დაზიანებული სარკინიგზო ლიანდაგი, იერიშები რუსეთის ნავთობბაზებზე და მსხვერპლი - რუსეთ - უკრაინის ომის ქრონიკა 29 აგვისტოს მონაცემებით

ომის შემსწავლელი ინსტიტუტის (ISW) ანალიზით, არსებული მონაცემებით, უკრაინის ჯარების წინსვლა კურსკის რეგიონში შენელდა.

“ახლა უკრაინის შეიარაღებული ძალები ცდილობენ გამაგრებას და იმ ტერიტორიების დაკავებას, რომლებზეც ახლახან აიღეს კონტროლი“, - წერს ISW.

• უკვე ცნობილია, რომ უკრაინის თავდაცვის ძალებმა მიაღწიეს შემდეგ სოფლებს: ვეტრენოს, კრემნესა და შეპტუხოვკას (კორენევოს აღმოსავლეთით და ჩრდილო-აღმოსავლეთით); აღმოსავლეთ ნეჩაევისა და ჩერკასი პორეჩნის რეგიონებში (ორივე სუჯას ჩრდილო-აღმოსავლეთით); სპალნოეს სამხრეთით მინდვრებში (სუჯას სამხრეთ-აღმოსავლეთით).

ბოლო დღეებში, რუსეთის შეტევის შედეგად, უკრაინის ქალაქებში მომხდარი დიდი ნგრევის მიუხედავად, უკრაინის პრეზიდენტის, ვოლოდიმირ ზელენსკის განცხადებით, შეიარაღებული ძალები რუსეთის ტერიტორიაზე, კონტროლის ქვეშ მყოფი ტერიტორიის გაფართოებას აგრძელებენ.

“ვაგრძელებთ უკრაინის საზღვართან მდებარე გარკვეულ რაიონებში ჩვენი კონტროლის ქვეშ მყოფი ტერიტორიის გაფართოებას. დღესაც, როგორც ყოველ სხვა დღეს, არის ჩვენი გაცვლითი ფონდის [ომის ტყვე რუსები] შევსება. მადლობა, მეომრებო! ეს არის ის, რაც დაგვეხმარება რუსული ტყვეობიდან ბევრი ჩვენი ადამიანის დაბრუნებაში. ახლა ისიც უნდა გვესმოდეს, რომ მთელი ზეწოლა, რომელიც რუსეთში გადავიტანეთ, ნიშნავს, რომ მათ არ შეუძლიათ უფრო მეტი ზეწოლის გადატანა ჩვენს დონეცკის ოლქზე”, - განაცხადა ზელენსკიმ.

ამავდროულად, უკრაინის საგარეო საქმეთა მინისტრი, დმიტრო კულება მოკავშირეებს აქტიური მხარდაჭერისკენ მოუწოდებს. მინისტრის თქმით, ომს დიდი რესურსი, ფინანსები, ძალისხმევა და აღჭურვილობა სჭირდება.

“რუსეთის რეაქციის ნუ შეგეშინდებათ, ჩვენ არ გვეშინია, არაფრის არ გვეშინია, დაგვეხმარეთ, მოგვეცით ის, რაც გვჭირდება - ჩვენ გავიმარჯვებთ ამ ომში და შემდეგ წავიკითხავთ ისტორიის სახელმძღვანელოებს იმის შესახებ, თუ როგორ მივიღეთ გადაწყვეტილებები ერთად“, - დასძინა კულებამ.

უკრაინის თავდაცვის მინისტრის თქმით, უკრაინა მოკავშირეებთან დასავლეთ უკრაინის თავზე “საჰაერო თავდაცვის ფარის“ შექმნას განიხილავს.

• რა მდგომარეობაა 29 აგვისტოს მონაცემებით:

რუსებმა უკრაინას დრონებით და რაკეტებით შეუტიეს, კიევში აფეთქებების ხმები ისმოდა. საჰაერო განგაში ქვეყნის 15 ოლქში გამოცხადდა. მათივე ინფორმაციით, ნამსხვრევების ჩამოვარდნა დაფიქსირდა კიევის დნეპროვსკის, გოლოსევსკისა და დესნიანსკის რაიონების საცხოვრებელ ზონებში. გოლოსევსკის რაიონში საცხოვრებელი კორპუსი დაზიანდა.

უკრაინული არხების ინფორმაციით, სხვადასხვა რეგიონის თავზე 30-დან 40-მდე დრონი დაფიქსირდა. “შაჰიდები“ ხერსონის, ნიკოლაევის, კიროვოგრადის, დნეპროპეტროვსკის, პოლტავას, სუმის და ხარკოვის რეგიონებში შენიშნეს.

აფეთქებები იყო ხარკოვში.

ათობით დრონის შემდეგ, რუსულმა არმიამ უკრაინის მიმართულებით რაკეტები გაუშვა. არსებული ინფორმაციით, 2 ერთეული “ზებგერითი“ რაკეტის სამიზნე, სავარაუდოდ, მირგოროდის სამხედრო აეროდრომი იყო.

“შაჰიდის“ ნარჩენები კიევში, ორ სახლს მოხვდა. წინასწარი ინფორმაციით, მსხვერპლი არ არის.

• უკრაინელებმა იერიში როსტოვის რეგიონში მდებარე “ატლასის“ ნავთობის საცავზე მიიტანეს. ინფორმაციას გენერალური შტაბი ოფიციალურად ადასტურებს

უპილოტო თვითმფრინავის თავდასხმის შედეგად იქ ძლიერი ხანძარი გაჩნდა. UNIAN-ის ინფორმაციით, ეს არის თავდაცვის სამინისტროს მთავარი სადაზვერვო სამმართველოსა და უკრაინის შეიარაღებული ძალების სპეცრაზმის ერთობლივი ოპერაცია.

დეპარტამენტმა ასევე დაადასტურა, რომ თავდასხმები განხორციელდა “ზენიტის“ ნავთობის საცავზე კიროვის რეგიონში და რუსეთის ფედერაციის ვორონეჟის რეგიონში რუსული ჯარების ჯგუფის "დასავლეთის" საველე საარტილერიო საცავზე.

კურსკის ოლქის ქალაქ ლგოვის მერმა ალექსეი კლემეშოვმა განაცხადა, რომ ხუთშაბათს დასახლება უკრაინის საარტილერიო ცეცხლის ქვეშ მოექცა. მისი თქმით “დაზიანდა ლგოვ-კიევის სადგურის ორი საცხოვრებელი კორპუსი და სარკინიგზო ლიანდაგი“.

“დაბომბვის შემდეგ ხანძარი ქალაქის ერთ-ერთი ქარხნის საწყობსაც გაუჩნდა. ხანძარი სწრაფად ჩააქრეს. არცერთი მცხოვრები არ დაშავებულა“, - წერს კლემეშოვი თავის ტელეგრამის არხზე. მან ევაკუირებულ ადგილობრივ მოსახლეობას მიმართა, არ დაბრუნდნენ ქალაქში “სანამ ვითარება სრულად არ დასტაბილურდება“.

• ბრაიანსკის ოლქის თავზე სამი უკრაინული დრონი ჩამოაგდეს.
• უკრაინულმა დრონებმა რუსეთის მიერ ოკუპირებულ სევასტოპოლს შეუტიეს.

“სევასტოპოლში სამხედროები იგერიებენ უკრაინის შეიარაღებული ძალების თავდასხმას, მუშაობს საჰაერო თავდაცვა. წინასწარი ინფორმაციით, 2 უპილოტო საფრენი აპარატი უკვე ჩამოგდებულია“, - წერს ქალაქის ადმინისტრაციის წარმომადგენელი.

რუსეთის თავდაცვის სამინისტროს ინფორმაციით კი ღამის განმავლობაში ექვსი უკრაინული უპილოტო საფრენი აპარატი ჩამოაგდეს. სამინისტროს პრესსამსახურის განცხადებაში ნათქვამია, რომ 3 უპილოტო თვითმფრინავი ჩამოაგდეს ყირიმის თავზე, 2 ბრაიანსკის რეგიონში და ერთი ბელგოროდის რეგიონში.

29 აგვისტოს დილით, ბელგოროდის ოლქის ქალაქ შებეკინოში ერთი ადამიანი დაიღუპა. ხელისუფლების ცნობით, კიდევ ორი ადამიანი დაშავებულია.

გუბერნატორის თქმით, დაბომბვისას ასევე დაზიანდა ადმინისტრაციული შენობა და ერთი სოციალური დაწესებულება.

წყარო

იხილეთ ასევე:

• უკრაინის გამარჯვების გეგმა - რის წარდგენას აპირებს ვოლოდიმირ ზელენსკი ჯო ბაიდენისთვის და აშშ-ის პრეზიდენტობის კანდიდატებისთვის
• უკრაინელებმა ბელგოროდის ოლქში შეჭრა სცადეს; როსტოვის ოლქში კიდევ ერთი ნავთობბაზა იწვის... - რა ხდება ომში რუსეთის ტერიტორიაზე?