რას ამბობენ “ქართული ოცნების“ ლიდერები ამომრჩეველთან შეხვედრისას, ივანიშვილის დასაცავად გამოყენებულ ტყვიაგაუმტარ მინაზე?

პარტია "ქართული ოცნების" თავმჯდომარემ, ბიძინა ივანიშვილმა, საარჩევნო კამპანიის რეგიონულ ღონისძიებაზე სიტყვით გამოსვლისას, მცხეთაში შეკრებილ მოსახლეობას მიმართა. ყურადღება ტყვიაგაუმტარ მინებში მოთავსებულმა ტრიბუნამ მიიქცია, რომელიც პარტიის ლიდერს განსაკუთრებით იცავდა.

• “ქართული ოცნების“ ლიდერები უსაფრთხოების განსაკუთრებული ზომების მიღებას ჟურნალისტებთან ეხმიანებიან

“სიფრთხილეს თავი არ სტკივა, რატომ არ უნდა დავიცვათ ადამიანი? ნახეთ, ტრამპს პირდაპირ კლავდნენ, ადამიანი გამოდიოდა სიტყვით, ესროლეს და სიკვდილისთვის განწირული იყო,“ - ამის შესახებ თბილისის მერმა, კახა კალაძემ ფაქტის შეფასებისას განაცხადა.

“ზოგიერთ ტელევიზიას აქვს სურვილი, ოპოზიცია ისე წარმოაჩინოს, რომ საწყალი და დაბეჩავებულია. შეიძლება დაბეჩავებული, განადგურებული მართლა არის, მაგრამ ყველაფრის მკადრებელია იმ ვითარებაში, სადაც ისინი იმყოფებიან. არ ავხსნი, სად იმყოფებიან. გვარამიამ უფრო კარგად იცის, სად იმყოფებიან. ყველაფრის მკადრებლები არიან. ჩვენ ვნახეთ ფაქტი - წარმოგიდგენიათ, აშშ-ში მიმდინარეობს საპრეზიდენტო არჩევნების კამპანია და ერთ-ერთ კანდიდატს ესროლეს, კლავდნენ ჩვეულებრივად. შესაბამისად, ყველაფერს იკადრებენ. ბიძინა ივანიშვილი ჩვენი ქვეყნისთვის არის მნიშვნელოვანი ფიგურა. ძალიან დიდი როლი აქვს ამ ადამიანს იმაში, რომ ქვეყანაში შენარჩუნებულია სიმშვიდე, “ქართული ოცნება“ პრაგმატულ პოლიტიკას ატარებს და ამ ყველაფერს ჩვენი ქვეყნის მოსახლეობა კარგად ხედავს. ამიტომ, უსაფრთხოების ზომები გაზრდილია. ნახეთ ტრამპის საჯარო გამოსვლა. რა თქმა უნდა, ყველა იცავს უსაფრთხოებას და ჩვენც შესაბამისად ვიქცევით“, - განაცხადა კალაძემ.

• კითხვაზე, ეშინია თუ არა ბიძინა ივანიშვილს თავდასხმის, კალაძემ უპასუხა, რომ ბიძინა ივანიშვილი მნიშვნელოვანი ფიგურაა.

“ბატონი ივანიშვილი გახლავთ ადამიანი, რომელმაც ამ ქვეყანაში ჩვენი ქვეყნის მოსახლეობასთან ერთად დაამთავრა ბოროტება, რომელიც წარმოდგენილი იყო “ნაციონალური მოძრაობის“ სახით და გვიმტკიცებდნენ, თითქოს ეს იყო “დემოკრატის შუქურა“. წარმოგიდგენიათ? იმ ბოროტებზე გვეუბნებოდნენ, რომ “დემოკრატიის შუქურა“ იყო. როგორ აუბედურებდნენ, კლავდნენ, აწამებდნენ. დღეს რადიკალურად განსხვავებული ვითარებაა.

ზუსტად ბიძინა ივანიშვილი იყო, რომელმაც ყველაფერი გადადო თავისი სიცოცხლის, ოჯახის რისკის ფასად და 2012 წელს ბოროტება დაამარცხა. ეს ძალა არსად წასულა, ისევ აქ არის. აქ მარტო “ნაციონალურ მოძრაობაზე“ საუბარი არ არის. რადიკალური დაჯგუფება, “კოლექტიური ნაციონალური მოძრაობა“ დავარქვათ, რომელიც იმართება გარედან და რომლებიც ყველაფრის მკადრებლები არიან. შესაბამისად, სიფრთხილეს თავი არ სტკივა, რატომ არ უნდა დავიცვათ ადამიანი? ნახეთ ტრამპს პირდაპირ კლავდნენ, ადამიანი გამოდიოდა სიტყვით, ესროლეს და სიკვდილისთვის განწირული იყო. უბრალოდ, არ ვიცი როგორ გადარჩა“, - განაცხადა კალაძემ.

რაც შეეხება კითხვას, რამდენად არის მხოლოდ ივანიშვილი საფრთხის ქვეშ და სხვები არა, კალაძემ უპასუხა: “კი, ივანიშვილი არის ადამიანი, რომელსაც უდიდესი როლი აქვს ქართულ პოლიტიკაში. იმაში,რომ ქვეყანაში ინარჩუნებს მშვიდობას და ქვეყანა ვითარდება“.

• დეპუტატ ბექა ოდიშარიას თქმით, დღევანდელი მოცემულობა იძლევა იმის ფიქრისა და ვარაუდის საშუალებას, რომ შესაძლებელია, მათ შორის ბიძინა ივანიშვილის მიმართაც ასეთი ტიპის ტერაქტები განხორციელდეს.

“რა არის გასაკვირი იმაში, რომ განსაკუთრებული უსაფრთხოების ზომები იქნა მიღებული ბიძინა ივანიშვილთან დაკავშირებით? დარწმუნებული ვარ, ეს იქნებოდა უსაფრთხოების სამსახურების რჩევა და კონსულტაცია,“ - განაცხადა “ქართული ოცნების“ წევრმა.

• “ჩვენ დღევანდელი მოცემულობა გვაძლევს იმის ფიქრისა და ვარაუდის საშუალებას, რომ შესაძლებელია განხორციელდეს ასეთი ტიპის ტერაქტები, მათ შორის ბიძინა ივანიშვილის მიმართაც, რომელიც ლოგიკურადაც არის მათი N1 სამიზნეა, ვინაიდან ის პიროვნულად მისი მშვიდობისმყოფელი პოლიტიკით ეღობება სწორედ მათ იმ ზრახვებს, რომელიც მეორე ფრონტის გახსნასთან და სხვა ბევრ მანკიერ მოვლენასთანაა დაკავშირებული.

გახსოვთ, პრემიერ ფიცოზე მომხდარი თავდასხმა, ისევე როგორც დონალდ ტრამპზე განხორციელებული ტერორისტული აქტი. ნახეთ, რომ დონალდ ტრამპი სწორედ ასეთივე ტიპის თავდაცვითი ზომების მიღებით წარდგა პირველად ღია სივრცეში საკუთარი ამომრჩევლის წინაშე. ვიცით, რომ მიმდინარეობს გამოძიება, ათეულობით ადამიანი იქნა დაკითხული და რა თქმა უნდა, არსებობს არამხოლოდ საფუძვლიანი ეჭვი და ვარაუდი, არამედ ეს პრაქტიკულად მოცემულობაა, რომ ბიძინა ივანიშვილი მათ გამეტებული ჰყავთ - ის არის N1 სამიზნე. ბუნებრივია, რომ უსაფრთხოების სამსახური მიიღებდა განსაკუთრებულ ზომებს, რომ მას ასეთი ტიპის ხიფათო აარიდოს”, - აღნიშნა ოდიშარიამ.

ოპოზიციის წარმომადგენლებმა ბიძინა ივანიშვილის გამოსვლის აღნიშნული ფორმა გააკრიტიკეს.

ფრაქცია “ერთიანი ნაციონალური მოძრაობის“ დეპუტატის ლევან ბეჟაშვილის თქმით, “შემთხვევითი არ არის, რომ ივანიშვილი “ბრონირებული“ აკვარიუმით ესაუბრებოდა საზოგადოებას, ეს არის დისტანცირება, რომელიც “ოცნების“ ხელისუფლებას აქვს ქართველ ხალხთან. არცერთი გზავნილი არ შეიცავდა პოზიტიური მოლოდინის შექმნას თუ რისი შეთავაზება უნდათ მათ საქართველოს მოსახლეობისთვის. მათი მთელი ყურადღება ხელისუფლების შენარჩუნებისკენაა მიმართული და არარსებული “ქიმერებით“, ომის საფრთხეებით, საზოგადოებაში შიშის დანერგვით, ძალადობითა და ზეწოლით, უნდათ, რომ საზოგადოება შეაშინონ.“

“რატომ იყო შუშაში და სარკოფაგში ბიძინა ივანიშვილი და არა ირაკლი კობახიძე?“ - ასე გამომეხმაურა “ერთიანობა-ნაციონალური მოძრაობის“ ერთ-ერთი ლიდერი პაატა მანჯგალაძე, საარჩევნო კამპანიის ფარგლებში “ქართული ოცნების“ მიერ გამართულ ღონისძიებაზე ივანიშვილის სიტყვით გამოსვლას.

“ჩვენ წამოვიწყებთ სამართლებრივ პროცესს, რომლის შედეგადაც როგორც "ნაციონალური მოძრაობა“, ისე ყველა მისი სატელიტი და მემკვიდრე პარტია აიკრძალება, რისთვისაც ყველანაირი სამართლებრივი საფუძველი არსებობს, - ამის შესახებ პარტია "ქართული ოცნების" თავმჯდომარემ, ბიძინა ივანიშვილმა, საარჩევნო კამპანიის რეგიონულ ღონისძიებაზე სიტყვით გამოსვლისას, მცხეთაში შეკრებილ მოსახლეობას განუცხადა.

• მმართველი პარტიის საპატიო თავმჯდომარის განცხადებით, "ქართულ ოცნებას“ პირველ რიგში, საკონსტიტუციო უმრავლესობის მოპოვება იმისთვის სჭირდება, რომ გაასამართლოს “ნაციონალური მოძრაობა“, რომელსაც უამრავი დანაშაული აქვს ჩადენილი საკუთარი ქვეყნისა და ხალხის წინაშე. ივანიშვილის თქმით, კრებსითი “ნაციონალური მოძრაობა“, საქართველოს დღესაც ომისა და არეულობისკენ ექაჩება.

მისივე განმარტებით, ტერიტორიული მთლიანობის აღდგენის პირობებში, საჭირო გახდება კონსტიტუციაში ცვლილებების შეტანა, თუმცა, ასეთ დროსაც კი, კრებსითი “ნაციონალური მოძრაობა“ ეროვნული ინტერესების წინააღმდეგ წავა, რისი დაშვებაც არ შეიძლება.

ივანიშვილის თქმით, “ქართულ ოცნებას“ უნდა ჰქონდეს საკონსტიტუციო უმრავლესობა, რათა დაბრკოლება არ შეექმნას საკონსტიტუციო ცვლილებების განხორციელებისას.

იხილეთ ასევე:

• "საკმარისია ერთი პატარა შეცდომა და შეიძლება ქვეყანა დავკარგოთ" - რა თქვა ივანიშვილმა საარჩევნო კამპანიის რეგიონულ ღონისძიებაზე?
• "ბიძინა ივანიშვილმა 2012 წლის 1 ოქტომბერს ხალხი გაათავისუფლა ურჩხულისგან და ჩვენი ქვეყანა გადაარჩინა!" - ღარიბაშვილი