78-ე მუხლს. თუ არა, მჯერა, ისევე როგორც, ამ დარბაზში, თქვენ გიყურებთ, ეს კანონი მაინც გაუქმდება, მაგრამ თუ ამას გააკეთებთ რაც შეიძლება სწრაფად და მალე, ეს იმ მოსალოდნელ ზიანს ააცილებს ქვეყანას, რომელიც ყოველდღიურია.

სასწორის ერთ პინაზე დევს ჩვენი ქვეყნის ხვალინდელი, ევროპული, სამართლიანი, დემოკრატიული მომავალი. ჩვენი მოქალაქეების ღირებულებითი არჩევანი. სასწორის მეორე პინაზე დევს რამდენიმე ადამიანის ქვეყნის საზიანო ახირებული ქმედება, რომელმაც გადაწყვიტა, რომ ქვეყნის საგარეო კურსი შემოატრიალოს და საკუთარი მოქალაქეების წინააღმდეგ წავიდეს. თქვენთვისაც ეს დევს სასწორის ორივე მხარეს, ამიტომ საკონსტიტუციო სასამართლომ, სწორედ იმ ორგანომ, რომელიც ვალდებულია დაიცვას კონსტიტუცია და 78-ე მუხლის მიზანი, ამ გადაწყვეტილებით უნდა უპასუხოს მნიშვნელოვან კითხვას და მნიშვნელოვანი ნდობის ტესტი კიდევ ერთხელ გაიაროს.

სასწორის ერთ პინაზე ქვეყანაა, მეორე მხარეს რამდენიმე ადამიანი. თქვენ გადაწყვიტეთ ქვეყანაა უპირველესი თუ ამ კანონის ავტორები, რომლებიც საკუთარი ქვეყნის წინააღმდეგ მიდიან“,- მიმართა ეკა ბესელიამ საკონსტიტუციო სასამართლოს მოსამართლეებს.

საკონსტიტუციო სასამართლოში “უცხოური გავლენის გამჭვირვალობის შესახებ“ კანონის შეჩერებასა და გაუქმებასთან დაკავშირებული სარჩელის განხილვა მიმდინარეობს. საქმეს საქართველოს საკონსტიტუციო სასამართლოს პლენუმი განიხილავს.

მმართველი უმრავლესობის ინიციატივითა და მხარდაჭერით მიღებული კანონის წინააღმდეგ საკონსტიტუციო სასამართლოს მიმართეს პრეზიდენტმა, არასამთავრობო და მედია ორგანიზაციებმა და პარლამენტის ოპოზიციონერმა დეპუტატებმა.